.jpg)
សកម្មភាពលើកទូកុងតឺន័រនៅកំពង់ផែស្វយ័តភ្នំពេញ កាលពីថ្ងៃទី ២០ កញ្ញា។ ហេង ជីវ័ន
ភ្នំពេញៈ អ្នកជំនាញបានអះអាងថា វិស័យដឹកជញ្ជូនកម្ពុជាបានបង្ហាញពីភាពមមាញឹកជិតដូចមុនពេលមានការផ្ទុះឡើងនៃជំងឺកូវីដ ១៩ ហើយ។
លោក ស៊ិន ចន្ធី ប្រធានសមាគមភ័ស្តុភារកម្មកម្ពុជាបានប្រាប់ ភ្នំពេញ ប៉ុស្តិ៍ នៅក្នុងថ្ងៃទី ១ ខែវិច្ឆិកាថា កាលពីអំឡុងពេលនៃការផ្ទុះរីករាលដាលជំងឺកូវីដ ១៩ ក្នុងប្រទេស សកម្មភាពនៃវិស័យដឹកជញ្ជូនបានធ្លាក់មកនៅប្រមាណ ៧០ ភាគរយប៉ុណ្ណោះ ប៉ុន្តែក្រោយពីមានយុទ្ធនាការចាក់វ៉ាក់សាំង និងផែនការបើកប្រទេសឡើងវិញ ធ្វើឱ្យវិស័យនេះកើនឡើងជាងប្រមាណ ៩០ ភាគរយ។
លោកពន្យល់ថា ក្នុងអំឡុងពេលនៃការផ្ទុះឡើងជំងឺកូវីដ ១៩ ខ្លាំងនៅក្នុងប្រទេសបានធ្វើឱ្យក្រុមហ៊ុនមួយចំនួនប្រកាសផ្អាកដំណើរការរបស់ខ្លួន ប៉ុន្តែបន្ទាប់ពីមានភាពធូរស្បើយ និងរដ្ឋាភិបាលមានផែនការបើកប្រទេសឡើងវិញ ធ្វើឱ្យក្រុមហ៊ុនទាំងនោះរៀបចំបើកដំណើរការឡើងវិញ ខណៈក្រុមហ៊ុនខ្លះទៀតកំពុងត្រៀមដំណើរការ។
ទោះយ៉ាងណា លោកបន្តថា តម្លៃនៃការដឹកជញ្ជូនតាមកប៉ាល់ទៅប្រទេសក្នុងតំបន់មួយចំនួន និងប្រទេសឆ្ងាយ ដូចជាតំបន់អឺរ៉ុប និងអាមេរិកនៅតែមានខ្ពស់ និងខ្វះទូកុងតឺន័រសម្រាប់ផ្ទុកទំនិញ ពិសេសទំនិញកសិកម្ម។
លោកថ្លែងថា៖ «ទោះបីមានការបិទខ្ទប់តំបន់មួយចំនួន និងការរីករាលដាលជំងឺកូវីដ ១៩ ក៏វិស័យដឹកជញ្ជូននៅតែបន្តសកម្មភាពរបស់ខ្លួន គ្រាន់តែមានឧបសគ្គខ្លះៗ»។
លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាយល់ឃើញថា វិស័យដឹកជញ្ជូនកម្ពុជានៅមានកម្រិត ហើយប្រព័ន្ធដឹកជញ្ជូនក៏នៅមានការខ្វះខាតដែរពាក់ព័ន្ធនឹងផ្លូវ និងកន្លែងបែកចែកទំនិញ។
លោកបន្តថា វិស័យនេះរួមចំណែកយ៉ាងសំខាន់ក្នុងការជួយជំរុញកំណើនសេដ្ឋកិច្ចតាមរយៈការដឹកជញ្ជូនតម្លៃទាប។ មួយវិញទៀត ផ្លូវហាយវ៉េកម្ពុជាក៏មិនទាន់ឆ្លើយតបទៅនឹងការធ្វើចរាចរណ៍ទំនិញ និងការរុញឃ្លាំងទំនិញទៅក្រៅរាជធានីខេត្តក៏មិនទាន់ធ្វើបាន។
លោកថ្លែងថា៖ «បញ្ហានេះបានធ្វើរថយន្តដឹកទំនិញបង្ខំចិត្តចូលមកក្នុងក្រុង។ ដូច្នេះប្រព័ន្ធគ្រប់គ្រងនៅមានកម្រិត ដែលធ្វើឱ្យសេដ្ឋកិច្ចប្រឈមជាមួយនឹងថ្លៃដើមខ្ពស់»៕ LA
