ភ្នំពេញៈ កម្ពុជាប្រមូលបានប្រាក់ជិត ៤,១ ពាន់លានដុល្លារពីការនាំចេញកសិផលមួយចំនួនទៅទីផ្សារអន្តរជាតិនៅក្នុងរយៈពេល ១០ ខែឆ្នាំ ២០២១។ នេះបើយោងតាមទិន្នន័យពីលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោក វេង សាខុន បានឱ្យដឹងថា លទ្ធផលនៃការនាំចេញកសិផលពីកម្ពុជា (មិនរាប់បញ្ចូលផលិតផលជលផល ផលិតផលសត្វ ព្រៃឈើ និងឈើកៅស៊ូ) ក្នុងរយៈពេល ១០ ខែ ឆ្នាំ ២០២១ ត្រូវបានប៉ាន់ប្រមាណថា មានតម្លៃ ៤ ០៧១ ៥៧១ ០៩៨,៣៧ ដុល្លារដែលទីផ្សារទទួលទិញផលិតផលពីកម្ពុជាមានចំនួន ៦៨ ប្រទេស។
ចំពោះប្រភេទមុខទំនិញសំខាន់ៗរួមមាន ការនាំចេញអង្ករ ទទួលបានទឹកប្រាក់ ៣៩២ ៩៨៤ ៣២៦ ដុល្លារ, ស្រូវ ៤៦៥ ៤៩៨ ២៥០ ដុល្លារ កសិផលផ្សេងទៀត ២ ៨៣៣ ៧០០ ៦១៣,៣៧ ដុល្លារ ក្រៅពីនេះជាកៅស៊ូធម្មជាតិ។ ចំណែកបរិមាណនៃការនាំចេញកសិផលទៅទីផ្សារក្រៅប្រទេសមានចំនួនសរុប ៦ ៣៦៤ ៦០៧,២៤ តោន។
លោកអះអាងថា៖ «ការនាំចេញកសិផលសរុបក្នុងរយៈពេល ១០ ខែឆ្នាំ ២០២១ មានកំណើន ៨៧,៥៣ ភាគរយ ក្នុងនោះកសិផល ក្រៅពីអង្ករមានការកើនឡើងចំនួន ១០៦,៦២ ភាគរយ រីឯការនាំចេញអង្ករមានការថយចុះចំនួន ១៤,២០ ភាគរយដោយសារតម្លៃនៃការដឹកជញ្ជូនទៅកាន់គោលដៅមានការកើនឡើងទ្វេដង និងជួបប្រទះបញ្ហានឹងកង្វះទូកុងតឺន័រ ទំហំ ២០ ហ្វីតសម្រាប់ផ្ទុកអង្ករ»។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង លោក ងិន ហ៊ុន បានប្រាប់ភ្នំពេញប៉ុស្តិ៍ថា សកម្មភាពនៃការធ្វើកសិកម្មនៅក្នុងខេត្តកំពង់ឆ្នាំង ក៏ដូចជាទូទាំងប្រទេស បាននិងកំពុងកើនឡើងជាបន្តបន្ទាប់ ខណៈដីមួយចំនួនដែលគេទុកចោលកាលពីមុន នៅពេលនេះត្រូវបានប្រជាកសិករនាំគ្នាដាំដុះដំណាំជាច្រើន ហើយបើអំណោយផលកន្លែងខ្លះធ្វើច្រើនដងទៀតផង។ សម្ទុះនៃកំណើនការបង្កបង្កើនផលក្នុងវិស័យកសិកម្មនៅពេលនេះអាចបណ្តាលមកពីកត្តាមួយចំនួនដូចជា ការដាក់ចេញគោលនយោបាយរបស់រដ្ឋាភិបាល និងការជំរុញរបស់ថ្នាក់ដឹកនាំក្រសួងកសិកម្ម ដើម្បីធានាបាននូវសន្តិសុខស្បៀងដោយខ្លួនឯង ក៏ដូចជាការនាំចេញទៅក្រៅប្រទេសផងដែរ។
លោកលើកឡើងថា៖ «បើនិយាយពីផ្ទៃដីដាំដុះ គឺមិនកើនឡើងច្រើនទេ ប៉ុន្តែការរៀបចំប្រព័ន្ធបង្ហូរទឹកដែលបង្កលក្ខណៈអំណោយផលសម្រាប់ការដាំដុះ និងធ្វើបានច្រើនដងក្នុង ១ ឆ្នាំបានធ្វើឱ្យផលទទួលបានច្រើនជាងមុន»។ លោកបន្តថា៖ «នេះជាមូលហេតុដែលធ្វើឱ្យកម្ពុជាអាចផលិតបានច្រើនជាងមុន និងមានឱកាសនាំចេញទៅទីផ្សារក្រៅប្រទេស»។
កំណើនផលិតផលកសិផលពេលនេះក៏បណ្តាលមកពីកត្តារួមផ្សំមួយចំនួនទៀតដូចជា ការផ្សព្វផ្សាយ និងការយល់ដឹងរបស់ប្រជាកសិករពីអត្ថប្រយោជន៍នៃការចងគ្នាជាសហគមន៍ផលិត មានទីផ្សារទទួលទិញ និងមានការបណ្តាក់ទុនរបស់វិស័យឯកជន។ នេះបើតាមលោក ងិន ហ៊ុន។
ប្រធាននាយកដ្ឋានការពារដំណាំអនាម័យ និងភូតគាមអនាម័យនៃក្រសួងកសិកម្ម រុក្ខាប្រមាញ់ និងនេសាទ លោក កែ មុន្ធីវុធ និយាយថា កំណើនតម្រូវការទីផ្សារក្នុងស្រុក និងនាំចេញទៅទីផ្សារអន្តរជាតិ បានធ្វើឱ្យវិស័យកសិកម្មកម្ពុជារីកចម្រើនជាបន្តបន្ទាប់នារយៈពេលចុងក្រោយនេះ ពិសេសបន្ទាប់ពីរដ្ឋាភិបាល និងក្រសួងកសិកម្ម បានដាក់ចេញនូវយុទ្ធសាស្ត្រជាច្រើនដើម្បីជំរុញការដាំដុះ និងការពង្រឹងលើគុណភាព។
លោកបានបន្តថា ការសិក្សាពីពូជសម្រាប់ដាំដុះដើម្បីទទួលបានទិន្នផលខ្ពស់មានគុណភាពកម្រិតស្តង់ដា និងបញ្ហាភូតគាមអនាម័យសុទ្ធតែត្រូវបានកែលម្អ ជាពិសេសផលិតផលផ្លែឈើសម្រាប់នាំចេញទៅក្រៅប្រទេសដូចជា ស្វាយ និងចេក ជាដើម។
លោកបាននិយាយថា៖ «យើងនឹងឃើញកំណើនខ្ពស់បន្ថែមទៀត នៅពេលខាងមុខ ព្រោះក្រៅពីមានអនុវត្តពិធីសារទៅប្រទេសមួយចំនួន នៅពេលនេះយើងក៏បានរៀបចំហេដ្ឋារចនាសម្ព័ន្ធភូតគាមអនាម័យ និងការវេចខ្ចប់បានត្រឹមត្រូវតាមកម្រិតស្តង់ដាផងដែរ»។
យោងតាមទិន្នន័យក្រសួងកសិកម្ម ក្នុងឆ្នាំ ២០២០ ប្រទេសកម្ពុជាបាននាំចេញផលិតផលកសិកម្មក្នុងតម្លៃសរុបចំនួន ៤,៣៧ ពាន់លានដុល្លារ កើនលើសឆ្នាំ ២០១៩ ចំនួន ៥០០ លានដុល្លារ៕ LA