.jpg)
លោក ថោង ខុន រដ្ឋមន្ត្រីក្រសួងទេសចរណ៍ថ្លែងក្នុងខេត្តព្រះសីហនុ កាលពីថ្ងៃចន្ទកន្លងទៅ។ រូបថត ក្រសួងទេសចរណ៍
ភ្នំពេញៈ រដ្ឋមន្ត្រីក្រសួងទេសចរណ៍ លោក ថោង ខុន បានលើកឡើងគន្លឹះសំខាន់ៗចំនួន ៦ ដើម្បីឱ្យអាជ្ញាធរខេត្តព្រះសីហនុ និងកោះកុង និងតំបន់តារាសាគរ រៀបចំអនុវត្តសម្រាប់ការឈានឆ្ពោះទៅបើកទទួលភ្ញៀវទេសចរវ៉ាក់សាំងនាចុងខែវិច្ឆិកានេះឱ្យទទួលជោគជ័យប្រកបដោយប្រសិទ្ធភាព និងមានសុវត្ថិភាព។
ក្រុងព្រះសីហនុ ក្រុងកោះរ៉ុងនៃខេត្តព្រះសីហនុ និងតំបន់តារាសាគរនៃខេត្តកោះកុង គឺជាកន្លែងដែលរដ្ឋាភិបាលបានសម្រេចឱ្យបើកទទួលភ្ញៀវទេសចរវ៉ាក់សាំងមុនគេនៅកម្ពុជា ដោយគ្រោងចាប់ផ្តើមពីថ្ងៃ ៣០ ខែវិច្ឆិកា តទៅ បន្ទាប់ពីបាន បិទមួយរយៈដើម្បីទប់ស្កាត់ការឆ្លងរាលដាលជំងឺកូវីដ ១៩។
ក្នុងកិច្ចប្រជុំផ្សព្វផ្សាយស្តីពីការរៀបចំក្រុងព្រះសីហនុ ក្រុងកោះរ៉ុង និងតារាសាគរ (ខេត្តកោះកុង) ជាគោលដៅទទួលទេសចរវ៉ាក់សាំងកាលពីថ្ងៃទី ១ ខែវិច្ឆិកា ដែលរៀបចំធ្វើនៅខេត្តព្រះសីហនុ លោក ថោង ខុន បានលើកឡើងថា ដើម្បីទទួលជោគជ័យប្រកបដោយប្រសិទ្ធភាពសម្រាប់គោលដៅទេសចរណ៍សុវត្ថិភាព គឺទាមទារឱ្យអាជ្ញាធរត្រូវធ្វើកិច្ចការមួយចំនួនឱ្យមានប្រសិទ្ធភាព។
លោកលើកឡើងថា កិច្ចការទាំងនោះមានដូចជា លេខាធិការដ្ឋានរដ្ឋបាលខេត្តព្រះសីហនុ និងខេត្តកោះកុងត្រូវសហការបន្ទាន់ជាមួយគ្នាចាត់តាំងក្រុមការងារចម្រុះដែលដើរតួនាទីជាមជ្ឈមណ្ឌលប្រមូលផ្តុំព័ត៌មាន និងជាក្បាលម៉ាស៊ីនសម្រេចកិច្ចការនានានៅតាមតំបន់សុវត្ថិភាពដែលបានចង្អុលក្នុង «ផែនការយុទ្ធសាស្ត្របើកទទួលទេសចរវ៉ាក់សាំង, ត្រូវគ្រប់គ្រងស្ថិតិ និងអត្តសញ្ញាណអ្នកដំណើរចេញ-ចូលតំបន់គោលដៅសុវត្ថិភាពឱ្យច្បាស់លាស់ និងត្រូវរៀបចំប្រព័ន្ធគ្រប់គ្រងតាមបែបបច្ចេកវិទ្យា, រដ្ឋបាលខេត្តទាំង ២ ត្រូវបង្កើនការយកចិត្តទុកដាក់ចំពោះការប្រតិបត្តិនូវលក្ខណវិនិច្ឆ័យទាំងឡាយនៃ «ស្តង់ដាទីក្រុងស្អាត» ពិសេសសូចនាករពាក់ព័ន្ធនឹងភាពស្អាត អនាម័យ និងការគ្រប់គ្រងសំណល់ឱ្យបានត្រឹមត្រូវ។
លោកបន្តថា ចំណែកចំណុចផ្សេងទៀតមានដូចជា រដ្ឋបាលខេត្តទាំង ២ ត្រូវសិក្សាលទ្ធភាពអំពីការតភ្ជាប់ជើងហោះហើរ តាមជើងទឹក និងជើងគោក ជាពិសេសការតភ្ជាប់រវាងតំបន់សុវត្ថិភាពមួយទៅតំបន់សុវត្ថិភាពមួយទៀត «ក្រុងព្រះសីហនុក្រុងកោះរ៉ុងតារាសាគរ», ត្រូវយកចិត្តទុកដាក់ជំរុញប្រតិបត្តិករទេសចរណ៍ដែលស្ថិតក្រោមដែនសមត្ថភាពរបស់ខ្លួនអនុវត្តឱ្យបានខ្ជាប់ខ្ជួន និងឱ្យកាន់តែប្រសើរនូវវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមាក្នុងវិស័យទេសចរណ៍, និងត្រូវបានការប្រជុំតាមដានរៀងរាល់សប្តាហ៍ ដែលអ្នកទទួលខុសត្រូវតាមផែននីមួយៗត្រូវរាយការណ៍បច្ចុប្បន្នភាពការងាររបស់ខ្លួនជាប់ជាប្រចាំ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានប្រាប់ថា ការត្រួតពិនិត្យឱ្យបានហ្មត់ចត់ដើម្បីធានាសុវត្ថិភាពទេសចរក៏ដូចជាអ្នកក្នុងវិស័យទេសចរណ៍ ពិសេសការឆ្លងរាលដាលជំងឺកូវីដ ១៩ គឺជាការចាំបាច់ព្រោះបើគ្រប់គ្រងមិនបានល្អវានឹងធ្វើឱ្យប៉ះពាល់ដល់ផែនការទទួលភ្ញៀវទេសចរបរទេស។ សម្រាប់វិស័យឯកជន ការត្រៀមរៀបចំទីកន្លែង និងវិធានការគឺរួចរាល់អស់ហើយ៕ LA
