.jpg)
ពិធីចុះហត្ថលេខារវាង គណៈគ្រប់គ្រងជាន់ខ្ពស់នៃក្រុមហ៊ុន OCIC CAIC និងធនាគារ ព្រីនស៍។
ធនាគារព្រីនស៍ ម.ក កាលពីថ្ងៃទី៣ ខែវិច្ឆិកាបានចុះហត្ថលេខាវិនិយោគទឹកប្រាក់ចំនួន ១៥លានដុល្លារអាមេរិក លើសញ្ញាបណ្ណសាជីវកម្មឯកជនរបស់អាកាសយានដ្ឋានអន្តរជាតិភ្នំពេញថ្មី (NPPIA) ដែលចេញដោយក្រុមហ៊ុនខេមបូឌា អ៊ែរផត អ៊ិនវេសមិន ឯ.ក (CAIC) សម្រាប់ការសាងសង់អាកាសយានដ្ឋានអន្តរជាតិភ្នំពេញថ្មីនេះ។
អាកាសយានដ្ឋានថ្មីនេះមានទីតាំងស្ថិតនៅភាគខាងត្បូងនៃរាជធានីភ្នំពេញ នៅក្នុងខេត្តកណ្តាលដែលមានផ្ទៃក្រឡាលាតសន្ធឹងនៅលើផ្ទៃដីជាង ២៦០០ ហិកតា។ បន្ទាប់ពីបញ្ចប់ការសាងសង់ជាស្ថាពរអាកាសយានដ្ឋានថ្មីនេះនឹងក្លាយជាអាកាសយានដ្ឋានដ៏ធំជាងគេទី ៩ នៅលើពិភពលោកនិងជាអាកាសយានដ្ឋានដ៏សំខាន់មួយរបស់ទីក្រុងភ្នំពេញដែលនឹងមកជំនួសឱ្យអាកាសយានដ្ឋានអន្តរជាតិភ្នំពេញចាស់។
ក្រុមហ៊ុនខេមបូឌា អ៊ែរផត អ៊ិនវេសមិន ឯ.ក (CAIC) គឺជាការវិនិយោគរួមគ្នារវាងក្រុមហ៊ុនសាជីវកម្មវិនិយោគក្រៅប្រទេសកម្ពុជានិងរដ្ឋលេខាធិការដ្ឋានអាកាសចរស៊ីវិលកម្ពុជា។ សម្រាប់គម្រោងអាកាសយានដ្ឋានអន្តរជាតិភ្នំពេញថ្មីនេះ ក្រុមហ៊ុនខេមបូឌា អ៊ែរផត អ៊ិនវេសមិន ឯ.ក (CAIC) បានទទួលសិទ្ធិសម្បទានផ្តាច់មុខលើអាកាសយានដ្ឋាននេះដែលរួមមានសិទ្ធិកម្មសិទ្ធិការរចនាការសាងសង់ហិរញ្ញប្បទានប្រតិបត្តិការការថែទាំនិងការគ្រប់គ្រងគម្រោងជាដើម។
លោក ហ៊ន់ សុរចនា ប្រធាននាយកប្រតិបត្តិនិងជានាយកគ្រប់គ្រងនៃធនាគារព្រីនស៍ ម.ក បានមានប្រសាសន៍ថា៖ «យើងពិតជាមានសេចក្តីសោមនស្សនិងមានកិត្តិយសខ្លាំងណាស់ដែលបានក្លាយជាផ្នែកមួយនៃព្រឹត្តិការណ៍ដ៏សំខាន់នេះសម្រាប់ព្រះរាជាណាចក្រកម្ពុជា។ ជាមួយនឹងគម្រោងនេះផងដែរវាពិតជាធ្វើឱ្យការអភិវឌ្ឍហេដ្ឋារចនាសម្ព័ន្ធ របស់ប្រទេសកម្ពុជាមានការរីកចម្រើន ហើយអាចជាកំលាំងចលករមួយក្នុងការគាំទ្រនិងជំរុញដល់សេដ្ឋកិច្ចរបស់ប្រទេសកម្ពុជា ក្នុងរយៈពេលប៉ុន្មានឆ្នាំខាងមុខនេះផងដែរបន្ថែមពីនេះ វាក៏ជាការសម្រេចចិត្តដ៏មានប្រសិទ្ធភាពមួយដែលធនាគារព្រីនស៍ បានក្លាយជាដៃគូវិនិយោគជាមួយក្រុមហ៊ុនសាជីវកម្មវិនិយោគក្រៅប្រទេសកម្ពុជា ដែលជាក្រុមហ៊ុនទទួលបានការជឿទុកចិត្តនិងជាក្រុមហ៊ុនមួយក្នុងចំណោមក្រុមហ៊ុនដែលបានបង្កើតប្រតិបត្តិការអាជីវកម្មរបស់ខ្លួនយូរជាងគេនៅកម្ពុជា»។
លោក ហ៊ន់ សុរចនា បានបន្ថែមទៀតថា៖ «ការចូលរួមនេះផងដែរបានដើរតួនាទីយ៉ាងសំខាន់ក្នុងការកសាងប្រទេសជាតិដោយប្រយោលដើម្បីជំរុញសេដ្ឋកិច្ចតាមរយៈការផ្តល់នូវជំនួយដល់គម្រោងហេដ្ឋារចនាសម្ព័ន្ធសំខាន់ៗនានាហើយជាក់ស្តែងយើងក៏បានត្រៀមខ្លួនរួចជាស្រេចក្នុងការគាំទ្រដល់តម្រូវការហិរញ្ញវត្ថុរបស់អតិថិជនរបស់យើងលើគ្រប់វិស័យមិនថាពួកគេជាអតិថិជនបុគ្គលអតិថិជនសហគ្រាសធុនតូចនិងមធ្យម នៅកម្ពុជា និង ក្រុមហ៊ុនធំៗ ដូចជា ក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) ជាដើម ដើម្បីបំពេញនូវតម្រូវការហិរញ្ញវត្ថុរបស់ពួកគេឱ្យកាន់តែប្រសើរ»។
ពិធីចុះហត្ថលេខារវាង គណៈគ្រប់គ្រងជាន់ខ្ពស់នៃក្រុមហ៊ុន OCIC CAIC និងធនាគារ ព្រីនស៍។
ពិធីចុះហត្ថលេខានេះមានការអញ្ជើញចូលរួមជាអធិបតីភាពពីសំណាក់អ្នកឧកញ៉ាបណ្ឌិត ពុង ឃាវសែ អគ្គនាយកក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) និងក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) និងលោក ហ្គុយឆាយ អនុប្រធានក្រុមប្រឹក្សាភិបាលនៃធនាគារព្រីនស៍ ម.ក ក៏ដូចជាថ្នាក់ដឹកនាំជាន់ខ្ពស់នៃក្រុមហ៊ុនសាជីវកម្មវិនិយោគក្រៅប្រទេសកម្ពុជា (OCIC) ក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) និងធនាគារព្រីនស៍ ផងដែរ។
សម្រាប់ព័ត៌មានបន្ថែមអំពីធនាគារព្រីនស៍ ម.ក សូមចូលទៅកាន់គេហទំព័ររបស់យើងតាមរយៈ https://www.princebank.com.kh/ ឬចូលទៅកាន់ ឆាណែល Telegram ផ្លូវការរបស់យើងតាម https://t.me/Princebankproducts ដើម្បីទទួលបានព័ត៌មានថ្មីៗ និងលម្អិតអំពីផលិតផលឬប្រូម៉ូសិន (ការផ្សព្វផ្សាយ) នានា៕
អំពីធនាគារ ព្រីនស៍ ម.ក
ធនាគារ ព្រីនស៍ ម.ក បានចាប់ផ្តើមប្រតិបត្តិការរបស់ខ្លួន ក្នុងឆ្នាំ ២០១៥ ក្នុងនាមជាគ្រឹះស្ថានមីក្រូហិរញ្ញវត្ថុឯកជនមួយ ដែលមានឈ្មោះចាស់ថា «គ្រឹះស្ថានមីក្រូហិរញ្ញវត្ថុ ព្រីនស៍ ហ្វាយនែន ភីអិលស៊ី» ហើយត្រូវបានប្រែក្លាយទៅជាធនាគារពាណិជ្ជ ដែលមានអាជ្ញាប័ណ្ណធ្វើប្រតិបតិ្តការធនាគារលេខ ធ 46 ពីធនាគារជាតិនៃកម្ពុជា ចុះថ្ងៃទី១៨ ខែកក្កដា ឆ្នាំ ២០១៨។ ដោយមានមូលដ្ឋានដើមទុនដ៏រឹងមាំ ជាមួយនឹងការប្រើប្រាស់បច្ចេកវិទ្យាទំនើប ប្រកបដោយជំនាញច្បាស់លាស់ និងការយល់ដឹងយ៉ាងទូលំទូលាយអំពីទីផ្សារក្នុងស្រុក ធនាគារ ព្រីនស៍ ម.ក មានភាពជឿជាក់ក្នុងការក្លាយជាគ្រឹះស្ថានឈានមុខក្នុងវិស័យធនាគារ ដោយផ្តល់ដំណោះស្រាយហិរញ្ញវត្ថុច្រើនជម្រើស និងសម្បូរបែបដល់អតិថិជនរបស់យើង តាមរយៈសេវាកម្ម និងផលិតផលជាច្រើនប្រភេទ ដែលប្រកបដោយភាពងាយស្រួល និងបទពិសោធន៍ដ៏ល្អឥតខ្ចោះ ជូនអតិថិជនរបស់យើង។ យើងមានចំណាប់អារម្មណ៍យ៉ាងខ្លាំងក្នុងការរួមចំណែកដល់ការអភិវឌ្ឍន៍ សហគ្រាសធុនតូច និងមធ្យម ដែលជាផ្នែកដ៏សំខាន់មួយនៃអតិថិជនគោលដៅរបស់យើង។ បច្ចុប្បន្ននេះ យើងមានសាខាចំនួន ៣២ និងទីតាំងអេធីអឹម ចំនួន ៧០ នៅទូទាំងព្រះរាជាណាចក្រកម្ពុជា។
