.jpg)
លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។ ហេង ជីវ័ន
ភ្នំពេញៈ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិបានសម្តែងនូវសុទិដ្ឋិនិយមថា ច្បាប់ស្ដីពីវិនិយោគនៃព្រះរាជាណាចក្រកម្ពុជាថ្មីនឹងក្លាយជាឧបករណ៍ដ៏សំខាន់ មានប្រសិទ្ធភាព និងទាន់ពេលវេលាក្នុងការស្ដារឡើងវិញនូវសង្គមសេដ្ឋកិច្ចក្រោយវិបត្តិកូវីដ ១៩ និងធ្វើឱ្យកម្ពុជាក្លាយជាទិសដៅដ៏ទាក់ទាញសម្រាប់វិនិយោគិននានា។
ការលើកឡើងរបស់លោក ប្រាក់ សុខុន ធ្វើឡើងកាលពីថ្ងៃទី ៣ ខែវិច្ឆិកា ឆ្នាំ ២០២១ ក្នុងសិក្ខាសាលាតាមប្រព័ន្ធវីដេអូរៀបចំដោយក្រុមប្រឹក្សាអភិវឌ្ឍន៍កម្ពុជា (CDC) ក្រោមកិច្ចសហការជាមួយក្រសួងការបរទេស ដើម្បីផ្សព្វផ្សាយពីច្បាប់ស្ដីពីវិនិយោគនៃព្រះរាជាណាចក្រកម្ពុជាថ្មីជូនដល់ស្ថានតំណាងកម្ពុជានៅបរទេស ព្រមទាំងថ្នាក់ដឹកនាំក្រសួងការបរទេស និងសហប្រតិបត្តិការអន្តរជាតិ។
លោក ប្រាក់ សុខុន ក៏បានរំលេចពីបច្ច័យអវិជ្ជមានដែលកើតចេញពីវិបត្តិជំងឺកូវីដ ១៩ និងសង្គ្រាមពាណិជ្ជកម្ម ដែលធ្វើឱ្យសេដ្ឋកិច្ចសកល និងលំហូរវិនិយោគផ្ទាល់ពីបរទេសទូទាំងពិភពលោកមានការធ្លាក់ចុះ គួរឱ្យកត់សម្គាល់ ព្រមទាំងការប្រកួតប្រជែងអំណាចរបស់មហាអំណាចដែលធ្វើឱ្យប្រែប្រួល សណ្តាប់ធ្នាប់អន្តរជាតិ និងបានដាក់សម្ពាធដល់តំបន់អាស៊ីប៉ាស៊ីហ្វិក និងប៉ះពាល់ដល់មជ្ឈភាព និងសាមគ្គីភាពអាស៊ាន និងទំនាក់ទំនងរបស់អង្គការតំបន់នេះជាមួយដៃគូខាងក្រៅ។
លោក ប្រាក់ សុខុន ត្រូវបានដកស្រង់សម្តីយ៉ាងដូច្នេះថា៖ «[ខ្ញុំ] ជឿជាក់យ៉ាងមុតមាំថា ការប្រកាសឱ្យប្រើច្បាប់វិនិយោគនេះនឹងក្លាយជាឧបករណ៍មួយដ៏សំខាន់មានប្រសិទ្ធភាព និងទាន់ពេលវេលាក្នុងការស្ដារឡើងវិញនូវសង្គមសេដ្ឋកិច្ច ក្រោយវិបត្តិកូវីដ ១៩ និងធ្វើឱ្យកម្ពុជាក្លាយជាទិសដៅដ៏ទាក់ទាញមួយសម្រាប់វិនិយោគិន ស្របពេលដែលរាជរដ្ឋាភិបាលសម្រេចឱ្យមានការបើកដំណើរការសកម្មភាពសេដ្ឋកិច្ច និងប្រទេសឡើងវិញជាបណ្ដើរៗ ដើម្បីទទួលស្វាគមន៍វិនិយោគិនបរទេស និងភ្ញៀវទេសចរ ជាពិសេសភ្ញៀវទេសចរដែលបានចាក់វ៉ាក់សាំងរួច»។
លោក សុក ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជាបានចាត់ទុកការផ្សព្វផ្សាយច្បាប់នេះចំពោះបណ្ដាអង្គទូតកម្ពុជាប្រចាំស្ថានបេសកកម្មការទូតនៅក្រៅប្រទេសថាជាយុទ្ធសាស្ត្រដ៏មុតស្រួចក្នុងការបង្ហាញពីកាលានុវត្តភាពនៅកម្ពុជាសំដៅទាក់ទាញការវិនិយោគថ្មីៗប្រកបដោយគុណភាពបន្ថែមទៀត។
លោកបានគូសបញ្ជាក់ថា កិច្ចសហការជាប្រចាំរបស់ក្រសួងការបរទេស និងសហប្រតិបត្តិការអន្តរជាតិព្រមទាំងស្ថានបេសកកម្មការទូតកម្ពុជាប្រចាំនៅក្រៅប្រទេសដែលជានិច្ចកាលតែងរួមចំណែកយ៉ាងសំខាន់ក្នុងការជំរុញវិនិយោគ និងផ្សព្វផ្សាយពីបរិស្ថានវិនិយោគនៅកម្ពុជាជូនដល់វិនិយោគិនបរទេស។
លោកបានថ្លែងថា៖ «[ខ្ញុំ] មានសុទិដ្ឋិនិយមថាឯកឧត្តមលោកជំទាវដែលជាតំណាងកម្ពុជានៅក្រៅប្រទេសទាំងអស់នឹងជួយផ្សព្វផ្សាយបន្ថែមពីអត្ថប្រយោជន៍ទាំងឡាយដែលមានចែងក្នុងច្បាប់នេះ ដើម្បីឱ្យអ្នកវិនិយោគនៅក្រៅប្រទេសបានយល់កាន់តែច្បាស់ និងធ្វើការសម្រេចចិត្តមកវិនិយោគនៅកម្ពុជាដែលជាទីតាំងវិនិយោគប្រកបដោយសក្តានុពល»។
ច្បាប់ស្ដីពីវិនិយោគនេះត្រូវបានតាក់តែងឡើងតាមការចង្អុលបង្ហាញរបស់គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ ២០១៥-២០២៥ និងបានឆ្លងកាត់ការសិក្សាស្រាវជ្រាវ និងតាក់តែងឡើងយ៉ាងហ្មត់ចត់ ដោយក្រុមការងារនៃក្រុមប្រឹក្សាអភិវឌ្ឍន៍កម្ពុជាចាប់តាំងពីឆ្នាំ ២០១៥ រហូតបានបញ្ចប់នៅចុងឆមាសទី១ នៃឆ្នាំ ២០១៩ ស្របតាមអនុសាសន៍ណែនាំរបស់លោកនាយករដ្ឋមន្ត្រីនៅក្នុងវេទិការាជរដ្ឋាភិបាលផ្នែកឯកជនលើកទី ១៨ កាលពីថ្ងៃទី ២៩ ខែ មីនា ឆ្នាំ ២០១៩។ ច្បាប់វិនិយោគថ្មីនេះត្រូវបានអនុម័តដោយរដ្ឋសភាកាលពីថ្ងៃទី ៩ ខែកញ្ញាឆ្នាំ ២០២១ នេះ។
គម្រោងវិនិយោគឯកជននៅក្រៅតំបន់សេដ្ឋកិច្ចពិសេសចំនួន ៧៥ គម្រោង ត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តក្នុងរយៈពេល ៨ ខែដើមឆ្នាំ ២០២១ ធ្លាក់ចុះជិត ៣០ ភាគរយ បើធៀបនឹងរយៈពេលដូចគ្នាឆ្នាំ ២០២០។ យោងតាមរបាយការណ៍ក្រសួងសេដ្ឋកិច្ច និងហិរញ្ញវត្ថុ ដែលចេញផ្សាយថ្មីៗនេះ៕ LA
