.jpg)
វិភាគដោយ៖ លោក ចេង តារាវុធ អ្នកវិភាគឯករាជ្យ
តម្លៃប្រេងឆៅនៅសប្តាហ៍នេះមាន តម្លៃចន្លោះពី ៨០ ទៅ ៨៥ ដុល្លារក្នុង ១ បារ៉ែល ដែលបង្ហាញពីជំហររឹងមាំសម្រាប់រយៈពេលវែង បន្ទាប់ពីបានបង្កើតកំណត់ត្រាខ្ពស់បំផុតចាប់ពីឆ្នាំ ២០១៤។ កត្ដានេះបណ្ដាលមកពីកង្វះខាតការផ្គត់ផ្គង់សកល និងតម្រូវការខ្ពស់នៅសហរដ្ឋអាមេរិក ដែលជាប្រទេសប្រើប្រាស់ប្រេងឆៅធំបំផុតរបស់ពិភពលោក។
គេហទំព័រ CNBC បានលើកឡើងថា៖ «តម្លៃប្រេងឆៅហាក់ដូចជានៅតែអាចកើនឡើងខ្ពស់ ខណៈវិនិយោគិនមួយចំនួនកំពុងរង់ចាំការបញ្ជាក់ បន្ទាប់ពីបញ្ជីសារពើភណ្ឌប្រេងឆៅ EIA ទាំង ២ ដែលមានតម្រូវការផលិតផលច្រើនបំផុត កំពុងស្ថិតក្នុងទិសដៅត្រឹមត្រូវ ស្របពេលដែលផលិតកម្មរបស់សហរដ្ឋអាមេរិកមិនមានកំណើន ហើយអង្គការ OPEC+ នៅតែប្រកាន់ខ្ជាប់នូវផែនការផលិតប្រេង ៤០០ ០០០ បារ៉ែលក្នុង ១ ថ្ងៃដដែល ទោះបីជាមានការអំពាវនាវឱ្យមានប្រេងកាន់តែច្រើនពីប្រទេសប្រើប្រាស់សំខាន់ៗក៏ដោយ។
ចំណែក Oilprice.com កាលពីថ្ងៃអង្គារបានបញ្ជាក់ថា៖ «នៅមានរឿងជាច្រើនសម្រាប់តម្លៃប្រេង ដើម្បីបន្ដកើនឡើង ខណៈតម្រូវការកំពុងស្ថិតក្នុងដំណើរលឿនជាងការផ្គត់ផ្គង់ពេញ ១ ឆ្នាំ។ ឥឡូវនេះ អ្នកវិភាគជាច្រើនកំពុងរៀបចំសម្រាប់តម្លៃ ១០០ ដុល្លារ ខណៈការបំពេញតម្រូវការទំនងជាមិនកើតឡើងឆាប់ៗនេះទេ។
ទោះយ៉ាងនេះក្ដី ក្រាបតារាងតម្លៃប្រេងឆៅកំពុងបង្កើតសញ្ញានៃការធ្លាក់ចុះ បន្ទាប់ពីបង្កើតកម្រិតរបាំងដ៏ធំមួយនៅតម្លៃ ៨៥ ដុល្លារ និងកម្រិតរបាំងតូចនៅតម្លៃ ៨៤ ដុល្លារ ដែលអាចងាកទៅរកតម្លៃ ៨០ ដុល្លារវិញ។
សម្រាប់ការវិភាគជួញដូរនៅសប្តាហ៍នេះ វិនិយោគិនអាចបន្តទិញប្រេងឆៅ ប៉ុន្ដែប្រសិនបើតារាងតម្លៃបង្ហាញកាន់តែច្បាស់ថានឹងធ្លាក់ចុះនោះ វិនិយោគិនអាចពិចារណាលក់ក្នុងតម្លៃ ៨៥ ដុល្លារដោយកំណត់មុខងារបញ្ឈប់ហានិភ័យ ៩១ ដុល្លារ និងមុខងារកាត់យកប្រាក់ចំណេញនៅតម្លៃ ៧៥ ដុល្លារ៕
