ភ្នំពេញៈ លោក ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប ដែលមានប្រវត្តិប្រឡូកក្នុងវិស័យកសិកម្មច្រើនប្រភេទរួមទាំងដំណាំស្វាយផង បានផ្តល់យោបល់ឱ្យកសិករកំពុងដាំស្វាយទាំងអស់នៅកម្ពុជាត្រូវចេះកែប្រែចម្ការពីស្វាយកែវរមៀតទៅដាំដុះស្វាយផ្សេងៗទៀត ដើម្បីបំពេញតម្រូវការទីផ្សារក្នុងស្រុក និងជំរុញការនាំចេញ។
តាមរយៈវីដេអូដែលលោកបង្កើតជិត ១០ នាទី និងបានបង្ហោះនៅលើហ្វេសប៊ុករបស់លោកកាលពីថ្ងៃទី ២ ខែ វិច្ឆិកា ឆ្នាំ ២០២១ លោក ម៉ុង ឫទ្ធី បានណែនាំឱ្យកសិករត្រូវកែប្រែបច្ចេកទេសពីការដាំពូជស្វាយកែវរមៀត ដោយកាត់តទៅជាពូជស្វាយកែវសាវើយ និងស្វាយពូជណាំដកមៃ ទើបអាចបំពេញតម្រូវការទីផ្សារក្នុងស្រុក និងអាចនាំចេញ ប៉ុន្តែបើកដាំពូជស្វាយកែវរមៀតនៅក្នុងសម័យកូវីដនេះ កម្ពុជាប្រាកដជាមិនអាចនាំចេញបានទេ លុះត្រាតែមានការកែច្នៃដោយការសម្ងួត។
លោក ម៉ុង ឫទ្ធី បានបន្តថា បច្ចុប្បន្នលោកបានកាត់តប្តូរពូជស្វាយកែវរមៀតទៅជាពូជស្វាយដកម៉ៃប្រមាណ ៥ ០០០ ដើម ដើម្បីឱ្យក្លាយទៅជាពូជ ២ ប្រភេទសម្រាប់ផ្គត់ផ្គង់ទីផ្សារក្នុងស្រុក និងនាំចេញ ព្រោះវាមានរសជាតិមិនជូរដូចស្វាយកែវរមៀតទេ។
ទោះយ៉ាងណា លោកអះអាងថា ការកាត់តប្តូរពូជស្វាយនេះមិនមែនជារឿងងាយស្រួលទេ និងត្រូវមានបច្ចេកទេសត្រឹមត្រូវ ជាពិសេសត្រូវតែយកចិត្តទុកដាក់ខ្ពស់ក្នុងការថែទាំ ដោយដើរបេះមែកព្រៃចេញទុកតែមែកស្រុក និងនៅពេលលូតលាស់សន្លឹកត្រូវសត្វល្អិតចូលចិត្តស៊ីណាស់ ដោយទាមទារបាញ់ថ្នាំជាប្រចាំ។
លោកថ្លែងថា៖ «យើងត្រូវតែមានថ្នាំសម្រាប់បាញ់សត្វល្អិតកុំឱ្យស៊ីត្រួយស្វាយរបស់យើង និងត្រូវដាក់ជីបន្តបន្ទាប់ ព្រមទាំងថែទាំឱ្យបានដិតដល់ ដោយសា្វយខ្លះទៀតបើមើលថែដិតដល់អាចប្រើពេលពី ១០ ទៅ ១២ ខែ អាចចេញផ្កាខ្លះៗ។ បើមិនអ៊ីចឹងទេ វាខូចអត់បានផល និងមិនអាចផ្គត់ផ្គង់ទីផ្សារ និងការនាំចេញបានទេ»។
ស្វាយ ១ ប្រភេទទៀតដែលលោកបានណែនាំគឺពូជស្វាយ «អាយវិន» ដែលពូជស្វាយនេះក៏មានទីផ្សារដែរ ប៉ុន្តែប្រភេទពូជស្វាយនេះពិបាកថែទាំ និងត្រូវការបច្ចេកទេសខ្ពស់។
ភ្នំពេញប៉ុស្តិ៍មិនអាចទាក់ទងលោក ងិន ឆាយ អគ្គនាយកនៃអគ្គនាយកដ្ឋានកសិកម្មនៃក្រសួងកសិកម្ម រុក្ខាប្រមាញ់ និងនេសាទ ដើម្បីសុំធ្វើអត្ថាធិប្បាយលើការលើកឡើងនេះ កាលពីថ្ងៃម្សិលមិញ។
លោក អ៊ុន សាវឿន ប្រធានសហគមន៍ស្វាយកែវរមៀតខេត្តកំពង់ស្ពឺបានប្រាប់ភ្នំពេញប៉ុស្តិ៍នៅថ្ងៃទី ៣ ខែវិច្ឆិកាថា សហគមន៍របស់លោកក៏ធ្លាប់អនុវត្តពិសោធន៍បច្ចេកទេសដាំពូជកែវសាវើយដែរ ប៉ុន្តែមិនទទួលបានផលទេ។
លោកបន្តថា កន្លងមកសហគមន៍រំពឹងទៅលើតែពូជស្វាយកែវរមៀត ប៉ុន្តែមិនអាចធ្វើការនាំចេញទៅទីផ្សារក្រៅប្រទេស និងផ្គត់ផ្គង់ទីផ្សារក្នុងស្រុកបានទេ ដោយសារការរីករាលដាលជំងឺកូវីដ ១៩។
លោកនិយាយថា៖ «របរដាំស្វាយ បើមិនរកទីផ្សារនៅក្រៅប្រទេសទេ គឺមិនអាចទៅរួចឡើយ ហើយបើផ្គត់ផ្គង់ទីផ្សារក្នុងស្រុករបស់យើង ក៏គ្មានអ្នកណាទិញយកហូបដែរ ព្រោះគេដាំតែ ២ ដើមហូបមិនអស់ផង»។
បើតាមលោក សាវឿន កន្លងមកចិនមានកិច្ចព្រមព្រៀងជាមួយកម្ពុជា និងបានអនុញ្ញាតឱ្យមានការនាំស្វាយជាផ្លូវការ ប៉ុន្តែបានតែម្តង ឬ ២ ដងប៉ុណ្ណោះ ដោយក្រោយមកទៀតហាក់ដូចជាស្ងាត់ទៅវិញ ខណៈកន្លងមក ក៏មានការនាំចេញក្រៅប្រទេសបានតិចតួចប៉ុណ្ណោះ។
កម្ពុជាមានផ្ទៃដីដាំស្វាយសរុប ១៣១ ៨៩០ ហិកតា ដោយផ្ទៃដីប្រមូលផលចំនួន ៩៣ ០៩៩ ហិកតា៕ LA
វីដេអូ៖