.jpg)
ទីតាំងបៀរហ្គាដិន ១ កន្លែងបើកទទួលភ្ញៀវពេលព្រលប់នៅមុនការរីករាលដាលជំងឺឆ្លងកូវីដ ១៩។ បណ្តាញសង្គម
ភ្នំពេញៈ ក្រសួងទេសចរណ៍បានអនុញ្ញាតឱ្យបើកដំណើរការអាជីវកម្មបៀរហ្គាដិនឡើងវិញ នៅទូទាំងប្រទេសដោយត្រូវអនុវត្តឱ្យបានម៉ឺងម៉ាត់តាមវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) តាមគន្លងប្រក្រតីភាពថ្មីសម្រាប់អាជីវកម្មបៀរហ្គាដិន។
សេចក្តីសម្រេចដែលចុះហត្ថលេខាកាលពីថ្ងៃទី ៣ ខែវិច្ឆិកាឆ្នាំ ២០២១ ដោយលោក ថោង ខុន រដ្ឋមន្ត្រីក្រសួងទេសចរណ៍បានឱ្យដឹងថា សេចក្តីសម្រេចនេះ មានគោលបំណងដាក់ឱ្យអនុវត្ត វិធានសុវត្ថិភាពទេសចរណ៍សម្រាប់អាជីវកម្មបៀរហ្គាដិន ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ និងលើកកម្ពស់សុវត្ថិភាពទេសចរណ៍នៅក្នុងព្រះរាជាណាចក្រកម្ពុជា។
អាជីវកម្មបៀរហ្គាដិនដែលត្រូវបានចាត់ទុកអនុវត្តត្រឹមត្រូវត្រូវទទួលបាន «លិខិតបញ្ជាក់ទទួលស្គាល់អាជីវកម្មបៀរហ្គាឌិន ដែលអនុវត្តស្របតាមវិធានសុវត្ថិភាពទេសចរណ៍ សម្រាប់អាជីវកម្មបៀរហ្គាដិន»។ នេះបើតាមសេចក្តីសម្រេចដោយអាជីវកម្មអនុវត្តបានចាប់ពី ៨០% ឡើងនៃពិន្ទុសរុប និងបំពេញបានគ្រប់ចំណុចតម្រូវចាំបាច់ទាំងអស់។
សេចក្តីសម្រេចនេះបន្តថា ប្រតិបត្តិករទេសចរណ៍ ដែលមានបំណងប្រកបអាជីវកម្មបៀរហ្គាដិន ឬបន្តអាជ្ញាប័ណ្ណទេសចរណ៍ ត្រូវដាក់ពាក្យស្នើសុំអាជ្ញាប័ណ្ណទេសចរណ៍នៅអង្គភាពច្រកចេញចូលតែមួយរបស់រដ្ឋបាលរាជធានី-ខេត្ត។
វិធានសុវត្ថិភាពទេសចរណ៍នេះត្រូវបានដាក់ឱ្យអនុវត្តជាកាតព្វកិច្ច និងជាលក្ខខណ្ឌបន្ថែមក្នុងការស្នើសុំថ្មី ឬបន្តអាជ្ញាប័ណ្ណទេសចរណ៍។
អាជីវកម្មបៀរហ្គាដិនដែលបានបិទផ្អាកសកម្មភាពដោយរដ្ឋបាលរាជធានី-ខេត្តក្នុងអំឡុងពេលវិបត្តិកូវីដ ១៩ ហើយមានបំណងប្រកបអាជីវកម្មបៀរហ្គាដិនឡើងវិញ ត្រូវដាក់ពាក់ស្នើសុំអាជ្ញាប័ណ្ណទេសចរណ៍ថ្មី ដែលមានសុពលភាពរយៈពេល ១ ឆ្នាំគិតចាប់ពីថ្ងៃដាក់ពាក្យស្នើសុំបានពេញលេញ ស្របតាមបែបបទ និងនីតិវិធីស្នើសុំអាជ្ញាប័ណ្ណទេសចរណ៍ថ្មី។
លោក តុប សុភ័ក អ្នកនាំពាក្យក្រសួងទេសចរណ៍ប្រាប់ភ្នំពេញ-ប៉ុស្តិ៍នៅថ្ងៃទី ៤ ខែវិច្ឆិកាឆ្នាំ ២០២១ នេះ ឱ្យដឹងថា រដ្ឋមន្ត្រីក្រសួងទេសចរណ៍បានចេញសេចក្តីជូនដំណឹងមួយដល់អភិបាលរាជធានី-ខេត្តអំពីដាក់ឱ្យដំណើរការបៀរហ្គាដិននេះឡើងវិញ។
លោកបញ្ជាក់ថា៖ «ក្រសួងមិនទាន់ឱ្យបើកខារ៉ាអូខេ រង្គសាល និងឌីស្កូតេកទេ ក្រសួងឱ្យបើកតែបៀរហ្គាដិន ព្រោះមានលក្ខខណ្ឌខុសៗគ្នា»។
បើតាម លោក តុប សុភ័ក តួលេខបៀរហ្គាដិនដែលត្រូវបានចុះបញ្ជីត្រឹមត្រូវមានចំនួន ១៧៣ ទីតាំង និងមានអ្នកបម្រើការងារនៅក្នុងបៀរហ្គាដិននេះមានជាង ៣ ២០០ នាក់។
ទោះជាយ៉ាងណាក៏ដោយលោកថា មុននឹងអនុញ្ញាតឱ្យបើកដំណើការក៏ត្រូវមានការត្រួតពិនិត្យពីក្រសួងជំនាញ ក៏ដូចអាជ្ញាធរមូលដ្ឋានផ្ទាល់ដែរ ថាតើអាជីវកម្មបៀរហ្គាដិនទាំងនោះ អនុវត្តត្រឹមត្រូវតាមនីតិវិធីប្រតិបតិ្តស្តង់ដាអប្បបរមា (SOP) ដែរឬទេ?
លោកស្រី ពេញ សុចេតនា ម្ចាស់ហាងឫស្សីស្រស់ បៀរហ្គាដិន &ktv នៅទីក្រុងភ្នំពេញ ប្រាប់ ភ្នំពេញ ប៉ុស្តិ៍ថា លោកស្រីសម្រេចចិត្តមិនស្នើសុំបើកដំណើរការឡើងវិញទេ បើទោះបីក្រសួងអនុញ្ញាតឱ្យដំណើរការវិញក៏ដោយ ព្រោះរយៈពេលនៃការបិទជិត ២ ឆ្នាំនេះ លោកស្រី មិនទទួលបានចំណូលពីអាជីវកម្មនេះ និងមិនមានដើមទុនប្រកបអាជីវកម្មនេះបន្តឡើងវិញទេ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាឱ្យដឹងដែរថា បៀរហ្គាដិនគឺជាផ្នែកមួយនៃសេវាកម្សាន្តដែលនៅពាក់កណ្តាល សេវាកម្មម្ហូបអាហារ និងកម្សាន្ត ហើយនៅពេលដែលបើកដំណើរការឡើងវិញនេះ វាជួយសេដ្ឋកិច្ចបានច្រើនដោយផ្តល់ចំណូលប្រចាំខែដល់បុគ្គលិកកម្មករ និង ជួយជំរុញសេដ្ឋកិច្ចផ្នែកខ្លះទៀតទៅលើម្ហូបអាហារ និងភេសជ្ជៈ។
លោកបន្តថា មួយរយៈដែលរាជរដ្ឋាភិបាលបិទនេះបានធ្វើឱ្យមនុស្សជាច្រើនគ្មានការងារធ្វើ និងបាត់បង់ប្រាក់ចំណូលដល់មនុស្សជាច្រើន មិនត្រឹមតែអ្នកបម្រើសេវាកម្មម្ហូបអាហារ ប៉ុន្តែសូម្បីនារីដែលកំដរភ្ញៀវក៏បាត់ចំណូលច្រើនដែរ៕ LA
វីដេអូ៖
