ភ្នំពេញៈ ធនាគារហត្ថា របស់កម្ពុជាដែលជាបុត្រសម្ព័ន្ធធនាគារ Ayudhya ជាធនាគារពាណិជ្ជធំជាងគេទី ៥ នៅប្រទេសថៃបានជ្រើសរើសក្រុមហ៊ុន Temenos Infinity ដើម្បីរៀបចំកម្មវិធីផ្តល់កម្ចីបែបឌីជីថលសម្រាប់សហគ្រាសធុនតូច និងមធ្យម (SME) ដែលជាអតិថិជនរបស់ខ្លួន។
Temenos Infinity ដែលជាក្រុមហ៊ុនសូហ្វវែរធនាគារមានមូលដ្ឋាននៅស្វ៊ីស គឺជាថ្នាលធនាគារឌីជីថលលំដាប់លេខ ១ នៅលើពិភពលោក។
លោក ហួត អៀងតុង ប្រធាននាយកប្រតិបត្តិ ធនាគារ ហត្ថា បានឱ្យដឹងថា ជាមួយនឹងការសម្រេចចិត្តជ្រើសរើសនេះ ក្រុមហ៊ុន Temenos នឹងជួយធនាគារក្នុងការផ្តល់នូវសេវាកម្មកាន់តែប្រសើរជាមួយនឹងដំណោះស្រាយបច្ចេកវិទ្យាខ្ពស់សម្រាប់សហគ្រាសធុនតូច និងមធ្យមនៅកម្ពុជា។
លោកថ្លែងថា៖ «យើងមានសេចក្តីរីករាយក្នុងការចាប់ដៃគូជាមួយក្រុមហ៊ុន Temenos ខណៈយើងពង្រីកប្រតិបត្តិការបន្ថែម។ យើងនឹងផ្តល់សិទ្ធិដល់សហគ្រាសធុនតូច និងមធ្យមជាមួយនឹងសេវាកម្មធនាគារបែបឌីជីថលដែលមិនចាំបាច់មានការជួបផ្ទាល់។ ជាមួយគ្នានេះយើងនឹងកសាងអនាគតកាន់តែភ្លឺថ្លាសម្រាប់អតិថិជន និងប្រទេសជាតិ»។
លោក Jean-Paul Mergeai ប្រធានផ្នែកលក់អន្តរជាតិនៃក្រុមហ៊ុន Temenos ឱ្យដឹងថា ក្រុមហ៊ុនលោកនឹងនាំមកនូវបទពិសោធក្នុងស្រុកដ៏សម្បូរបែបដល់ភាពជាដៃគូនេះ ជាមួយនឹងខ្លោដឈានមុខគេលើទីផ្សារ ដែលនឹងបើកដំណើរការដោយកម្មវិធី API និង AI។
លោកលើកឡើងថា៖ «យើងមានមោទនភាពក្នុងការចាប់ដៃគូជាមួយធនាគារហត្ថាក្នុងបេសកកម្មដ៏សំខាន់មួយនេះ ដើម្បីធ្វើឱ្យធនាគារឌីជីថលកាន់តែប្រសើរឡើង និងមានលទ្ធភាពទទួលបានសេវាកម្មកាន់តែទូលំទូលាយសម្រាប់សហគ្រាសធុនតូច និងមធ្យមនៅកម្ពុជាក្នុងពេលវេលាដ៏មានសារៈសំខាន់នេះ។ ការរួមគ្នានេះនឹងកំណត់ស្តង់ដាថ្មីសម្រាប់សហគ្រាសធុនតូច និងមធ្យមនៅកម្ពុជា។
គិតត្រឹមចុងឆ្នាំ ២០១៩ មានសហគ្រាសធុនតូច និងមធ្យមដែលបានចុះបញ្ជីជាផ្លូវការនៅក្នុងព្រះរាជាណាចក្រកម្ពុជា ចំនួន ៥២ ១៥៤ ដោយមានបុគ្គលិកសរុបចំនួន ៨២៤ ២៤៥ នាក់។ នេះបើយោងតាមតួលេខចុងក្រោយបំផុតបានមកពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍៕ LA