.jpg)
កសិករលើកគ្រាប់ស្វាយចន្ទីបង្ហាញឱ្យឈ្មួញប្រមូលទិញមើលគុណភាព។ ហុង មិនា
ភ្នំពេញៈ ការនាំចេញគ្រាប់ស្វាយចន្ទីទៅទីផ្សារអន្តរជាតិ រយៈពេល ១០ ខែ ឆ្នាំ២០២១ សម្រេចបានជាង ៩១ ម៉ឺនតោន កើនឡើងជាង ៣៤៣ ភាគរយបើធៀបនឹងរយៈពេលដូចគ្នាឆ្នាំ ២០២០ ដោយក្នុងនោះទីផ្សារវៀតណាម គ្របដណ្តប់ស្ទើរទាំងស្រុង។ នេះបើយោងតាមក្រសួងកសិកម្ម។
បើយោងតាមប្រព័ន្ធទិន្នន័យគ្រឹះភូតគាមអនាម័យជាតិនៃក្រសួងកសិកម្មក្នុងរយៈពេល ១០ ខែ ឆ្នាំ ២០២១ កម្ពុជាបាននាំចេញគ្រាប់ស្វាយចន្ទីសរុប ៩១៤ ៧៩៥,៧២ តោន កើនឡើង ៣៤៣,១៧ ភាគរយបើធៀបនឹងរយៈពេលដូចគ្នាឆ្នាំ ២០២០។ ក្នុងនោះការនាំចេញទៅវៀតណាមមានចំនួន ៩០៦ ៦២០ តោន, ថៃ ៤ ០៨៥,៤០ តោន, ចិន ៣ ៨៩៦,៩៤ តោន, ឥណ្ឌា ៩៨,៦០ តោន, ជប៉ុន ៤៤,១៤ តោន, កូរ៉េ ១៦,៨៨ តោន, អារ៉ាប់ ១៤,៥១ តោន, ហូឡង់ ៨,២១ តោន, បង់ក្លាដែស ៧ តោន, ឡាវ ៤ តោន, ស្វ៊ីស ០,០២ តោន,តូហ្គោ ០,០១ តោន និងអារ៉ាប់រួម ០,០១ តោន។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ លោក ហេង ពិសិដ្ឋ បានប្រាប់ភ្នំពេញប៉ុស្តិ៍ក្នុងថ្ងៃទី ៤ ខែវិច្ឆិកាថា ទិន្នផល និងតម្លៃគ្រាប់ស្វាយចន្ទីនៅខេត្តត្បូងឃ្មុំក្នុងឆ្នាំនេះបានកើនឡើងតិចតួចបើធៀបឆ្នាំ ២០២០ ដោយគ្រាប់ស្វាយចន្ទីភាគច្រើនត្រូវឈ្មួញប្រមូលទិញទៅលក់បន្តនៅប្រទេសវៀតណាម ក្រៅពីនោះសម្រាប់កែច្នៃក្នុងស្រុក និងនាំចេញជាផលិតផលសម្រេច។
លោកថ្លែងថា៖ «ទោះបីមិនមានតួលេខនាំចេញជាក់ស្តែង ប៉ុន្តែខ្ញុំសង្កេតឃើញថា សកម្មភាពនាំចេញគ្រាប់ស្វាយចន្ទីតាមរយៈច្រកទ្វារព្រំដែនខេត្តត្បូងឃ្មុំក្នុងឆ្នាំនេះ ពិតជាមានចំនួនច្រើនជាងឆ្នាំមុន»។
បើតាមលោក ពិសិដ្ឋ ផ្ទៃដីដាំដុះស្វាយចន្ទីក្នុងខេត្តត្បូងឃ្មុំ នាឆ្នាំនេះមានទំហំប្រហាក់ប្រហែលឆ្នាំ ២០២០ គឺក្នុងរង្វង់ ៧ ០០០-៨ ០០០ ហិកតា។
ប្រធានមន្ទីរពាណិជ្ជកម្មខេត្តត្បូងឃ្មុំ លោក តូច សុខន បានប្រាប់ថា ដោយសាររដូវប្រមូលផលស្វាយចន្ទីបានកន្លងផុតទៅ ៥-៦ ខែមកហើយ ដូច្នេះការនាំចេញគ្រាប់ស្វាយចន្ទី មិនសូវមានទៀតទេនៅពេលនេះ ប៉ុន្តែសម្រាប់រយៈពេលកន្លងមកការនាំចេញគ្រាប់ស្វាយចន្ទីតាមច្រកព្រំដែនក្នុងខេត្តត្បូងឃ្មុំ គឺមានចំនួនច្រើនជាងឆ្នាំមុន។ លោកបន្ថែមទៀតថា អ្វីដែលគួរកត់សម្គាល់ឆ្នាំនេះ គឺទាំងបរិមាណនាំចេញ និងតម្លៃ គឺកើនឡើងដូចគ្នា។
លោកអះអាងថា៖ «គ្រាប់ស្វាយចន្ទីក្នុងឆ្នាំ ២០២១ មានតម្លៃពី ១ ៣០០-១ ៥០០ ដុល្លារក្នុង ១ តោន កើនឡើងតិចតួចធៀបនឹងឆ្នាំ ២០២០»។
បន្ថែមពីលើនេះ ម្ចាស់សិប្បកម្មកែច្នៃគ្រាប់ស្វាយចន្ទី ជ័យ សំបូរ លោកស្រី អ៊ិន ឡៃហ៊ួត ដែលសិប្បកម្មនេះមានទីផ្សារធំនៅប្រទេសជប៉ុនបាននិយាយថា ក្នុងឆ្នាំ ២០២១ តម្លៃគ្រាប់ស្វាយចន្ទីបានកើនឡើងតិចតួចធៀបឆ្នាំ ២០២០ ដោយនៅពេលប្រមូលផលដំបូងអំឡុងខែមីនា គ្រាប់ស្វាយចន្ទីមានតម្លៃជាមធ្យម ១ ៥០០ ដុល្លារក្នុង ១ តោន មុនពេលធ្លាក់មកនៅ ១ ២៥០ ដុល្លារក្នុងខែឧសភា។ លោកស្រីបន្តថា បច្ចុប្បន្នលោកស្រីប្រមូលទិញពីកសិករក្នុងតម្លៃជាមធ្យម ១ ៧០០ ដុល្លារក្នុង ១ តោន។
លោកស្រី ឡៃហ៊ួត អះអាងថា៖ «ផលិតផលគ្រាប់ស្វាយចន្ទីកំពុងមានទីផ្សារល្អ ជាក់ស្តែងសិប្បកម្មរបស់ខ្ញុំផលិតមិនទាន់តាមការបញ្ជាទិញទេនាពេលនេះ»។
បើតាមលោកស្រី ឡៃហ៊ួត ចាប់ពីដើមឆ្នាំ ២០២១ រហូតមកដល់ពេលនេះ សិប្បកម្មលោកស្រីទិញគ្រាប់ស្វាយចន្ទីពីកសិករជាង ២៥០ តោន។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បាននិយាយថា ផលិតផលគ្រាប់ស្វាយចន្ទីកម្ពុជាកំពុងក្លាយជាទំនិញយុទ្ធសាស្ត្រ បន្ទាប់ពីដំឡូងមី និងអង្ករ។ ក្រោយពីមើលឃើញសក្តានុពលដំណាំស្វាយចន្ទី បច្ចុប្បន្នមានវិនិយោគិនទាំងក្នុងស្រុក និងក្រៅស្រុកកាន់តែច្រើនបានងាកមកវិនិយោគលើដំណាំស្វាយចន្ទី ព្រមទាំងសិប្បកម្មកែច្នៃខ្នាតតូចៗ ដើម្បីបម្រើឱ្យការនាំចេញ។
ទោះយ៉ាងណា លោកប្រាប់ថា ការវិនិយោគលើស្វាយចន្ទីក៏កំពុងជួបនឹងបញ្ហាប្រឈមមួយចំនួនដូចជា អាកាសធាតុ ការកើនឡើងតម្លៃថ្នាំកសិកម្ម និងជីកសិកម្ម៕ LA
