ភ្នំពេញៈ កម្ពុជាបានបេ្តជ្ញានឹងពង្រឹងទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគ ជាមួយនឹងទីក្រុងហុងកុង ព្រមទាំងបានលើកទឹកចិត្តដល់សហគមន៍ធុរកិច្ចហុងកុង ក្នុងការចូលមកវិនិយោគលើវិស័យសំខាន់ៗ ដើម្បីស្តារកំណើនសេដ្ឋកិច្ចក្នុង និងក្រោយវិបត្តិជំងឺកូវីដ ១៩ ផងដែរ។
ការប្តេជ្ញានេះត្រូវបានលោក ពេជ ឫទ្ធី រដ្ឋលេខាធិការក្រសួងពាណិជ្ជកម្ម លើកឡើងនៅក្នុងកិច្ចពិភាក្សាស្តីពី «ភាពជាដៃគូរវាងកម្ពុជា-ហុងកុង លើការស្តារឡើងវិញក្នុងយុគសម័យក្រោយវិបត្តិកូវីដ ១៩» (Rebuilding in Post-epidemic Era: Hong Kong-Cambodia Partnership) ដែលរៀបចំនៅទីស្តីការក្រសួងពាណិជ្ជកម្ម តាមប្រព័ន្ធវីដេអូ កាលពីថ្ងៃទី ២ ខែវិច្ឆិកា ដោយមានការចូលរួមពីលោក Edward Yau រដ្ឋមន្ត្រីពាណិជ្ជកម្ម និងអភិវឌ្ឍន៍សេដ្ឋកិច្ចហុងកុង ប្រទេសចិន តំណាងក្រុមប្រឹក្សាអភិវឌ្ឍន៍កម្ពុជា (CDC) ព្រមទាំងតំណាងសហគ្រិនមកពីវិស័យឯកជនប្រមាណ ១៩០នាក់។
លោក ពេជ ឫទ្ធី បាននិយាយថា ក្រោមកិច្ចខិតខំប្រឹងប្រែងរបស់រាជរដ្ឋាភិបាលក្នុងការគ្រប់គ្រង និងទប់ស្កាត់ការរីករាលដាលជំងឺកូវីដ ១៩ ជាពិសេសយុទ្ធនាការចាក់វ៉ាក់សាំងជូនប្រជាពលរដ្ឋកម្ពុជា និងជនបរទេសគ្រប់រូប ប្រកបដោយជោគជ័យ ប្រទេសកម្ពុជាបាន និងកំពុងដាក់ចេញនូវគោលនយោបាយ និងយុទ្ធសាស្ត្រថ្មីៗជាបន្តបន្ទាប់ក្នុងការស្តារឡើងវិញនូវសេដ្ឋកិច្ចសង្គម រួមជាមួយការខិតខំប្រឹងប្រែងធ្វើឱ្យប្រសើរឡើងនូវបរិយាកាសវិនិយោគ និងធុរកិច្ចនៅកម្ពុជា។
លោកបន្ថែមទៀតថា កម្ពុជានឹងខិតខំជំរុញការធ្វើពាណិជ្ជកម្មជាមួយនឹងទីក្រុងហុងកុង តាមរយៈការបើកទីផ្សារវិនិយោគ និងធុរកិច្ច ដើម្បីពង្រឹងកិច្ចសហប្រតិបត្តិការ និងស្វែងរកឱកាសភាពជាដៃគូពាណិជ្ជកម្ម និងវិនិយោគរវាងកម្ពុជា និងហុងកុង ក្រោយវិបត្តិកូវីដ ១៩។
លោកថ្លែងថា៖ «កម្ពុជាបេ្តជ្ញាពង្រឹងទំនាក់ទំនងសេដ្ឋកិច្ច ពាណិជ្ជកម្ម វិនិយោគ ជាមួយហុងកុង តាមរយៈការលើកកម្ពស់ និងសម្រួលដល់សហគមន៍ធុរកិច្ច ព្រមទាំងបានលើកទឹកចិត្តដល់សហគមន៍ធុរកិច្ចរបស់ហុងកុង ក្នុងការចូលរួមវិនិយោគបន្ថែមទៀតលើវិស័យសំខាន់ៗ រួមមាន៖ បច្ចេកវិទ្យា និងនវានុវត្តន៍ ហេដ្ឋារចនាសម្ព័ន្ធសេដ្ឋកិច្ចឌីជីថល សុខុមាលភាពសាធារណៈ ក្នុងការជួយក្នុងតំបន់ដើម្បីសម្រេចបាននូវកំណើនប្រកបដោយបរិយាប័ន្ន»។
ទិន្នន័យក្រសួងពាណិជ្ជកម្ម បង្ហាញថា ការនាំចេញសរុបរបស់កម្ពុជាទៅទីក្រុងហុងកុង ក្នុងឆមាសទី១ ឆ្នាំ ២០២១ មានទឹកប្រាក់សរុប ១០,៤ លានដុល្លារ កើនឡើងពី ៥,៧ លានដុល្លារកាលពីឆមាសទី១ ឆ្នាំ ២០២០៕