ភ្នំពេញៈ ការនាំចេញ-នាំចូលទំនិញរវាងកម្ពុជា និងអាមេរិក នៅអំឡុងពេល ៣ ត្រីមាសដំបូងឆ្នាំ ២០២១ មានទឹកប្រាក់សរុបជាង ៦,៤ ពាន់លានដុល្លារ កើនឡើងជាង ២៨ ភាគរយ បើធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យពីការិយាល័យជំរឿនអាមេរិក។
ទិន្នន័យចេញផ្សាយកាលពីថ្ងៃទី ៤ ខែវិច្ឆិកា ឱ្យដឹងថា ចាប់ពីខែមករា ដល់ខែកញ្ញា ឆ្នាំ ២០២១ ការផ្លាស់ប្តូរពាណិជ្ជកម្មកម្ពុជា និងអាមេរិក មានទឹកប្រាស់សរុប ៦ ៤៧៩,៣ លានដុល្លារ កើនឡើង ២៨,៣៧ ភាគរយ ពីចំនួន ៥ ០៤៧,១ លានដុល្លារនារយៈពេលដូចគ្នាឆ្នាំ ២០២០។ ដោយក្នុងនោះការនាំទំនិញពីកម្ពុជាទៅអាមេរិក មានទឹកប្រាក់ ៦ ១៧៥,៨ លានដុល្លារ កើនឡើង ២៨,២៦ ភាគរយ ពីចំនួន ៤ ៨១៤,៩ លានដុល្លារ និងការនាំទំនិញពីអាមេរិកមកកម្ពុជា មានទឹកប្រាក់ ៣០៣,៥ លានដុល្លារ កើនឡើង ៣០,៧០ ភាគរយ ពីចំនួន ២៣២,២ លានដុល្លារ។
ផលិតផលដែលកម្ពុជានាំទៅទីផ្សារអាមេរិកភាគច្រើនជា សម្លៀកបំពាក់ ស្បែកជើង ផលិតផលធ្វើដំណើរ កង់ និងគ្រឿងបង្គុំអគ្គិសនី។ ដោយឡែកផលិតផលដែលអាមេរិកនាំមកកម្ពុជា មានដូចជា រថយន្ត គ្រឿងម៉ាស៊ីន និងឧបករណ៍អេឡិចត្រូនិក។
ក្នុងឆ្នាំ ២០២០ អាមេរិក គឺជាទីផ្សារនាំចេញទំនិញធំបំផុតរបស់កម្ពុជា ដែលតាមពីក្រោយដោយប្រទេសចិន ជប៉ុន ចក្រភពអង់គ្លេស កាណាដា និងប្រទេសកូរ៉េ។ នេះបើតាមក្រសួងពាណិជ្ជកម្មកម្ពុជា។
រដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្តិ នៅក្នុងជំនួបជាមួយគណៈប្រតិភូនៃក្រុមប្រឹក្សាធុរកិច្ចសហរដ្ឋអាមេរិក-អាស៊ាន (US-ASEAN Business Council) ដែលដឹកនាំដោយលោក Amb. Michalak អនុប្រធានជាន់ខ្ពស់ និងជានាយកគ្រប់គ្រងប្រចាំតំបន់ កាលពីថ្ងៃទី ១ ខែវិច្ឆិកា បានលើកឡើងថា កម្ពុជាមានសុទិដ្ឋិនិយមថា នឹងមានក្រុមហ៊ុនមកពីអាមេរិកកាន់តែច្រើនចូលមកវិនិយោគ និងពង្រីកអាជីវកម្មនៅកម្ពុជា។
ទំហំពាណិជ្ជកម្មសរុបរវាងកម្ពុជា និងអាមេរិក ក្នុងឆ្នាំ ២០២០ មានតម្លៃសរុប ៦ ៩២១,៣ លានដុល្លារ ឡើង ១៧,៨៩ ភាគរយ ធៀបនឹងឆ្នាំ ២០១៩។ ក្នុងនោះការនាំចេញរបស់កម្ពុជាមានតម្លៃ ៦ ៥៧៧,៧ លានដុល្លារ កើន ២២,៧៩ ភាគរយ ចំណែកការនាំពីអាមេរិកមកកម្ពុជាមានតម្លៃ ៣៤៣,៦ លានដុល្លារ ធ្លាក់ ៣៣,១៥ ភាគរយ ពីចំនួន ៥១៤ លានដុល្លារ។ នេះបើតាមការិយាល័យពាណិជ្ជកម្មអាមេរិក៕