ភ្នំពេញៈ ជាកិច្ចខិតខំប្រឹងប្រែង ដើម្បីឆ្លើយតបនឹងតម្រូវការការប្រើប្រាស់បច្ចេកវិទ្យាក្នុងការស្តារ និងលើកស្ទួយវិស័យទេសចរណ៍ ក្រសួងទេសចរណ៍នឹងដាក់ឱ្យអនុវត្តនូវ «កម្មវិធីបណ្តុះបណ្តាលអក្ខរកម្មឌីជីថលក្នុងវិស័យទេសចរណ៍កម្ពុជា» នៅថ្ងៃទី ១០ ខែវិច្ឆិកា ឆ្នាំ ២០២១ ខាងមុខ។
សេចក្តីប្រកាសព័ត៌មានពីក្រសួងទេសចរណ៍ ឱ្យដឹងថា កម្មវិធីនេះនឹងធ្វើឡើងក្រោមកិច្ចសហការវាងក្រសួងទេសចរណ៍ សហភាពសហព័ន្ធយុវជនកម្ពុជា និងមជ្ឈមណ្ឌលកម្ពុជា។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជានិយាយថា ការដាក់ឱ្យដំណើរការ «កម្មវិធីបណ្តុះបណ្តាលអក្ខរកម្មឌីជីថលក្នុងវិស័យទេសចរណ៍កម្ពុជា» នឹងចូលរួមចំណែកយ៉ាងសំខាន់ក្នុងការជួយស្តារវិស័យទេសចរណ៍កម្ពុជាទាំងក្នុង និងក្រោយវិបត្តិជំងឺកូវីដ ១៩ ឱ្យដើរលឿនទៅមុខ។
លោកស្រីបានពន្យល់ថា វិស័យទេសចរណ៍ត្រូវការជាចាំបាច់ និងដើរឱ្យទាន់សភាពការណ៍ (ឧស្សាហកម្ម ៤.០) ព្រោះក្នុងបរិបទនេះ ភ្ញៀវទេសចរមិនអាចធ្វើដំណើរទៅណាបានឆ្ងាយឡើយ ពិសេសការធ្វើទំនាក់ទំនងភ្ញៀវតាមបណ្តាញឌីជីថល គឺមានសារៈសំខាន់ណាស់ ព្រោះអាចធ្វើបច្ចុប្បន្នភាពផលិតផលទេសចរណ៍ ក៏ដូចជាការដាក់កញ្ចប់តម្លៃនឹងផ្សព្វផ្សាយនានាចំណាយពេលតិច និងទៅដល់ដៃអតិថិជន។
លោកស្រីបានថ្លែងថា៖ «បើអត់ប្រើឌីជីថល ទម្រាំលក់បាន ១ កញ្ចប់ គឺទាមទារឱ្យមានការបកស្រាយជាច្រើន ប៉ុន្តែបើតាមរយៈឌីជីថលគឺយើងធ្វើក្នុងរយៈពេលខ្លី ដោយយើងអាចផ្ញើព័ត៌មានទៅភ្ញៀវ និងទូលំទូលាយទាំងការផ្សព្វផ្សាយ និងចាប់យកភ្ញៀវដោយមិនឱ្យភ្ញៀវមានការសង្ស័យព្រោះគាត់ទទួលបានព័ត៌មានជុំជិត»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា ប្រាប់ថា ក្រសួងទេសចរណ៍បានធ្វើកិច្ចការទាក់ទងនឹងឧស្សាហកម្ម ៤.០ នេះជាមួយនឹងវិស័យឯកជនជាយូរមកហើយ ព្រោះវិស័យនេះត្រូវគេយល់ថា នឹងរួមចំណែកទាក់ទាញទេសចរណ៍ និងសម្រួលដល់ភ្ញៀវដែលមកលេងកម្សាន្តនៅកម្ពុជា។
លោកបន្តថា ការដាក់ឱ្យអនុវត្តកម្មវិធីនេះ គឺដើម្បីធ្វើយ៉ាងណាដើរឱ្យទាន់សភាពការណ៍សកល ព្រោះកម្មវិធីនេះនឹងជួយលើសេវាកម្មទំនាក់ទំនងភ្ញៀវពាក់ព័ន្ធនឹងការកក់សំបុត្រ និងសណ្ឋាគារជាដើម។
បើតាម លោក ស៊ីណាន សម័យនេះជាសម័យបច្ចេកវិទ្យាគេលែងសូវប្រើទូរស័ព្ទសម្រាប់ «ខល» ហើយ គឺគេប្រើបណ្តាញទំនាក់ទំនងដែលវានឹងជួយជំរុញឱ្យមានការរីកចម្រើនទាំងផ្នែកសេវាកម្ម និងប្រតិបត្តិការនានានៅក្នុងវិស័យទេសចរណ៍។ ម្យ៉ាងទៀតវានឹងជួយសម្រួលកាត់បន្ថយការចំណាយទៅលើការធ្វើទីផ្សារនៅក្នុងវិស័យ ផ្នែកនេះបានមួយកម្រិតទៀតផង។
បើយោងតាមអង្គការ UNESCO «អក្ខរកម្មឌីជីថល» សំដៅដល់សមត្ថភាពក្នុងការប្រើប្រាស់បច្ចេកវិទ្យា និងឧបករណ៍ឌីជីថលដើម្បីស្វែងរក ប្រើប្រាស់ គ្រប់គ្រង វាយតម្លៃ បង្កើត និងចែករំលែកព័ត៌មានដោយសុវត្ថិភាព និងមានភាពត្រឹមត្រូវដែលទាមទារទាំងជំនាញបច្ចេកទេស និងការយល់ដឹងសំដៅធ្វើឱ្យសកម្មភាពសេដ្ឋកិច្ចសង្គមកាន់តែប្រសើរ៕ LA