ភ្នំពេញៈ ប្រធានសហព័ន្ធម្រេច និងគ្រឿងទេសកម្ពុជារំពឹងថា នៅឆ្នាំ ២០២២ ខាងមុខតម្លៃម្រេចនាំចេញរបស់កម្ពុជានឹងកើនដល់ ២០ ០០០ រៀលក្នុង ១ គីឡូក្រាមដែលតម្លៃនេះអាចធ្វើឱ្យកសិករមានទឹកចិត្តក្នុងការដាំដុះ និងមើលថែទាំម្រេចឡើងវិញ។
លោក ម៉ាក នី ប្រធានសហព័ន្ធម្រេច និងគ្រឿងទេសកម្ពុជាបានប្រាប់ភ្នំពេញប៉ុស្តិ៍នៅថ្ងៃទី ៨ ខែវិច្ឆិកាថា មូលហេតុដែលនឹងជំរុញឱ្យតម្លៃម្រេចនាំចេញទៅទីផ្សារអន្តរជាតិកើនឡើងនៅពេលខាងមុខ គឺដោយសារប្រជាកសិករមួយចំនួនបានបោះបង់ចោលការដាំម្រេចកាលពីអំឡុងពេលដែលតម្លៃម្រេចធ្លាក់ចុះ។ ការបោះបង់ការដាំដុះបានធ្វើឱ្យស្តុកម្រេចធ្លាក់ចុះជាបន្តបន្ទាប់ ជាហេតុធ្វើឱ្យក្រុមឈ្មួញជួបការពិបាកនៅក្នុងការប្រមូលទិញម្រេចយកទៅផ្គត់ផ្គង់ទីផ្សារនាំចេញ។ លោកបន្តថា ទោះបីជាយ៉ាងណា ដោយសង្កេតឃើញម្រេចចាប់ផ្តើមមានទីផ្សារ ធ្វើឱ្យកសិករដែលធ្លាប់បោះបង់ចោលមួយចំនួនបានងាកមកថែទាំ និងដាំដុះម្រេចឡើងវិញ។
លោកថ្លែងថា៖ «ទិនុ្នផល និងតម្លៃម្រេចនៅឆ្នាំក្រោយអាចនឹងប្រមូលបានច្រើនជាងឆ្នាំនេះ ព្រោះនៅពេលតម្លៃកើនឡើង វាក៏បានជំរុញឱ្យកសិករចាប់ផ្តើមថែទាំឡើងវិញ»។
លោក ម៉ាក នី ឱ្យដឹងទៀតថា ម្រេចនាំចេញទៅទីផ្សារអន្តរជាតិកាលពីឆ្នាំ ២០១៩ មានតម្លៃជាមធ្យមពី ៦ ០០០ ទៅ ៩ ០០០ រៀល ក្នុង ១ គីឡូក្រាម និងក្នុងឆ្នាំ ២០២០ តម្លៃកើនពី ៩ ០០០ ទៅ ១២ ០០០ រៀល ក្នុង ១ គីឡូក្រាម។ ដោយឡែកនៅឆ្នាំ ២០២១ ម្រេចមានតម្លៃចន្លោះពី ១២ ០០០ ដល់ ១៧ ០០០ រៀល និងរំពឹងថា នៅឆ្នាំ ២០២២ ខាងមុខតម្លៃម្រេចនឹងកើនដល់ ២០ ០០០ រៀល ក្នុង ១ គីឡូក្រាម។
ទោះយ៉ាងណាលោកអះអាងថា៖ «ក្នុងមួយរយៈចុងក្រោយនេះ ខ្ញុំមើលឃើញថា នៅពេលម្រេចមានតម្លៃពី ១៤ ០០០ ទៅ ១៧ ០០០ រៀលកសិករនាំគ្នាចាប់ផ្តើមនាំគ្នាថែរក្សាដើមម្រេចឡើងវិញ។ អ៊ីចឹងខ្ញុំរំពឹងថា ទិន្នផលនឹងកើនខ្ពស់នៅឆ្នាំ ២០២២ ខណៈតម្លៃនឹងអាចឡើងដល់ ២០ ០០០រៀល ក្នុង ១ គីឡូក្រាម»។
បើតាមលោក ម៉ាក់ នី ក្នុងមួយឆ្នាំៗ កម្ពុជាបាននាំចេញម្រេចទៅទីផ្សារក្រៅប្រទេសក្នុងរង្វង់ជិត ២០ ០០០ តោនដែលភាគច្រើនគឺនាំចេញទៅប្រទេសវៀតណាម ចន្លោះពី ៧០-៨០ ភាគរយ ក្រៅពីនោះនាំចេញទៅទីផ្សារអឺរ៉ុប និងប្រើប្រាស់ក្នុងស្រុកមានប្រមាណ ១ ០០០ តោនក្នុង ១ ឆ្នាំ។
លោក ពោន ប៉ែន កសិករដាំម្រេចនៅលើផ្ទៃដី ៥ ហិកតានៅខេត្តកំពង់ធំ និយាយថា ទីផ្សារម្រេចនាពេលបច្ចុប្បន្នមានតម្លៃប្រមាណ ១៦ ០០០ រៀល ក្នុង ១ គីឡូក្រាម ខណៈកាលពីឆ្នាំ ២០២០ បានត្រឹមតែ ៦ ០០០ រៀលប៉ុណ្ណោះ។
ទោះជាយ៉ាងណា លោកបន្តថា កសិករមួយចំនួននៅពេលម្រេចធ្លាក់ថ្លៃបាននាំគ្នាបោះបង់ចោលការដាំដុះ និងថែទាំដែលបណ្តាលឱ្យងាប់ដើមអស់ជាច្រើន។ លោកបន្តថា កសិករនឹងរីករាយបើម្រេចនាំចេញមានតម្លៃ ២០ ០០០ រៀល ក្នុង ១ គីឡូក្រាម ប៉ុន្តែមិនទាន់គ្រប់គ្រាន់ទៅលើការចំណាយថែទាំ និងដាំដុះទេ ដោយយ៉ាងហោចណាស់ កើនដល់ចន្លោះពី ២០ ០០០ ទៅ ២៥ ០០០ រៀលក្នុង ១ គីឡូក្រាម ទើបធ្វើឱ្យកសិករទទួលបានចំណូលសមរម្យ។
លោកថ្លែងថា៖ «វាកើនតម្លៃមែនហើយ ប៉ុន្តែតម្លៃពលកម្ម និងការចំណាយផ្សេងៗលើការថែទាំក៏មានខ្ពស់ដែរ។ តម្លៃនេះ មិនទាន់ឆ្លើយតបទេអ៊ីចឹងកុំឱ្យតែចុះទៅវិញទៅបានហើយ។ រក្សាប៉ុណ្ណឹងបានហើយ។ ប្រសិនបើចង់ឱ្យប្រជាកសិករបានរស់ស្រួល និងបន្តដាំដុះម្រេចទៀត នោះតម្លៃចាប់ពី ២០ ០០០ រៀលឡើងទៅជាការល្អ»៕ LA