.jpg)
ផ្ទាំងបន្ទះសូឡានៅស្ថានីយ ១ កន្លែងក្នុងខេត្តកំពត។ ហេង ជីវ័ន
ភ្នំពេញៈ ក្រុមហ៊ុន B.Grimm Power Plc (BGRIM) ដែលមានមូលដ្ឋាននៅទីក្រុងបាងកកបានទទួលមូលនិធិថ្មី ២៨,១ លានដុល្លារ ដើម្បីជំរុញគម្រោងថាមពលសូឡារបស់ពួកគេនៅក្នុងប្រទេសកម្ពុជា។
កាលពីខែវិច្ឆិកា ឆ្នាំ ២០១៩ ក្រុមហ៊ុន BGRIM បានចុះកិច្ចព្រមព្រៀងទិញភាគហ៊ុនជាមួយលោក Pramote Laocharoenwong ដើម្បីទិញភាគហ៊ុនទាំងអស់របស់ក្រុមហ៊ុន Ray Power Supply Co Ltd នៅកម្ពុជាក្នុងតម្លៃ ៣០០ ០០០ ដុល្លារ។ កាសែត Bangkok Post បានរាយការណ៍កាលពីថ្ងៃទី ៦ ខែវិច្ឆិកាថា ក្រុមហ៊ុន BGRIM ទទួលបានឥណទានរួម ២៨,១ លានដុល្លារ (៩៣៨ លានបាត) ពីធនាគារធំៗ ៣ របស់ប្រទេសថៃ ដើម្បីផ្តល់ហិរញ្ញប្បទានលើគម្រោងថាមពលសូឡារបស់ខ្លួននៅក្នុងប្រទេសកម្ពុជា។
ស្ថិតក្រោមកិច្ចព្រមព្រៀងរយៈពេល ១៥ ឆ្នាំដែលចុះហត្ថលេខាកាលពីថ្ងៃទី ២៨ ខែតុលា ធនាគារកសិករ (KBank) ធនាគារនីហរ័ណអាហរ័ណរបស់ប្រទេសថៃ (Exim Thailand) និងធនាគារបាងកក (Bangkok Bank) បានផ្តល់មូលនិធិឱ្យ Ray Power Supply Co (RPS) ដែលជាក្រុមហ៊ុនបុត្រសម្ព័ន្ធគ្រប់គ្រងទាំងស្រុងដោយក្រុមហ៊ុន B.Grimm Solar Power 1 Co។
ក្រុមហ៊ុន RPS ប្រតិបត្តិការរោងចក្រផលិតថាមពលសូឡាទំហំ ៣៩ មេហ្គាវ៉ាត់នៅខេត្តបន្ទាយមានជ័យដែលបានដំណើរការកាលពីខែធ្នូ ឆ្នាំមុន។
ប្រធាន BGRIM លោក Harald Link ដែលត្រូវបានដកស្រង់សម្តីដោយកាសែត Bangkok Post បានលើកឡើងថា៖ «ប្រាក់កម្ចីនេះគឺជាការបោះឆ្នោតផ្តល់ទំនុកចិត្តដោយស្ថាប័នហិរញ្ញវត្ថុឈានមុខគេរបស់ថៃដល់ក្រុមហ៊ុន BGRIM នៅពេលដែលការរៃអង្គាសប្រាក់ជាទូទៅត្រូវបានរំខានយ៉ាងខ្លាំងដោយផលប៉ះពាល់ពីជំងឺកូវីដ ១៩»។
លោកថ្លែងថា៖ «រោងចក្រថាមពលសូឡារបស់ក្រុមហ៊ុន RPS ត្រូវបានចាត់ទុកថា ជាជោគជ័យមួយសម្រាប់ការបញ្ចប់តាមការគ្រោងទុក ចំពេលមានការរឹតបន្តឹងជាច្រើន រួមទាំងផលប៉ះពាល់នៃជំងឺកូវីដ ១៩ និងទឹកជំនន់ធ្ងន់ធ្ងរនៅក្នុងតំបន់សំណង់មួយនេះពេញ ១ ឆ្នាំ ២០២០»។
យោងតាមរបាយការណ៍ពី Bangkok Post រោងចក្រនេះបានចាប់ផ្តើមផ្គត់ផ្គង់បណ្តាញអគ្គិសនីដល់អគ្គិសនីកម្ពុជា (EDC) កាលពីថ្ងៃទី ១៥ ខែធ្នូ ឆ្នាំ ២០២០ ក្រោមកិច្ចព្រមព្រៀងរយៈពេល ២០ ឆ្នាំ។
លោក Tipakorn Saiphatana អនុប្រធានប្រតិបត្តិនៃធនាគារកសិករ បានឱ្យដឹងថា ប្រាក់កម្ចីដល់ក្រុមហ៊ុន RPS គឺស្របតាមគោលនយោបាយរបស់ធនាគារក្នុងការលើកកម្ពស់ការវិនិយោគសម្រាប់និរន្តរភាព និងគាំទ្រការផ្លាស់ប្តូររបស់អតិថិជនទៅរកសេដ្ឋកិច្ចគ្មានការបំភាយឧស្ម័ន។
លោកថ្លែងថា៖ «ធនាគារកសិករជឿថា គម្រោងនេះនឹងដើរតួសំខាន់ក្នុងការរួមចំណែកដល់ការអភិវឌ្ឍសេវាកម្ម និងឧបករណ៍ប្រើប្រាស់អគ្គិសនីប្រកបដោយប្រសិទ្ធភាព និងគួរឱ្យទុកចិត្ត ដែលជាមូលដ្ឋានគ្រឹះដ៏សំខាន់សម្រាប់កំណើនសេដ្ឋកិច្ចប្រទេសកម្ពុជា»។
លោក Niraman Laisatit អនុប្រធានប្រតិបត្តិជាន់ខ្ពស់ទទួលបន្ទុកផ្នែកធនាគារសាជីវកម្មនៅធនាគារបាងកក បានកត់សម្គាល់ថា ធនាគារបានគាំទ្រក្រុមហ៊ុន BGRIM រួចហើយក្នុងការអភិវឌ្ឍគម្រោងផ្សេងៗទាំងក្នុងប្រទេស និងក្រៅប្រទេស ក្នុងរយៈពេលជាង ២៦ ឆ្នាំមកហើយ ដោយចាប់ផ្តើមជាមួយផែនការ Amata B. Grimm Power 1 កាលពីឆ្នាំ ១៩៩៥៕ LA
