ភ្នំពេញៈ រយៈពេល ១ សប្តាហ៍បន្ទាប់ពីរដ្ឋាភិបាលប្រកាសបើកប្រទេសលើវិស័យខ្លះឡើងវិញ ចំនួនភ្ញៀវទេសចរដើរកម្សាន្តក្នុងប្រទេសមានចំនួនជាង ១៧ ម៉ឺននាក់។ នេះបើតាមទិន្នន័យពីក្រសួងទេសចរណ៍។
ទិន្នន័យរបស់ក្រសួងទេសចរណ៍បានបង្ហាញថា ចរន្តភ្ញៀវទេសចរចេញដើរកម្សាន្តនៅទូទាំងប្រទេសបានបន្តកើនឡើងជាបន្តបន្ទាប់ ដោយចាប់ពីថ្ងៃទី ៦-៧ ខែវិច្ឆិកា ឆ្នាំ ២០២១ ភ្ញៀវទេសចរដើរកម្សាន្តក្នុងប្រទេសមានសរុប ១៧៤ ៥៤៣ នាក់ ក្នុងនោះភ្ញៀវទេសចរជាតិ ចំនួន ១៦៩ ៥៣២ នាក់ និងភ្ញៀវបរទេសផ្ទៃក្នុងមានចំនួន ៥ ០១១ នាក់។
យោងតាមតារាងទិន្នន័យគោលដៅសំខាន់ៗដែលទទួលភ្ញៀវទេសចរផ្ទៃក្នុងសប្តាហ៍ទី ១ ខែវិច្ឆិកា រួមមាន ខេត្តព្រះសីហនុ មានភ្ញៀវ ៣៧ ៦៤១ នាក់, រាជធានីភ្នំពេញ ៣៥ ២១០ នាក់,ខេត្តកំពត ១៦ ៥០១ នាក់, ខេត្តសៀមរាប ១៥ ១០០ នាក់ និងខេត្តពោធិ៍សាត់ ១០ ៤៤៧ នាក់។
រដ្ឋមន្ត្រីក្រសួងទេសចរណ៍ លោក ថោង ខុន បានលើកឡើងថា ទោះបីពុំមានថ្ងៃឈប់សម្រាកជាបុណ្យជាតិ ប៉ុន្តែចរន្តភ្ញៀវទេសចរផ្ទៃក្នុងនៅតែមានភាពសកម្មនៅរៀងរាល់ចុងសប្តាហ៍។ លោកថ្លែងថា៖ «រមណីយដ្ឋានទេសចរណ៍ និងគោលដៅទេសចរណ៍នៅទូទាំងប្រទេសបានបើកដំណើរការទទួលភ្ញៀវទេសចរ ខណៈមូលដ្ឋានអាជីវកម្មទេសចរណ៍ដែលបានផ្អាកសកម្មភាពកន្លងមក ក៏បានរៀបចំទទួលភ្ញៀវទេសចរ ក៏ដូចជាត្រៀមខ្លួនទទួលភ្ញៀវទេសចរនាពេលថ្ងៃឈប់សម្រាកព្រះរាជពិធីបុណ្យអុំទូកខាងមុខផងដែរ»។
បន្ថែមពីលើនេះ លោកប្រាប់ទៀតថា ចំពោះការទប់ស្កាត់ការរីករាលដាលជំងឺកូវីដ ១៩ គឺលោកសង្កេតឃើញថា ទាំងម្ចាស់មូលដ្ឋានអាជីវកម្ម និងភ្ញៀវទេសចរ គឺមានការយល់ដឹងកាន់តែប្រសើរ និងបានចូលរួមអនុវត្តវិធានការនានាកាន់តែសកម្ម ពិសេសវិធានការ «៣កុំ និង ៣ការពារ» ស្របពេលដែលរដ្ឋបាលរាជធានី-ខេត្ត និងមន្ទីរទេសចរណ៍បានបន្តជំរុញការអនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) ឱ្យបានគ្រប់មូលដ្ឋានអាជីវកម្ម។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានប្រាប់ ភ្នំពេញ ប៉ុស្តិ៍ថា ផ្នែកឯកជនបានត្រៀមខ្លួនរួចហើយទាំងធនធានមនុស្សក្នុងវិស័យទេសចរណ៍ ផលិតផលក្នុងវិស័យទេសចរណ៍ និងទីតាំងកម្សាន្តដែលអនុវត្តតាមវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP)។
លោកស្រីបន្ថែមថា ចាប់ផ្តើមពីអ្នកទេសចរក្នុងស្រុកគេសង្កេតឃើញថា វិស័យនេះចាប់ផ្តើមមានចលនាឡើងវិញហើយ បន្ទាប់ពីធ្លាក់ចុះយ៉ាងគំហុកដែលបណ្តាលមកពីជំងឺកូវីដ ១៩។
លោកស្រីអះអាងថា៖ «កំណើននេះនឹងបង្កើនភាពវិជ្ជមានបន្ថែមទៀត ខណៈរដ្ឋាភិបាលកម្ពុជាបានបើកសេដ្ឋកិច្ចឡើងវិញស្ទើរទាំងស្រុងទៅហើយនៅពេលនេះ»។
លោកស្រីប្រាប់ទៀតថា កំណើនសកម្មភាពទេសចរផ្ទៃក្នុងនឹងមានសម្ទុះកាន់តែខ្លាំងថែមទៀតនៅពេលដែលកម្ពុជាបើកទទួលភ្ញៀវទេសចរបរទេសចាក់វ៉ាក់សាំងឡើងវិញ។
ប្រទេសកម្ពុជាបានប្រកាសពីផែនការចាប់ផ្តើមបើកទទួលភ្ញៀវទេសចរបរទេសចាក់វ៉ាក់សាំងរួចរាល់ចាប់ពីចុងខែវិច្ឆិកានេះតទៅ។
ក្នុងរយៈពេល ៧ ខែនៃឆ្នាំ ២០២១ ភ្ញៀវទេសចរបរទេសធ្វើដំណើរមកកម្ពុជាមានចំនួន ១១២ ៥៤៤ នាក់ ធ្លាក់ចុះ ៩០,៦ ភាគរយធៀបនឹងរយៈពេលដូចគ្នាឆ្នាំ ២០២០។ នេះបើតាមទិន្នន័យក្រសួងទេសចរណ៍៕ LA