.jpg)
ទីតាំងនៃគម្រោងសាងសង់ច្រកព្រំដែនស្ទឹងបត់។ ក្រសួងសាធារណការ
ភ្នំពេញៈ កម្ពុជារំពឹងថា ផែនការបំពាក់គ្រឿងបរិក្ខារសម្រាប់ត្រួតពិនិត្យទំនិញដោយកាំរស្មីអ៊ិចនៅច្រកទ្វារអន្តរជាតិស្ទឹងបត់ នឹងជួយជំរុញឱ្យការធ្វើពាណិជ្ជកម្មនាំចេញ នាំចូលរវាងប្រទេសកម្ពុជា-ថៃ កាន់តែមានកំណើនបន្ថែមទៀត។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ ភ្នំពេញ ប៉ុស្តិ៍ នៅថ្ងៃទី ៩ ខែវិច្ឆិកាថា គ្រឿងម៉ាស៊ីនត្រួតពិនិត្យកាំរស្មីអ៊ិចនឹងត្រូវដាក់នៅរបងច្រកព្រំដែន និងមួយទៀតដាក់នៅកន្លែងគយ ដើម្បីធ្វើការត្រួតពិនិត្យទំនិញចេញចូលនៅច្រកទ្វារអន្តរជាតិស្ទឹងបត់។
លោកបានបន្តថា ការបំពាក់គ្រឿងម៉ាស៊ីនបរិក្ខារត្រួតពិនិត្យកាំរស្មីអ៊ិច គឺដើម្បីឱ្យមានសុវត្ថិភាពទំនិញ និងស្វែងរកទំនិញដែលខុសច្បាប់ឱ្យបានលឿន ខណៈស្ទឹងបត់ គឺជាច្រកអន្តរជាតិសម្រាប់ធ្វើពាណិជ្ជកម្មជាមួយប្រទេសថៃ។
លោកថ្លែងថា៖ «វាលឿននៅក្នុងការឆែករកទំនិញខុសច្បាប់ ប៉ុន្តែអ្វីដែលសំខាន់គឺ X-RAY អាចធ្វើឱ្យមានសុខសុវត្ថិភាព ក្នុងការដឹកទំនិញរវាងប្រទេសទាំង ២។ នេះគឺជាជំហានទី ២ ប៉ុណ្ណោះ ដោយជំហានទី ១ យើងកំពុងសាងសង់អគារជាមុនសិន»។
ប្រធានសមាគមភ័ស្តុភារកម្មកម្ពុជា លោក ស៊ិន ចន្ធី បាននិយាយថា គម្រោងបំពាក់ X-RAY នៅច្រកទ្វារអន្តរជាតិស្ទឹងបត់នេះទទួលបានផលចំណេញច្រើនទាំងពេលវេលា និងការធ្វើអនុលោមភាពលើកិច្ចសម្របសម្រួលពាណិជ្ជកម្ម ព្រោះការប្រើមនុស្សទៅបើកកុងតឺន័រ និងពិនិត្យដោយភ្នែក គឺមិនអាចកំណត់ពេលវេលា និងគ្រប់គ្រងលំហូរពាណិជ្ជកម្មបានល្អទេ។
លោកបន្តថា បើពិនិត្យដោយភ្នែកពីសំណាក់មន្ត្រីគយប្រចាំការនៅច្រកព្រំដែនអន្តរជាតិ វាក៏មិនអនុលោមភាពទៅលើការធ្វើពាណិជ្ជកម្មអន្តរជាតិដែរ ប៉ុន្តែបើប្រើប្រាស់បំពាក់បរិក្ខារម៉ាស៊ីនត្រួតពិនិត្យបែបនេះ គឺអាចកំណត់ពេលវេលាបាន និងធ្វើឱ្យលំហូរនៃការដឹកជញ្ជូនទំនិញមានល្បឿនលឿន មិនកកស្ទះជាពិសេសវាស្របតាមការធ្វើពាណិជ្ជកម្មអន្តរជាតិ។
លោកថ្លែងថា៖ «ខ្ញុំគិតថានេះជាការល្អ ដែលមាននីតិវិធីត្រួតពិនិត្យដោយស្វ័យប្រវត្តិ វានឹងមានប្រសិទ្ធភាព ហើយចំណេញពេលជាងការប្រើប្រាស់ដោយផ្ទាល់ភ្នែក ឬផ្ទាល់ដៃ។ ខ្ញុំសូមគាំទ្រចំពោះយន្តការនេះ»។
ទោះជាយ៉ាងណា លោក ចន្ធី អះអាងថា លោកក៏កំពុងរង់ចាំមើលការដាក់តម្លៃត្រួតពិនិត្យសិន ព្រោះបើខ្ពស់ពេកគេនឹងមិនដឹកតាមច្រកនេះទេ។
ទីភ្នាក់ងារសហប្រតិបត្តិការអភិវឌ្ឍន៍សេដ្ឋកិច្ចប្រទេសជិតខាង (NEDA) សហការជាមួយនឹងក្រសួងសាធារណការ និងដឹកជញ្ជូនកម្ពុជា និងភាគីពាក់ព័ន្ធកាលពីថ្ងៃទី ៨ ខែវិច្ឆិកា បានពិភាក្សាគ្នាលើការប្រើបច្ចេកវិទ្យាត្រួតពិនិត្យយានយន្តដឹកជញ្ជូនទំនិញឆ្លងកាត់ព្រំដែន ជាពិសេសគម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ ៥។
គម្រោងនេះនឹងមានបំពាក់គ្រឿងម៉ាស៊ីនបរិក្ខារត្រួតពិនិត្យ X-RAY ដែលតម្រូវឱ្យអាជ្ញាធរគយកម្ពុជា និងថៃប្រើប្រាស់គ្រឿងម៉ាស៊ីនបរិក្ខារស្កេនទំនិញឱ្យមានលក្ខណៈបច្ចេកទេស និងស្តង់ដាដូចគ្នា ដើម្បីធានាឱ្យប្រតិបត្តិការត្រួតពិនិត្យយានយន្តដឹកជញ្ជូនទំនិញឆ្លងកាត់ព្រំដែនប្រទេសទាំង ២ ដំណើរការទៅដោយរលូន ឆាប់រហ័ស និងប្រកបដោយប្រសិទ្ធភាព។
ក្នុងកិច្ចពិភាក្សានេះ លោក យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូនបានជំរុញលើកទឹកចិត្តឱ្យភាគីពាក់ព័ន្ធ ពិសេសអាជ្ញាធរគយកម្ពុជា និងអាជ្ញាធរគយថៃសហការគ្នាឱ្យបានជិតស្និទ្ធដើម្បីធានាថា ការបំពាក់គ្រឿងម៉ាស៊ីនបរិក្ខារស្កេនទំនិញនៅច្រកទ្វារអន្តរជាតិស្ទឹងបត់ឱ្យមានបច្ចេកទេស និងស្តង់ដាតែមួយដើម្បីកុំឱ្យការត្រួតពិនិត្យទំនិញឆ្លងកាត់ព្រំដែនមានភាពយឺតយ៉ាវ និងភាពស្មុគស្មាញ។
ការដោះដូរពាណិជ្ជកម្មទ្វេភាគីកម្ពុជា និងថៃរយៈពេល ៩ ខែ ដើមឆ្នាំ ២០២១ មានទឹកប្រាក់សរុប ៥,៩៧ ពាន់លានដុល្លារកើន ១៨ ភាគរយធៀបនឹងរយៈពេលដូចគ្នាឆ្នាំ ២០២០ ដែលមានទឹកប្រាក់ ៥,០៨ ពាន់លានដុល្លារ។ នេះបើតាមស្ថានទូតកម្ពុជានៅប្រទេសថៃ៕ LA
