.jpg)
ពន្លាជាតិទម្រង់ 3D ដែលត្រូវបានដាក់បង្ហាញក្នុងពិព័រណ៍ទំនិញនៅចិន។ រូបថត សហការី
ភ្នំពេញៈ ប្រទេសកម្ពុជា បានរចនាពន្លាជាតិតាមទម្រង់ 3D បានដាក់តាំងបង្ហាញផលិតផលសក្តានុពល រូបភាពស្តីពីវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ និងវីដេអូផ្សព្វផ្សាយក្នុងពិធីសម្ពោធ «ពិព័រណ៍ទំនិញនាំចូលអន្តរជាតិចិន លើកទី ៤ (The 4th China International Import Expo) និងវេទិកាសេដ្ឋកិច្ចអន្តរជាតិ ហុងឈាវ (Hongqiao International Economic Forum)» ដែលរៀបចំនៅក្រុងសៀងហៃ ប្រទេសចិន ដើម្បីទាក់ទាញវិនិយោគិន និងភ្ញៀវទេសចរមកកម្សាន្តនៅកម្ពុជាកាន់តែច្រើន។
ពិព័រណ៍ទំនិញនាំចូលអន្តរជាតិចិន លើកទី៤ ដែលបើកដំណើរការជាផ្លូវការ ពីថ្ងៃទី ៥-១០ ខែ វិច្ឆិកា ឆ្នាំ ២០២១ នេះមានការចូលរួមថ្លែងសុន្ទរកថា របស់លោក ស៊ី ជីនភីង ប្រធានាធិបតីសាធារណរដ្ឋចិន និងថ្នាក់ដឹកនាំជាន់ខ្ពស់ ព្រមទាំងថ្នាក់រដ្ឋមន្ត្រីរបស់ប្រទេសនានាក្នុងតំបន់ និងពិភពលោកចំនួន ១០៦ ប្រទេស។
លោក ស៊ី ជីនភីង បានថ្លែងស្វាគមន៍ចំពោះប្រទេសចូលរួមទាំងអស់ និងបានអំពាវនាវឱ្យបណ្តាប្រទេសជុំវិញពិភពលោកត្រូវដើរឱ្យទាន់និន្នាការទូទៅនៃសកលភាវូបនីយកម្មសេដ្ឋកិច្ច និងគាំទ្រការបើកចំហ ហើយប្រឆាំងឯកតោភាគីនិយម លទ្ធិគាំពារនិយម និងជំរុញមនុស្សជាតិឆ្ពោះទៅរកអនាគតដ៏ល្អ។
លោក ឈួន ដារ៉ា រដ្ឋលេខាធិការក្រសួងពាណិជ្ជកម្ម បានបញ្ជាក់ថា នេះជាលើកទី៤ ដែលប្រទេសកម្ពុជាបានចូលរួមក្នុងព្រឹត្តិការណ៍ពិព័រណ៍ទំនិញនាំចូលអន្តរជាតិចិនកម្រិតពិភពលោកនេះ។
លោកបានបន្តថា ក្នុងការចូលរួមពិព័រណ៍ទំនិញនាំចូលអន្តរជាតិចិន លើកទី ៤ ឆ្នាំ ២០២១នេះ ពន្លាជាតិកម្ពុជាត្រូវបានរចនាឡើងតាមរចនាប័ទ្មខ្មែរសម័យទំនើបតាមទម្រង់ 3D។ ចំពោះអ្នកទស្សនាដែលចាប់អារម្មណ៍អាចចូលទស្សនាពន្លាជាតិកម្ពុជា តាមរយៈតំណភ្ជាប់គេហទំព័ររបស់គណៈកម្មការរៀបចំពិព័រណ៍ https://country.ciie.org/2021/Cambodia/index.html?lang=zh_CN។
លោកថ្លែងថា៖ «សម្រាប់ឆ្នាំ ២០២១ នេះ ដោយសារការរីករាលដាលជំងឺកូវីដ ១៩ ប្រទេសកម្ពុជា ក៏ដូចជាបណ្តាប្រទេសផ្សេងៗទៀត មិនបានដឹកនាំគណៈប្រតិភូទៅចូលរួមផ្ទាល់ទេ ទន្ទឹមនឹងនេះក្រសួងពាណិជ្ជកម្មបានរៀបចំពន្លាជាតិមួយ និងក្រុមហ៊ុនកម្ពុជាចំនួន ៥ បានចូលរួមពីចម្ងាយតាមប្រព័ន្ធអនឡាញ និងបានសម្របសម្រួលឱ្យក្រុមហ៊ុនដែលកំពុងធ្វើធុរកិច្ចនៅកម្ពុជា ដែលមានសាខា និងផលិតផលនៅប្រទេសចិនស្រាប់ចូលរួមតាំងពិព័រណ៍ដោយផ្ទាល់ផងដែរ»។
ពិព័រណ៍ទំនិញនាំចូលអន្តរជាតិនេះមានក្រុមហ៊ុនចូលរួម ២ ៩០០ មកពីបណ្តាប្រទេសក្នុងតំបន់ និងពិភពលោក ១៤៣ រួមទាំងកម្ពុជា។ ក្នុងនោះមានប្រទេស និងអង្គការអន្តរជាតិធំៗ ៥៨ បានសាងសង់ពន្លាជាតិក្នុងព្រឹត្តិការណ៍នេះ។ ទំនិញដាក់តាំងបង្ហាញក្នុងពិព័រណ៍នេះរួមមាន ផលិតផលម្ហូបអាហារ សម្ភារកសិកម្ម យានយន្ត ឧបករណ៍បច្ចេកទេស ទំនិញប្រើប្រាស់ទូទៅ ឧបករណ៍វេជ្ជសាស្ត្រ និងឱសថ និងពាណិជ្ជកម្ម លើវិស័យសេវាកម្មជាច្រើនពាន់ប្រភេទទៀត៕ LA
