The Phnom Penh Post Search

Search form




Logo of Phnom Penh Post newspaper Phnom Penh Post - ការប្រើប្រាស់​ប្រព័ន្ធ​ទូទាត់​ឌីជីថល កំពុង​ពេញនិយម​ក្នុង​ការរស់នៅ​ប្រចាំថ្ងៃ​របស់​ប្រជាពលរដ្ឋ

ការប្រើប្រាស់​ប្រព័ន្ធ​ទូទាត់​ឌីជីថល កំពុង​ពេញនិយម​ក្នុង​ការរស់នៅ​ប្រចាំថ្ងៃ​របស់​ប្រជាពលរដ្ឋ

Content image - Phnom Penh Post
ស្ត្រី​ម្នាក់​កំពុង​ស្វែងរក​ទិញ​ផលិតផល​តាម​ប្រព័ន្ធ​បច្ចេកវិទ្យា​។ ហុង មិនា

ការប្រើប្រាស់​ប្រព័ន្ធ​ទូទាត់​ឌីជីថល កំពុង​ពេញនិយម​ក្នុង​ការរស់នៅ​ប្រចាំថ្ងៃ​របស់​ប្រជាពលរដ្ឋ

ភ្នំពេញៈ អ្នក​ក្នុង​វិស័យ​ឧស្សាហកម្ម​ហិរញ្ញវត្ថុ​បាន​បង្ហាញថា ការរីកលូតលាស់​នៃ​ផលិតផល​ឌីជីថល​នៅក្នុង​វិស័យ​ហិរញ្ញវត្ថុ​កាន់តែ​មាន​សារៈសំខាន់​ជាង​ពេលណាៗ​ទាំងអស់​ដោយ​អតិថិជន​កាន់តែ​ទទួល​យក​បច្ចេកវិទ្យា ហើយ​មានបំណង​ចង់​ធ្វើ​ប្រតិបត្តិការ​តាម​ពេលវេលា និង​ពី​ទីកន្លែង​របស់​ពួកគេ​។

ការលើកឡើង​នេះ​ធ្វើឡើង​នៅក្នុង​ពិធី​បើក​កិច្ចប្រជុំ​កំពូល Cam-Tech ដែល​រៀបចំ​ពីថ្ងៃ​ទី​ ៨-១២ ខែវិច្ឆិកា ដោយ​សមាគម​ហិរញ្ញវត្ថុ និង​បច្ចេកវិទ្យា​កម្ពុជា​ (CAFT) សហការ​ជាមួយ​នឹង​ធនាគារជាតិ​នៃ​កម្ពុជា​ (NBC) សមាគម​ធនាគារ​នៅ​កម្ពុជា​ (ABC) និង​សមាគម​មីក្រូហិរញ្ញវត្ថុ​កម្ពុជា (CMA)​។

ប្រធាន​សមាគម​មីក្រូ​ហិរញ្ញវត្ថុ​កម្ពុជា លោក គា បូរាណ ឱ្យដឹង​ក្នុង​ពិធី​បើក​ដំណើរការ​នេះ​ថា ផលិតផល​ឌីជីថល​ជាច្រើន​ត្រូវបាន​ដាក់ឱ្យ​ប្រើប្រាស់​នៅលើ​ទីផ្សារ​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ​ដែល​រួមមាន កម្មវិធី​ធនាគារ​ចល័ត​, កាបូប​ប្រាក់​ឌីជីថល​, ប្រឹក្សា​យោបល់​ដោយ​មនុស្ស​យន្ត​, សំណើ​កម្ចី​ឌីជីថល​, ការដាក់​ពិន្ទុ​ឥណទាន​,​ការទូទាត់​តាម​អនឡាញ​, ការបញ្ជា​បម្រើសេវា​ដោយ​ខ្លួនឯង និង​កម្មវិធី​ជាច្រើន​ផ្សេងទៀត​។ កម្មវិធី​ទាំងនេះ​បាន​ចំណែក​ដល់​ការសម្រេចបាន​នូវ​គោលដៅ​ដាក់បញ្ចូល​ហិរញ្ញវត្ថុ​ជាតិ​ឆ្នាំ​ ២០១៩-២០២៥​។

លោក​ថ្លែងថា​៖ «​នៅពេលដែល​ផលិតផល​ឌីជីថល និង​ការសម្រប​ខ្លួន​នឹង​បច្ចេកវិទ្យា​រីកចម្រើន ចំណេះដឹង​ស្តីពី​សុវត្ថិភាព​អ៊ីនធឺណិត អក្ខរកម្ម​ឌីជីថល និង​ចំណេះដឹង​ផ្នែក​ហិរញ្ញវត្ថុ​នឹង​កាន់​តែមាន​សារៈសំខាន់​សម្រាប់​អ្នកប្រើប្រាស់​ទាំងនោះ ដើម្បី​ជួយ​ពួកគេ​ឱ្យ​យល់ដឹង​ពី​ហានិភ័យ និង​អត្ថប្រយោជន៍ ហើយ​ដូច្នេះ​ពួកគេ​អាច​ការពារ​បាន​កាន់តែ​ប្រសើរ​ជាង​មុន​»​។

លោក​បន្ថែមថា ការកែលម្អ​ហេដ្ឋារចនាសម្ព័ន្ធ​កុំព្យូទ័រ​ខ្លោដ ឯកជនភាព​ទិន្នន័យ ការការពារ​អ្នកប្រើប្រាស់ លេខ​សម្គាល់​ឌីជីថល E-Kyc ពិត​ជាមាន​សារៈសំខាន់​ដើម្បី​គាំទ្រ​ដល់​ការរីកលូតលាស់​នៃ​ផលិតផល​ឌីជីថល នៅពេល​អនាគត​។

លោក Baek, Jong Il ហេរញ្ញិក និង​ជា​ប្រធាន​គណៈកម្មាធិការ​ទូទាត់​នៃ​សមាគម​ធនាគារ​នៅ​កម្ពុជា បាន​ឱ្យ​ដឹងថា ដើម្បី​លើកកម្ពស់​ការទទួលយក និង​ការផ្លាស់ប្តូរ​ឌីជីថល​ក្នុង​វិស័យ​ធនាគារ និង​ហិរញ្ញវត្ថុ ធនាគារជាតិ​នៃ​កម្ពុជា កាលពី​ខែតុលា ឆ្នាំ​ ២០២០ បានដាក់​ឱ្យ​ដំណើរការ​នូវ​កម្មវិធី​ទូទាត់​តាម​ទូរស័ព្ទ​អន្តរ​ធនាគារ ដែល​គេ​ស្គាល់​ថា​ «​ប្រព័ន្ធ​បាគង​» ដែល​ផ្តល់​សម្ទុះ​ខ្លាំង​ដល់​ការអភិវឌ្ឍ​វិស័យ​ហិរញ្ញវត្ថុ​តាម​តំបន់​ជនបទ និង​ការបណ្ដុះបណ្ដាល​បរិយាប័ន្ន​ហិរញ្ញវត្ថុ​នៅ​កម្ពុជា​។

លោក​លើកឡើងថា​៖ «​សមាគម​ធនាគារ​នៅ​កម្ពុជា​បាន​ចាត់ទុក​ការសម្រប​ខ្លួន និង​ការអភិវឌ្ឍ​ឌីជីថល និង​បច្ចេកវិទ្យា​នៅក្នុង​វិស័យ​ធនាគារ និង​ហិរញ្ញវត្ថុ គឺជា​គោលបំណង​ស្នូល​មួយ ខណៈ​យើង​មាន​គោលបំណង​លើកកម្ពស់​ការបន្ត​ធ្វើ​ទំនើបកម្ម​នៃ​ប្រព័ន្ធ​ធនាគារ​កម្ពុជា តាមរយៈ​ការរៀបចំ គ្រប់គ្រង និង​ចូលរួម​នៅ​គ្រប់​សកម្មភាព​អន្តរ​ធនាគារ​ទាំងអស់​»៕

អត្ថបទគួរចាប់អារម្មណ៍