តម្លៃមាសនៅសប្តាហ៍នេះកំពុងត្រូវបានជួញដូរក្នុងចន្លោះតម្លៃ ១ ៨០០ ដុល្លារ ទៅ ១ ៨៨៥ ដុល្លារ ក្នុងមួយអោនស៍ ហើយត្រូវបានគេរំពឹងថានឹងកើនឡើងខ្ពស់ដោយមានការជំរុញពីការកើនឡើងនៃអត្រាអតិផរណារបស់សហរដ្ឋអាមេរិក ដែលជាអត្រាខ្ពស់បំផុតក្នុងរយៈពេល ៣០ ឆ្នាំជាង។
គេហទំព័រ CNBC បានរាយការណ៍កាលពីថ្ងៃពុធសប្តាហ៍នេះថា៖ «អតិផរណាលើប្រភេទផលិតផលជាច្រើន គឺខ្ពស់ជាងការរំពឹងទុកឆ្ងាយក្នុងខែតុលា ដោយឈានដល់ចំណុចខ្ពស់បំផុតដែលធ្លាប់មានតាំងពីឆ្នាំ ១៩៩១។ បើគិតទៅលើកម្រិតមូលដ្ឋានប្រចាំខែ ទិន្នន័យជាក់ស្ដែងនៃសន្ទស្សន៍ថ្លៃទំនិញបានកើនឡើងដល់ ០,៩% ខណៈការរំពឹងទុកមានត្រឹមតែ ០,៦%។
ចំណែក ទិន្នន័យជាក់ស្ដែងនៃសន្ទស្សន៍ថ្លៃទំនិញស្នូលបានកើនឡើង ដល់ ០,៦% ដែលខ្ពស់ជាងការរំពឹងទុក ០,២%»។ យោងតាមគេហទំព័រ Orbex.com កាលពីថ្ងៃអង្គារ កាលពីសប្តាហ៍មុន ធនាគារកណ្ដាលសហរដ្ឋអាមេរិកបានទទួលស្គាល់ថា អតិផរណាដែលខ្ពស់ជាងការរំពឹងទុកទំនងជាបន្ដអូសបន្លាយមួយរយៈទៀត និងបញ្ជាក់ថាគោលនយោបាយរូបិយវត្ថុទំនងជាមិនផ្លាស់ប្តូរទេ ប្រសិនបើអតិផរណាពិតជាខ្ពស់ជាងនេះ។
យ៉ាងណាក៏ដោយ វាមិនមានន័យថា ឥទ្ធិពលនៃអតិផរណានឹងមិនបាត់ទៅវិញទេ។ ឧទាហរណ៍៖ ប្រសិនបើអត្រាសញ្ញាបណ្ណនៅតែមានស្ថិរភាព ទិន្នផលពិតនៃមូលបត្របំណុលនឹងរលាយបាត់ ហើយធ្វើឱ្យប្រាក់ដុល្លារធ្លាក់ចុះ»។
ជាទូទៅ ប្រសិនបើអត្រាអតិផរណាកើនឡើងខ្លាំង ការចំណាយរបស់មនុស្សនឹងកើនឡើងយ៉ាងខ្លាំង ហើយតម្លៃមាសនឹងឡើងថ្លៃ ចាប់តាំងពីមាសត្រូវបានគេមើលឃើញថាជាការការពារអតិផរណាដោយផ្នែកធំនៃការវិនិយោគ។
សម្រាប់ការវិភាគការជួញដូរនៅសប្តាហ៍នេះ វិនិយោគិនអាចពិចារណាទិញមាសនៅតម្លៃចន្លោះពី ១ ៨០០ ទៅ ១ ៨៤៥ ដុល្លារក្នុងមួយអោនស៍។