ភ្នំពេញៈ លោកនាយករដ្ឋមន្ត្រី ហ៊ុន សែន បានថ្លែងថា ក្រៅពីការប្រយុទ្ធប្រឆាំងជំងឺកូវីដ ១៩ និងការរៀបចំយុទ្ធសាស្ត្រស្តារ និងជំរុញកំណើនសេដ្ឋកិច្ចឡើងវិញ ពិភពលោកបាននិងកំពុងប្រឈមនឹងបញ្ហាជាច្រើនដូចជា ការប្រកួតប្រជែងផ្នែកភូមិសាស្ត្រនយោបាយ សង្គ្រាមពាណិជ្ជកម្ម និងការប្រែប្រួលអាកាសធាតុជាដើម។
នេះជាការលើកឡើងក្នុងពិធីបើកកិច្ចប្រជុំរដ្ឋមន្ត្រីដឹកជញ្ជូនអាស៊ានលើកទី២៧ និងកិច្ចប្រជុំពាក់ព័ន្ធ ដែលរៀបចំឡើងតាមប្រព័ន្ធវីដេអូ ក្នុងថ្ងៃទី ១១ ខែ វិច្ឆិកា ឆ្នាំ ២០២១។
លោក ហ៊ុន សែន បានថ្លែងថា ដើម្បីដោះស្រាយបញ្ហាទាំងនេះប្រកបដោយវិបុលភាព និងជាប្រយោជន៍ដល់តំបន់អាស៊ាននោះ អាស៊ានត្រូវប្រកាន់ខ្ជាប់នូវទស្សនៈពហុភាគីនិយម និងរួបរួមសាមគ្គីគ្នាជាធ្លុងមួយ ស្របតាមទិសស្លោក «យើងយកចិត្តទុកដាក់, យើងត្រៀមលក្ខណៈ យើងរីកចម្រើន»។
លោកបន្តថា បន្ថែមពីលើនេះការជំរុញការធ្វើសមាហរណកម្មសហគមន៍អាស៊ាន តាមគន្លងប្រក្រតីភាពថ្មី គឺជាកិច្ចការចាំបាច់ និងសមស្របដើម្បីបង្កើតជាកម្លាំងមួយដ៏ធំសំដៅប្រែក្លាយអាស៊ានទាំងមូលទៅជាតំបន់មួយដែលមានភាពធន់ ភាពប្រកួតប្រជែង និងបរិយាប័ន្ន។
បើតាមលោកនាយករដ្ឋមន្ត្រី ផែនការមេស្តីពីការតភ្ជាប់អាស៊ាន នឹងដើរតួជាផែនការគន្លឹះ ដែលនឹងធានាការរីកចម្រើនខាងផ្នែកសេដ្ឋកិច្ច ជាមួយគម្លាតអភិវឌ្ឍន៍តិចតួច និងការតភ្ជាប់គ្នាដោយរលូនរវាងប្រទេសជាសមាជិក និងជាមួយពិភពលោក តាមរយៈការធ្វើឱ្យកាន់តែស៊ីចង្វាក់គ្នា និងបរិយាប័ន្នភាពនៃការតភ្ជាប់ទាំង ៣ គឺការតភ្ជាប់ហេដ្ឋារចនាសម្ព័ន្ធ ការតភ្ជាប់ស្ថាប័ន និងការតភ្ជាប់ប្រជាជន»។
ក្នុងឱកាសនោះ លោក ហ៊ុន សែន ក៏បានជំរុញអាស៊ានថា ជំងឺកូវីដ ១៩ នឹងបន្តបង្អាក់ប្រតិបត្តិការដឹកជញ្ជូន និងខ្សែចង្វាក់ផ្គត់ផ្គង់សកលក្នុងរយៈពេលវែងខាងមុខ។ ដូច្នេះរដ្ឋមន្ត្រីដឹកជញ្ជូនអាស៊ានគួរបន្តតាមដាន និងត្រួតពិនិត្យម៉ឺងម៉ាត់លើដំណើរការនៃការអនុវត្តផែនការសកម្មភាព ក្រោមក្របខ័ណ្ឌការស្តារឡើងវិញគ្រប់ជ្រុងជ្រោយរបស់អាស៊ាន ដោយសង្កត់ធ្ងន់លើការពង្រឹងការតភ្ជាប់ក្នុងតំបន់ ដើម្បីពង្រឹងសក្តានុពលនៃទីផ្សារ។
លោកមានប្រសាសន៍ថា៖ «ក្នុងន័យនេះ ការជំរុញការដឹកជញ្ជូនឆ្លងដែនរវាងបណ្តាប្រទេសជាសមាជិកអាស៊ាន ប្រកបដោយភាពរលូន និងរហ័សទាន់ចិត្ត នឹងចូលរួមលើកស្ទួយខ្សែចង្វាក់ផលិតកម្ម ក្នុងតំបន់ ប្រកបដោយភាពរឹងមាំ និងនិរន្តរភាព»។
លោក ស៊ិន ចន្ធី ប្រធានសមាគមភ័ស្តុកម្មកម្ពុជា និយាយថា ពាក់ព័ន្ធនឹងការដឹកជញ្ជូនឆ្លងកាត់តំបន់ និងតភ្ជាប់ក្នុងប្រទេសទាំង ១០ នៃតំបន់ និងក្នុងប្រទេសមហាអនុតំបន់ទន្លេមេគង្គទាំង ៦ នៅតែមានប្រក្រតីភាព ប៉ុន្តែមានបញ្ហាមួយចំនួនពាក់ព័ន្ធការរឹតត្បិត ចំពោះការការពារនៃការរីករាលដាលនៃជំងឺកូវីដ ១៩។
លោកបានថ្លែងថា៖ «ការដឹកជញ្ជូននៅតែមានប្រតិបត្តិការជាហូរហែ ទោះបីមានការរំខានពីការរីករាលដាលនៃជំងឺកូវីដ ១៩។ បញ្ហានេះនៅតែមានជាបញ្ហាមនុស្ស និងកត្តាហេដ្ឋារចនាសម្ព័ន្ធ ដែលធ្វើឱ្យមានការកកស្ទះ។ តាមរយៈការដឹកជញ្ជូននេះ វាបានជួយច្រើនណាស់ដល់សេដ្ឋកិច្ចជាតិ សេដ្ឋកិច្ចតំបន់ ក៏ដូចជាការជួយដល់អ្នកផលិត ប្រជាពលរដ្ឋ និងកសិករផងដែរ»៕ LA