ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) ក្រោមកិច្ចសហការជាមួយអង្គការពាណិជ្ជកម្មក្រៅប្រទេសជប៉ុន (JETRO) និងធនាគារមីហ្សូហូ បានរៀបចំសិក្ខាសាលាមួយ ដើម្បីផ្សព្វផ្សាយដល់វិនិយោគិន និងធុរជនជប៉ុនអំពីច្បាប់វិនិយោគថ្មី ខណៈច្បាប់នេះត្រូវរំពឹងថានឹងអាចទាក់ទាញបានការចូលមកបណ្តាក់ទុននៅកម្ពុជាកាន់តែច្រើននៅក្នុង និងក្រោយវិបត្តិជំងឺកូវីដ ១៩។
សិក្ខាសាលាដែលបានរៀបចំឡើងតាមប្រព័ន្ធវីដេអូកាលពីថ្ងៃទី ១១ ខែវិច្ឆិកា ឆ្នាំ ២០២១ កន្លងមកមានការចូលរួមពីលោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា, លោក ម៉ាសាហ៊ីរ៉ុ មីខាមី ឯកអគ្គរាជទូតជប៉ុនប្រចាំកម្ពុជា,លោក អ៊ុង រចនា ឯកអគ្គរាជទូតកម្ពុជាប្រចាំប្រទេសជប៉ុន, លោកស្រី ម៉ារីសា ហារ៉ូតា តំណាងអង្គការពាណិជ្ជកម្មក្រៅប្រទេសជប៉ុន (JETRO), តំណាងធនាគារមីហ្សូហូ ព្រមទាំងតំណាងក្រុមហ៊ុនជប៉ុននៅក្នុង និងក្រៅប្រទេសជប៉ុន និងក្រុមហ៊ុនដែលមានវត្តមាននៅកម្ពុជាស្រាប់ប្រមាណជិត ៤០០ ក្រុមហ៊ុន។
លោក សុខ ចិន្តាសោភា បានលើកឡើងថា ច្បាប់វិនិយោគថ្មីនេះត្រូវបានតាក់តែងឡើងដោយឈរលើមូលដ្ឋានជាក់ស្តែងនៃរចនាសម្ព័ន្ធសេដ្ឋកិច្ចកម្ពុជា ព្រមទាំងតម្រូវការជាក់ស្តែងរបស់វិនិយោគិនដើម្បីឆ្លើយតបទៅនឹងការប្រែប្រួលនៃភូមិសាស្ត្រនយោបាយ និងសេដ្ឋកិច្ចដែលបង្កឡើងដោយភាពតានតឹងពាណិជ្ជកម្មរវាងមហាអំណាចសេដ្ឋកិច្ច, បដិវត្តឧស្សាហកម្មទី ៤, បរិវត្តកម្មឌីជីថល, និងការរអាក់រអួលនៃខ្សែច្រវាក់តម្លៃសកលដែលបណ្តាលមកពីការរាតត្បាតនៃជំងឺកូវីដ ១៩។
លោកថ្លែងថា៖ «ខ្ញុំមានសុទិដ្ឋិនិយមថាតាមរយៈសិក្ខាសាលានាថ្ងៃនេះសហគមន៍ធុរកិច្ចជប៉ុន និងវិនិយោគិនជប៉ុននៅកម្ពុជា និងបានយល់កាន់តែច្បាស់ និងស៊ីជម្រៅពីច្បាប់នេះ ហើយនឹងជួយផ្សព្វផ្សាយដល់វិនិយោគិនជប៉ុនពីក្រៅប្រទេសមកវិនិយោគនៅកម្ពុជាបន្ថែមទៀត»។
ជាការឆ្លើយបត លោក ម៉ាសាហ៊ីរ៉ុ មីខាមី បានសម្តែងនូវការកោតសរសើរចំពោះកិច្ចខិតខំប្រឹងប្រែងរបស់ក្រុមប្រឹក្សាអភិវឌ្ឍន៍កម្ពុជា ដែលបានតាក់តែងច្បាប់ថ្មីស្តីពីវិនិយោគនេះអស់រយៈពេលជាច្រើនឆ្នាំ និងបានទទួលយកមតិព្រមទាំងសំណូមពរពីតំណាងផ្នែកឯកជន និងសហគមន៍ធុរកិច្ចជប៉ុននៅកម្ពុជា ដើម្បីប្រមូលធាតុចូលឱ្យបានគ្រប់ជ្រុងជ្រោយយកទៅដាក់បញ្ចូលក្នុងច្បាប់ថ្មីស្តីពីវិនិយោគនេះ។
លោកនិយាយថា៖ «ខ្ញុំមានជំនឿយ៉ាងមុតមាំថាការប្រកាសឱ្យប្រើនូវច្បាប់នេះនឹងក្លាយជាយុទ្ធសាស្ត្រមួយដ៏មានប្រសិទ្ធភាព និងទាន់ពេលវេលាក្នុងការស្តារឡើងវិញនូវសេដ្ឋកិច្ចសង្គម ក្រោយវិបត្តិនៃជំងឺកូវីដ ១៩ ព្រមទាំងធ្វើឱ្យកម្ពុជាក្លាយជាទិសដៅដ៏ទាក់ទាញ និងប្រកួតប្រជែងខ្ពស់មួយនៅក្នុងតំបន់ សម្រាប់ការវិនិយោគប្រកបដោយគុណភាព និងចីរភាព»។
បន្ថែមពីលើនេះ លោកក៏បានអះអាងពីការចូលរួមសហការជាមួយរដ្ឋាភិបាលកម្ពុជាក្នុងកិច្ចជំរុញ និងទាក់ទាញវិនិយោគផ្ទាល់ពីជប៉ុនមកព្រះរាជាណាចក្រកម្ពុជា ដើម្បីឆ្ពោះទៅរកវឌ្ឍនភាព និងវិបុលភាពសេដ្ឋកិច្ចនៃប្រទេសទាំងពីរ៕