ក្រុមហ៊ុន ស៊ីភី ខេមបូឌា កំពុងបង្កើនការពង្រីកអាជីវកម្មវារីវប្បកម្មរបស់ខ្លួននៅក្នុងព្រះរាជាណាចក្រកម្ពុជា ដោយណែនាំនូវវិធីសាស្ត្រចិញ្ចឹមត្រីប្រកបដោយបច្ចេកវិទ្យាខ្ពស់ ដើម្បីឆ្លើយតបទៅនឹងតម្រូវការក្នុងស្រុកដែលកំពុងកើនឡើង និងកំណើនចំនួនប្រជាជនក៏ដូចជាការផ្គត់ផ្គង់មានតិច ដោយសារតែបរិមាណត្រីធ្លាក់ចុះ។
ក្រុមហ៊ុន ស៊ីភី ខេមបូឌា គឺជាបុត្រសម្ព័ន្ធរបស់ក្រុមហ៊ុនកសិឧស្សាហកម្ម និងចំណីអាហារដ៏ធំឈានមុខគេរបស់ប្រទេសថៃគឺក្រុមហ៊ុន CPF ដែលបាននិងកំពុងប្រើប្រាស់វិធីសាស្ត្រជាច្រើន ដើម្បីអភិវឌ្ឍវិស័យវារីវប្បកម្មប្រកបដោយនិរន្តរភាព ដែលត្រូវបានគាំទ្រដោយការធ្វើអាជីវកម្មតាមបែបទំនើបផ្តោតលើការបង្កាត់ពូជត្រី ការផលិតចំណីសត្វ និងបច្ចេកទេសក្នុងការចិញ្ចឹម។
ក្រុមហ៊ុន ស៊ីភី ខេមបូឌា បានកំណត់ចក្ខុវិស័យរយៈពេលវែងរបស់ខ្លួនក្នុងការផលិតផលិតផលវារីវប្បកម្ម ដែលមានគុណភាពខ្ពស់ សម្រាប់តម្រូវការក្នុងស្រុក និងសម្រាប់ការនាំចេញ ដែលអាចជួយលើកស្ទួយសេដ្ឋកិច្ចជនបទ តាមរយៈការបង្កើតឱកាសការងារជាច្រើន។
វារីវប្បកម្មគឺជាអាជីវកម្មស្នូលមួយរបស់ក្រុមហ៊ុន CPF ដែលបានពង្រីកប្រតិបត្តិការអាជីវកម្មវារីវប្បកម្មរបស់ខ្លួនមកប្រទេសកម្ពុជាក្នុងឆ្នាំ ២០១៩ ដែលកំពុងរីកចម្រើនជាលំដាប់។
ក្រុមហ៊ុន CPF ប្រតិបត្តិការជីវកម្មបសុសត្វ ដូចជាការចិញ្ចឹមជ្រូក មាន់ ជាដើម ហើយចំពោះអាជីវកម្មវារីវប្បកម្មមានអាជីវកម្មចិញ្ចឹមត្រី និងបង្កងជាដើម។ អាជីវកម្មរបស់ក្រុមហ៊ុនរួមមាន ការផលិតចំណីសត្វ ការចិញ្ចឹមសត្វ និងការកែច្នៃសាច់សត្វ ក៏ដូចជាកែច្នៃអាហារ។
លោក ស៊ីវៈភុន កាងកាន់ ប្រធានចាត់ការទូទៅ អាជីវកម្មវារីវប្បកម្មនៃក្រុមហ៊ុន ស៊ីភី ខេមបូឌា ចំកាត់ បានមានប្រសាសន៍ថា៖« ក្រុមហ៊ុន ស៊ីភី ខេមបូឌា បានយកចិត្តទុកដាក់យ៉ាងខ្លាំងក្នុងការចូលរួមបង្កើនផលិតភាពផលិតកម្មវារីវប្បកម្មនៅកម្ពុជាឱ្យមានការរីកចម្រើនទាំងបរិមាណ និងគុណភាព ដើម្បីឆ្លើយតបតាមតម្រូវការទីផ្សារក្នុងស្រុក និងធ្វើការកាត់បន្ថយការនាំចូល ជាពិសេសដើម្បីលើកស្ទួយវិស័យវារីវប្បកម្មកម្ពុជាឱ្យមានការរីកចម្រើន ទាំងផ្នែកសេដ្ឋកិច្ច និងសង្គមជាតិ»។
ក្រុមហ៊ុន ស៊ីភី ខេមបូឌា ផ្គត់ផ្គង់ពូជត្រីជាច្រើនប្រភេទរួមមាន ត្រីទីឡាព្យ៉ាក្រហម ត្រីអណ្តែង និងត្រីប្រា ជាដើម។ ក្រុមហ៊ុនបានអភិវឌ្ឍពូជត្រីទីឡាព្យ៉ាតាមបែបធម្មជាតិ ពីព្រោះវាជាពូជត្រីដែលមានគុណភាពល្អធន់នឹងជំងឺ អត្រារស់ខ្ពស់ ធំលឿន និងជាពូជត្រីល្អសម្បូរទៅដោយសារធាតុចិញ្ចឹម។
កាលពីឆ្នាំមុន ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា៖ «វារីវប្បករទាំងអស់យកចិត្តទុកដាក់បន្ថែមទៀតលើការអនុវត្តបច្ចេកទេសចិញ្ចឹម និងពង្រីកអាជីវកម្មចិញ្ចឹមត្រី ដើម្បីច្បាមយក រួចប្រើប្រាស់កាលានុវត្តភាពនៃវិបត្តិជំងឺឆ្លងកូវីដ ១៩ ឱ្យកាន់តែមានប្រសិទ្ធភាពខ្ពស់»។
ឯកឧត្តម វេង សាខុន បានមានប្រសាសន៍ថា ផលិតកម្មវារីវប្បកម្មរបស់កម្ពុជាបានកើនឡើងពី ៥០ ០០០ តោន ក្នុងឆ្នាំ ២០០៩ ដល់ជាង ៣០០ ០០០ តោន ក្នុងឆ្នាំ ២០១៩។ ក្រសួងបានកំណត់គោលដៅសម្រេចឱ្យបានផលិតផលវារីវប្បកម្មចំនួន ៧៤០ ០០០ តោននៅឆ្នាំ ២០២៤ ជាមួយនឹងកំណើនជាមធ្យម ២០ ភាគរយក្នុង ១ ឆ្នាំ។
ក្រុមហ៊ុន CPF គឺជាក្រុមហ៊ុនប្រតិបត្តិការអាជីវកម្មកសិឧស្សាហកម្ម និងចំណីអាហារនៅប្រទេសថៃ ក៏ដូចជានៅតាមបណ្តាប្រទេសជាច្រើនទៀត ដែលស្ថិតនៅក្រោមចក្ខុវិស័យអាជីវកម្ម «ផ្ទះបាយពិភពលោក» ដែលផ្តោតលើការអភិវឌ្ឍប្រកបដោយនិរន្តរភាព ដែលផ្តល់អាទិភាពខ្ពស់ដល់ការអភិវឌ្ឍនៅក្នុងស្រុក ជីវភាពរស់នៅ និងបរិស្ថាន។
អាជីវកម្មវារីវប្បកម្មរបស់ក្រុមហ៊ុន CPF ប្រើប្រាស់បច្ចេកវិទ្យាកសិកម្មប្រូបាយអូទិក (probiotic) ដែលការប្រើប្រាស់សារធាតុគីមីត្រូវបានកាត់បន្ថយឱ្យនៅតិចបំផុត។ ត្រីដែលចិញ្ចឹមគឺត្រូវបានទទួលស្គាល់ដោយស្ថាប័ន ASC [Aquaculture Stewardship Council] ខណៈប្រព័ន្ធបញ្ចេញបញ្ចូលចរន្តទឹកត្រូវត្រូតពិនិត្យយ៉ាងហ្មត់ចត់ ជួយសន្សំសំចៃទឹក និងអាចចិញ្ចឹមបង្កងបានផងដែរ ហើយមិនប៉ះពាល់ដល់បរិស្ថាន។
ក្រុមហ៊ុន CPF គឺជាក្រុមហ៊ុនឈានមុខគេនៅក្នុងការផលិត និងលក់ចំណីសត្វ ហើយផលិតផលចម្បងៗរួមមាន ចំណីជ្រូក ចំណីមាន់ ចំណីកង្កែប ចំណីបង្កង និងចំណីត្រី។
ក្រុមហ៊ុន CPF បង្កើនការលើកស្ទួយអាជីវកម្មកសិឧស្សាហកម្ម និងចំណីអាហារ ហើយបានពង្រីកអាជីវកម្មនៅក្នុងប្រទេសជាច្រើន ដើម្បីជួយពង្រឹងសន្តិសុខស្បៀង ដែលផ្តល់អត្ថប្រយោជន៍ដល់ទាំងប្រទេសជាតិ ប្រជាជន និងក្រុមហ៊ុន៕