ភ្នំពេញៈ ថ្នាក់ដឹកនាំសមាគមអ្នកអភិវឌ្ឍន៍លំនៅឋានកម្ពុជាបានឱ្យដឹងថា ខ្លួននឹងចូលរួមជាមួយរដ្ឋាភិបាលក្នុងការផ្សព្វផ្សាយ និងណែនាំឱ្យម្ចាស់គម្រោងវិនិយោគនានាលុបបំបាត់ការស្ថាបនាហេដ្ឋារចនាសម្ព័ន្ធទូរគមនាគមន៍ និងការផ្ដល់សេវាអ៊ីនធឺណិតផ្ដាច់មុខ ព្រមទាំងប្តេជាជំរុញឱ្យប្រតិបត្តិករផ្ដល់សេវាទូរស័ព្ទចល័ត និងអ៊ីនធឺណិតបង្កើនគុណភាពសេវានៅតាមបុរីបន្ថែមទៀត។
និយតករទូរគមនាគមន៍កម្ពុជាកាលពីថ្ងៃទី ១១ ខែវិច្ឆិកា បានចេញលិខិតមួយដោយប្រាប់ទៅប្រធានសមាគមអ្នកអភិវឌ្ឍន៍លំនៅឋានកម្ពុជាអំពីការសម្រេចរបស់រដ្ឋាភិបាលក្នុងការលុបបំបាត់ការស្ថាបនាហេដ្ឋារចនាសម្ព័ន្ធទូរគមនាគមន៍ និងការផ្តល់សេវាអ៊ីនធឺណិតផ្តាច់មុខនៅតាមបុរី អគារសហកម្មសិទ្ធិ និងទីប្រជុំជននានា។ ជាមួយគ្នានេះក្រសួងប្រៃសណីយ៍ ក៏បានបង្កើតក្រុមការងារលើកកម្ពស់គុណភាពសេវាទូរគមនាគមន៍តាមបុរីផងដែរ។
តាមរយៈលិខិតខាងលើ និយតករទូរគមនាគមន៍កម្ពុជាបានស្នើសុំការសហការពីសមាគមអ្នកអភិវឌ្ឍន៍លំនៅឋានកម្ពុជាឱ្យជួយផ្សព្វផ្សាយលិខិតរបស់ទីស្តីការគណៈរដ្ឋមន្ត្រីទៅដល់ម្ចាស់បុរីនានា ដើម្បីសហការ និងចូលរួមអនុវត្តតាមការសម្រេចរបស់រដ្ឋាភិបាល, និងបញ្ឈប់រាល់ការអនុញ្ញាតការស្ថាបនាហេដ្ឋារចនាសម្ព័ន្ធទូរគមនាគមន៍ទាំងអស់នៅក្នុងបុរីដោយគ្មានការអនុញ្ញាតជាមុនពីនិយតករទូរគមនាគមន៍ ដើម្បីទុកលទ្ធភាពឱ្យក្រុមការងារក្រសួងប្រៃសណីយ៍ និងទូរគមនាគមន៍ធ្វើការងារជាមួយប្រតិបត្តិករទូរគមនាគមន៍។
អគ្គលេខាធិការសមាគមអ្នកអភិវឌ្ឍន៍លំនៅឋានកម្ពុជា លោក ហ៊ុយ វណ្ណា បានប្រាប់ភ្នំពេញប៉ុស្តិ៍ក្នុងថ្ងៃទី ១៤ ខែវិច្ឆិកាថា សមាគមរីករាយក្នុងការផ្សព្វផ្សាយទៅម្ចាស់គម្រោងនានាអំពីការលុបបំបាត់ការស្ថាបនាហេដ្ឋារចនាសម្ព័ន្ធទូរគមនាគមន៍ និងការផ្ដល់សេវាអ៊ីនធឺណិតផ្ដាច់មុខ ព្រោះកម្ពុជាជាប្រទេសប្រកាន់យកនូវរបបទីផ្សារសេរី។ លោកថ្លែងថា៖ «សមាគមនឹងខិតខំផ្សព្វផ្សាយ ព្រោះវានឹងផ្តល់ជាផលប្រយោជន៍រួមសម្រាប់សាធារណជនទាំងតម្លៃ និងគុណភាព»។
ទន្ទឹមនេះលោក វណ្ណា ក៏បានលើកឡើងផងដែរថា ការលុបបំបាត់ការស្ថាបនាហេដ្ឋារចនាសម្ព័ន្ធទូរគមនាគមន៍ និងការផ្តល់សេវាអ៊ីនធឺណិតផ្តាច់មុខនៅតាមបុរី អគារសហកម្មសិទ្ធិ នេះក៏នឹងជួបបញ្ហានៃការផ្តល់សេវាផងដែរ ព្រោះនៅមុនពេលចាប់ផ្តើមសាងសង់ក្រុមហ៊ុនអភិវឌ្ឍន៍លំនៅឋាន ឬសំណង់ តែងរៀបចំបណ្តាញក្រោមដីជាមុន ត្រង់ចំណុចនេះសួរថា តើនរណាជាអ្នកត្រូវចំណាយលើការរៀបចំបណ្តាញ? នេះជាបញ្ហាដែលត្រូវមានការពិភាក្សារវាងអ្នកពាក់ព័ន្ធទាំងអស់។
លោកបន្ថែមថា៖ «កន្លងមកមានក្រុមហ៊ុនផ្តល់សេវាអ៊ីនធឺណិតមួយចំនួនមិនព្រមចំណាយលើការស្ថាបនាបណ្តាញទេ ប៉ុន្តែចង់ភ្ជាប់ប្រើបណ្តាញរបស់ក្រុមហ៊ុនដទៃដែលបានស្ថាបនារួចហើយ»៕ LA
វីដេអូ៖