ភ្នំពេញៈ អតិថិជនជិត ៣៨ ម៉ឺននាក់បានស្នើសុំរៀបចំឥណទានឡើងវិញមកកាន់គ្រឹះស្ថានទាំង ១១៥ ដែលជាសមាជិកសមាគមមីក្រូហិរញ្ញវត្ថុកម្ពុជា (CMA) គិតត្រឹមថ្ងៃទី ៣១ ខែតុលា ដោយថយចុះជាលំដាប់ ខណៈស្ថានភាពនៃការឆ្លងរាលដាលជំងឺកូវីដ ១៩ កាន់តែមានភាពធូរស្រាល។
ក្នុងនោះអតិថិជនជាង ៣៥ ម៉ឺននាក់ (៩៤ ភាគរយ) បានទទួលការរៀបចំឥណទានក្នុងទំហំឥណទានជាង ១ ៧២០ លានដុល្លារ។ នេះបើតាមរបាយការណ៍របស់ CMA។
លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា (CMA) បានប្រាប់ ភ្នំពេញ ប៉ុស្តិ៍ថា ការស្នើសុំរៀបចំឥណទានឡើងវិញបានកើនឡើងខ្លាំងក្នុងខែឧសភា និងមិថុនា ដោយក្នុង ១ សប្តាហ៍អាចកើនឡើងដល់ ១ ម៉ឺននាក់ ប៉ុន្តែចាប់ពីចុងខែកក្កដា ចំនួននៃការស្នើសុំបានធ្លាក់ចុះត្រឹមរយនាក់ប៉ុណ្ណោះក្នុង ១ សប្តាហ៍។
លោកថ្លែងថា៖ «ក្នុងរយៈពេល ១០ សប្តាហ៍ចុងក្រោយចំនួនស្នើសុំស្ថិតក្នុងចន្លោះ ១០០ ទៅ ៥០០ នាក់ក្នុង ១ សប្តាហ៍។ ផ្អែកតាមទិន្នន័យនេះយើងអាចវាយតម្លៃថា ផលប៉ះពាល់ពីកូវីដ-១៩ បានថយចុះច្រើន ហើយសេដ្ឋកិច្ចកម្ពុជាកំពុងងើបឡើងវិញសន្សឹម»។
លោកបន្ថែមថា យ៉ាងណាក្តី CMA នឹងបន្តតាមដាននិន្នាការផ្សេងៗ ដើម្បីការពារផលប៉ះពាល់ណាមួយដែលអាចនឹងកើតឡើងជាយថាហេតុ។
លោក ហួត អៀងតុង ប្រធានអគ្គនាយកធនាគារហត្ថា ដែលជាសមាជិករបស់ CMA ដែរនោះបាននិយាយថា ធនាគារហត្ថា បានរៀបចំឥណទានឡើងវិញជូនដល់អតិថិជនស្ទើរគ្រប់គ្នាហើយ ដោយការរៀបចំឥណទាននេះបានជួយសម្រួលយ៉ាងច្រើនដល់ពលរដ្ឋ និងធនាគារនៅអំឡុងពេលវិបត្តិកូវីដ ១៩ នេះ។
លោកអះអាងថា៖ «សម្រាប់ខាងធនាគារយើង អតិថិជនដែលមកស្នើសុំរៀបចំឥណទានឡើងវិញ លែងសូវមានច្រើនដូចមុនទៀតហើយ។ ការធ្វើឥណទានឡើងវិញគឺផ្តល់ពេលឱ្យអតិថិជនក្នុងការរក្សាសាច់ប្រាក់ ដើម្បីពង្រឹងអាជីវកម្ម»។
ទោះយ៉ាងណា បើតាមលោក តុងងី គោលនយោបាយរៀបចំឥណទានឡើងវិញនឹងផុតកំណត់ត្រឹមដំណាច់ឆ្នាំ ២០២១ ប៉ុន្តែវិស័យហិរញ្ញវត្ថុទាំងមូលកំពុងសិក្សាជាមួយស្ថាប័នពាក់ព័ន្ធក្នុងការពន្យារគោលនយោបាយនេះ ដោយសារអតិថិជនមួយចំនួននៅតែរងផលប៉ះពាល់នៅឡើយ។
យោងតាមធនាគារជាតិក្នុងឆមាសទី១ ឆ្នាំ ២០២១ គ្រឹះស្ថានធនាគារ និងហិរញ្ញវត្ថុកម្ពុជាបានរៀបចំឥណទានឡើងវិញក្នុងទំហំប្រមាណ ២២,២ ពាន់ពាន់លានរៀល ស្មើនឹង ៥,៥ ពាន់លានដុល្លារ៕ LA