.jpg)
ទិដ្ឋភាពខេត្តព្រះសីហនុ កាលពីឆ្នាំ ២០១៩។ រូបថត Rashim
ភ្នំពេញៈ លោក ឡុង ឌីម៉ង់ អភិបាលរងខេត្តព្រះសីហនុមានសុទិដ្ឋិនិយមថា ខេត្តព្រះសីហនុនឹងក្លាយជាប៉ូលសេដ្ឋកិច្ចសំខាន់មួយក្នុងចំណោមប៉ូលសេដ្ឋកិច្ចសំខាន់របស់កម្ពុជា បន្ទាប់ពីរដ្ឋាភិបាលសម្រេចឱ្យក្រុមហ៊ុនចិន រៀបចំផែនការមេដើម្បីអភិវឌ្ឍ និងប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង។
កាលពីថ្ងៃទី ១៧ តុលា រដ្ឋាភិបាលកម្ពុជាតាមរយៈក្រសួងសេដ្ឋកិច្ច និងហិរញ្ញវត្ថុ បានសម្រេចជ្រើសរើសវិទ្យាស្ថាននគរូបនីយកម្ម និងឌីហ្សាញស៊ិនជិន (UPDIS) របស់ប្រទេសចិនដើម្បីរៀបចំផែនការមេសម្រាប់អភិវឌ្ឍ និងប្រែក្លាយខេត្តព្រះសីហនុទៅជា «តំបន់សេដ្ឋកិច្ចពិសេសគំរូពហុបំណង» ដែលជាមជ្ឈមណ្ឌលនវានុវត្តន៍ថ្មី និងជាមជ្ឈមណ្ឌលឡូជីស្ទិក និងរមណីយដ្ឋានក្នុងតំបន់។
ផែនការមេនេះអាចចំណាយពេលសិក្សា ១៨ ខែ គឺជាផែនទីបង្ហាញផ្លូវដ៏សំខាន់សម្រាប់អភិវឌ្ឍក្រុងព្រះសីហនុទៅជា «ទីក្រុង Shenzhen ទី ២» ស្របតាមគោលនយោបាយអភិវឌ្ឍន៍ឧស្សាហកម្ម ឆ្នាំ ២០១៥-២០២៥។
លោក ឡុង ឌីម៉ង់ បានសរសេរនៅលើបណ្តាញសង្គមហ្វេសហ៊ុកផ្លូវការលោក បន្ទាប់ពីកិច្ចប្រជុំរវាងក្រុមការងារនៃអគ្គលេខាធិការដ្ឋានគណៈកម្មាធិការសម្របសម្រួលអន្ដរក្រសួងរៀបចំផែនការមេអភិវឌ្ឍខេត្ដព្រះសីហនុកាលពីថ្ងៃទី ១២ វិច្ឆិកាថា ក្នុងបណ្ដាប៉ូលសេដ្ឋកិច្ចដែលមានកាលានុវត្តភាពសំខាន់ៗរបស់កម្ពុជា ខេត្តព្រះសីហនុជាតំបន់ដែលមានឧត្ដមភាពលេចធ្លោសម្រាប់ការអភិវឌ្ឍ។ លោកបន្តថា ជាមួយនឹងកាលានុវត្តភាពនេះ ខេត្តព្រះសីហនុបានក្លាយជាខេត្តបានទទួលការយកចិត្តទុកដាក់ខ្ពស់ក្នុងការរៀបចំគោលនយោបាយអភិវឌ្ឍន៍។
លោកបញ្ជាក់ថា៖ «ផែនការមេ គឺជាត្រីវិស័យក្នុងការអភិវឌ្ឍខេត្តព្រះសីហនុឱ្យទៅជាតំបន់សេដ្ឋកិច្ចគំរូពហុបំណង និងជាប៉ូលសេដ្ឋកិច្ចសំខាន់ដើម្បីបម្រើឱ្យខ្សែចង្វាក់ផលិតកម្មក្នុងតំបន់សំដៅជំរុញកំណើនសេដ្ឋកិច្ច ការអភិវឌ្ឍសង្គម និងការការពារបរិស្ថានប្រកបដោយចីរភាព និងនិរន្តរភាព»។
លោកបន្តថា៖ «កត្តាភូមិសាស្ត្រ និន្នាការវិវឌ្ឍន៍ថ្មីៗសេដ្ឋកិច្ចសកល និងចរន្តបំផ្លាស់ទីនៃប្រភេទឧស្សាហកម្មក្នុងពិភពលោកមួយចំនួនមកកាន់តំបន់អាស៊ី ដែលបណ្ដាលពីសង្គ្រាមពាណិជ្ជកម្មរវាងមហាអំណាចធំៗ ខេត្តព្រះសីហនុនឹងកាន់តែមានសក្តានុពលខ្ពស់ក្នុងការទាក់ទាញ និងស្រូបយកវិនិយោគពីខាងក្រៅ និងអាចក្លាយទៅជាក្បាលម៉ាស៊ីន ឬជាក្បាលនាគជំរុញកំណើនសេដ្ឋកិច្ចជាតិយើង»។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន កាលពីខែតុលា និយាយថា កម្ពុជាបានកំណត់ចក្ខុវិស័យក្នុងការប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង និងជាប៉ូលសេដ្ឋកិច្ចដ៏សំខាន់សម្រាប់ទាក់ទាញ និងស្រូបយកការវិនិយោគពីបរទេសដែលអាចក្លាយជា «ក្បាលម៉ាស៊ីនស្នូល» ថ្មីមួយសម្រាប់ជំរុញកំណើនសេដ្ឋកិច្ចជាតិ។
លោកបានថ្លែងថា៖ «ខ្ញុំជឿជាក់លើ UPDIS ដែលមានបទពិសោធជាង ៣០ ឆ្នាំ និងបានបញ្ចប់គម្រោងប្រមាណ ៥ ៨០០ គម្រោងជុំវិញពិភពលោក ជាពិសេសជាស្ថាប័នឈានមុខគេក្នុងការរៀបចំផែនការមេរបស់ទីក្រុង Shenzhen ដែលនឹងប្រើប្រាស់បទពិសោធនេះដើម្បីរៀបចំផែនការមេប្រកបដោយគុណភាពខ្ពស់សម្រាប់អភិវឌ្ឍខេត្តព្រះសីហនុឱ្យក្លាយទៅជាតំបន់សេដ្ឋកិច្ចពិសេសគំរូពហុបំណង តាមរយៈការបង្ហាញពីចក្ខុវិស័យ និងទិសដៅអភិវឌ្ឍន៍សម្រាប់កម្ពុជា»៕ LA
