ភ្នំពេញៈ ក្រុមហ៊ុន Smart Axiata ដែលជាប្រតិបត្តិករទូរគមនាគមន៍ចល័តឈានមុខគេនៅកម្ពុជា បានវិនិយោគទឹកប្រាក់ប្រមាណ ១,៨៨ ពាន់លានដុល្លារលើហេដ្ឋារចនាសម្ព័ន្ធទូរគមនាគមន៍នៅប្រទេសកម្ពុជា និងបានរួមចំណែកបង់ពន្ធដែលមានទឹកប្រាក់ជាង ៥៦២ លានដុល្លារដល់រាជរដ្ឋាភិបាលក្នុងរយៈជាង ១ ទសវត្សរ៍មកនេះ ចាប់ពីក្រុមហ៊ុនបានចាប់ដំណើរការក្នុងឆ្នាំ ២០០៨។
យោងការចេញផ្សាយរបាយការណ៍និរន្តរភាព ២០២០ ដែលភ្នំពេញប៉ុស្ដិ៍ទទួលបានកាលពីថ្ងៃទី ១៥ ខែវិច្ឆិកា គិតត្រឹមដំណាច់ឆ្នាំ ២០២០ ក្រុមហ៊ុន Smart Axiata បានវិនិយោគទឹកប្រាក់ប្រមាណ ១,៨៨ ពាន់លានដុល្លារលើហេដ្ឋារចនាសម្ព័ន្ធទូរគមនាគមន៍ ដើម្បីផ្សារភ្ជាប់ទំនាក់ទំនងនៅកម្ពុជា។
ក្រុមហ៊ុន Smart Axiata បានបង់ពន្ធចំនួន ៩៥ លានដុល្លារលើពន្ធអាករ និងកម្រៃនិយតកម្មកាលពីឆ្នាំ ២០២០ ហើយនៅតែបន្តជាជម្រើសនៃនិយោជកក្នុងប្រទេសកម្ពុជាដោយគាំទ្រដល់ការងារចំនួន ៥៦ ពាន់កន្លែងកាលពីឆ្នាំ ២០២០ ដោយផ្ទាល់។
ក្រុមហ៊ុនបញ្ជាក់៖ «សម្រាប់ក្រុមហ៊ុន Smart Axiata របៀបវារៈដ៏សំខាន់របស់ខ្លួនក្នុងការអភិវឌ្ឍកម្ពុជាគឺជាការប្តេជ្ញាចិត្តក្នុងការបង្កើតអនាគតឌីជីថលរបស់កម្ពុជាជាមួយការវិនិយោគជាបន្តបន្ទាប់ទៅលើហេដ្ឋារចនាសម្ព័ន្ធសំខាន់ៗនានាក៏ដូចជាការគាំទ្រដល់អាជីវកម្មឌីជីថលទើបបង្កើតថ្មីដែលត្រូវប្រសិទ្ធនាមថា «សហគ្រិនបច្ចេកវិទ្យា»។
ក្រុមហ៊ុនបន្តថា៖ «ដោយបានដាក់សាកល្បងប្រកបដោយជោគជ័យនូវបច្ចេកវិទ្យា 5G នៅប្រហែល ២០ កន្លែងក្នុងរាជធានី-ភ្នំពេញក្រុមហ៊ុន Smart នឹងសហការជាមួយអាជ្ញាធរយ៉ាងជិតស្និទ្ធក្នុងការដាក់ឱ្យដំណើរការបច្ចេកវិទ្យា 5G នៅក្នុងប្រទេសកម្ពុជា ដើម្បីនាំមុខក្នុងការផ្តល់លទ្ធភាពឱ្យកាន់តែទូលំទូលាយក្នុងការអភិវឌ្ឍ បច្ចេកវិទ្យាដ៏គួរឱ្យរំភើបនេះក្នុងប្រទេសកម្ពុជា»។
លោក Feiruz Ikhwan នាយកប្រតិបត្តិស្តីទីរបស់ Smart Axiata បានឱ្យដឹងថា៖ «នៅ Smart Axiata យើងយល់ថា នេះគឺជាបេសកកម្មរបស់ពួកយើងក្នុងការបន្តភ្ជាប់ទំនាក់ទំនងរបស់ប្រជាជនកម្ពុជា និងការវិនិយោគលើផ្នែកនានាដែលផ្តល់អត្ថប្រយោជន៍ដល់សេដ្ឋកិច្ចកម្ពុជាជាពិសេសក្នុងពេលកសាងអនាគតឌីជីថលដ៏មានឥទ្ធិពលរបស់កម្ពុជា»។
ទន្ទឹមនឹងនេះ កង្វះនៃការអភិវឌ្ឍហេដ្ឋារចនាសម្ព័ន្ធក្នុងវិស័យទូរគមនាគមន៍កំពុងបង្កការរំខាននៃការផ្តល់សេវាក្នុងឧស្សាហកម្មមួយនេះ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍កាលពីខែមិថុនា បានអំពាវនាវឱ្យប្រតិបត្តិករទូរគមនាគមន៍ និងក្រុមហ៊ុនផ្តល់សេវាអ៊ីនធឺណិតដាក់ការវិនិយោគបន្ថែមទៀត ដើម្បីឆ្លើយតបនឹងការកើនឡើងយ៉ាងខ្លាំងនៃតម្រូវការអ្នកប្រើប្រាស់។
លោក វ៉ាន់ដេត បានថ្លែងថា៖ «ក្រុមហ៊ុនស្វែងរកប្រាក់ចំណេញ ដើម្បីដាក់ហោប៉ៅផ្ទាល់ខ្លួនរបស់ពួកគេតែប៉ុណ្ណោះ ដោយមិនខ្វល់នឹងការដាក់ពង្រាយឧបករណ៍បន្ថែមនោះទេ»។
គិតត្រឹមខែមេសា ឆ្នាំ ២០២១ កម្ពុជាមានប្រតិបត្តិករទូរស័ព្ទចំនួន ៥ គឺ ក្រុមហ៊ុន Smart, Cellcard, Viettel, Cootel និង Seatel ដោយមានអតិថិជនជាវអ៊ីនធឺណិតចល័តចំនួន ១៧,៤៨ លាននាក់គិតត្រឹមខែមេសា ឆ្នាំ ២០២១ ខណៈពេលដែលអតិថិជនអ៊ីនធឺណិតខ្សែមានចំនួន ២៣៦ ៩៦២ នាក់៕ LA