.jpg)
វិភាគដោយ៖ លោក ញឹម កុសល ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល
តម្លៃប្រេងឆៅបានកើនឡើងលើសពី ៨០ ដុល្លារក្នុង ១ បារ៉ែល ដោយសារមានតម្រូវការប្រេងឥន្ធនៈខ្ពស់ និងកង្វះខាតការផ្គត់ផ្គង់ បន្ទាប់ពីស្ថានភាពសេដ្ឋកិច្ចពិភពលោកបានងើបឡើងវិញពីជំងឺរាតត្បាត។ បច្ចុប្បន្នតម្លៃប្រេងឆៅត្រូវបានជួញដូរក្នុងចន្លោះ ៨៥,៣៨ ដុល្លារ (កម្រិតខ្ពស់ក្នុងខែតុលា) ទៅ ៧៨ ដុល្លារ (កម្រិតទាបក្នុងខែវិច្ឆិកា)។ នៅដើមខែវិច្ឆិកាវិញ តម្លៃប្រេងត្រូវបានជួញដូរដល់កម្រិតខ្ពស់ ៨៤,៩២ ដុល្លារ បន្ទាប់ពីអង្គការ OPEC+ បានបដិសេធការអំពាវនាវពីប្រធានាធិបតីអាមេរិកលោក Joe Biden លើការផលិតប្រេងបន្ថែមទៀត ដើម្បីទប់ស្កាត់ការកើនឡើងនៃតម្លៃប្រេង និងឧស្ម័ន។
យោងតាមគេហទំព័រ foxbusiness.com លោក Jennifer Granholm ដែលជាលេខាធិការផ្នែកថាមពលរបស់លោក Joe Biden បានបញ្ជាក់ថា៖ «ប្រេង គឺជាទីផ្សារពិភពលោក ដែលត្រូវបានគ្រប់គ្រងដោយក្រុមជួញដូរ (អង្គការ OPEC) ហើយពួកគេបានសម្រេចចិត្តថានឹងមិនបង្កើនកម្រិតផលិតកម្មឱ្យលើសពីអ្វីដែលបានគ្រោងទុកនោះទេ»។
ម្យ៉ាងវិញទៀត កាលពីសប្តាហ៍មុន អង្គការ OPEC ក៏បានកាត់បន្ថយការព្យាករតម្រូវការប្រេងពិភពលោករបស់ខ្លួនសម្រាប់ត្រីមាសទី ៤ ត្រឹម ៣៣០ ០០០ បារ៉ែលក្នុង ១ ថ្ងៃពីការព្យាករកាលពីខែមុន ខណៈដែលតម្លៃថាមពលខ្ពស់បានរារាំងដល់ការងើបឡើងវិញនៃសេដ្ឋកិច្ចពិភពលោក។ ប៉ុន្ដែ បើផ្អែកតាមការវិភាគផ្នែកបច្ចេកទេសទៅលើតារាងតម្លៃប្រចាំថ្ងៃវិញ តម្លៃប្រេងឆៅកំពុងស្ថិតក្នុងទិសដៅធ្លាក់ចុះ ឆ្ពោះទៅតម្លៃប្រែប្រួលជាមធ្យមក្នុងរយៈពេល ៥០ ថ្ងៃ ក្នុងតម្លៃ ៧៧,៨៦ ដុល្លារ ខណៈពេលតម្លៃប្រែប្រួលជាមធ្យមក្នុងរយៈពេល ២០០ ថ្ងៃ គឺ ៦៨,៩៨ ដុល្លារ។
ដូច្នេះ សម្រាប់ការវិភាគជួញដូរក្នុងសប្តាហ៍នេះ វិនិយោគិនអាចស្វែងរកឱកាសជួញដូរដោយលក់តម្លៃប្រេងឆៅក្នុងចន្លោះពី ៨០,៥០ ដុល្លារ ទៅ ៧៦ ដុល្លារ ដោយកំណត់មុខងារបញ្ឈប់ហានិភ័យនៅតម្លៃ ៨២ ដុល្លារ និងមុខងារកាត់យកប្រាក់ចំណេញនៅតម្លៃ ៧៦ ដុល្លារ៕
