.jpg)
កម្មករ-កម្មការិនីធ្វើការក្នុងរោងចក្រ ១ កន្លែងក្នុងរាជធានីភ្នំពេញ។ ហុង មិនា
ភ្នំពេញ៖ មន្ត្រីជាន់ខ្ពស់នៃក្រសួងពាណិជ្ជកម្មឱ្យដឹងថា សភាពាណិជ្ជកម្មអឺរ៉ុបប្រចាំនៅកម្ពុជាបានរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ច និងសង្គមកម្ពុជា តាមរយៈការផ្តល់ហិរញ្ញប្បទាន ការគាំទ្របច្ចេកទេស ការរៀបចំព្រឹត្តិការណ៍ជំរុញពាណិជ្ជកម្ម។
យោងតាមការផ្សព្វផ្សាយរបស់ក្រសួងពាណិជ្ជកម្មនៅថ្ងៃទី ១៨ ខែវិច្ឆិកានេះ លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម នៅក្នុងពិធីថ្លែងសុន្ទរកថាបើកក្នុងសិក្ខាសាលាផ្សព្វផ្សាយស្តីពីកម្ពុជា “ការស្វែងយល់ពីនិន្នាការ និងកាលានុវត្តភាពធុរកិច្ចនៅកម្ពុជា” តាមប្រព័ន្ធវីដេអូ ឱ្យដឹងថា ក្រៅពីនេះ សភាពាណិជ្ជកម្មអឺរ៉ុប ក៏បានជួយបោះពុម្ពផ្សាយ ឯកសារអេឡិចត្រូនិក ស្តីពី “e-Sourcing from Cambodia” និង “e-Business Opportunities in Cambodia”ផងដែរ។
លោកស្រីបានបន្តថា ការបោះពុម្ពផ្សាយនេះ បានគូសបញ្ជាក់ពីព្រឹត្តិការណ៍សំខាន់ៗ ដែលគ្រោងនឹងរៀបចំនៅកម្ពុជា ជាពិសេសវេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១ (AEEBF1) ដែលនឹងរៀបចំដោយក្រសួងពាណិជ្ជកម្ម ក្រោមកិច្ចសហការជាមួយក្រុមប្រឹក្សាអភិវឌ្ឍន៍កម្ពុជា សភាពាណិជ្ជកម្មនៅកម្ពុជា និងស្ថាប័នដៃគូទូទាំងតំបន់អាស៊ី និងអឺរ៉ុប នៅថ្ងៃទី ២៤ ខែ វិច្ឆិកា ឆ្នាំ ២០២១ តាមប្រព័ន្ធវីដេអូ។
លោកស្រីបន្តថា ស្របតាមឱកាសដែលកម្ពុជានឹងធ្វើជាប្រធានអាស៊ាន និងរៀបចំកិច្ចប្រជុំកំពូលធុរកិច្ច និងវិនិយោគអាស៊ាន នៅឆ្នាំ ២០២២ រាជរដ្ឋាភិបាលកម្ពុជា និងក្រសួងពាណិជ្ជកម្ម មានសុទិដ្ឋិនិយមចំពោះកិច្ចខិតខំប្រឹងប្រែងរួមគ្នា ក្នុងការពន្លឿនសមាហរណកម្មតំបន់ និងសកល ដើម្បីគាំទ្រដល់ការស្តារសេដ្ឋកិច្ចឡើងវិញ និងការអភិវឌ្ឍសេដ្ឋកិច្ច និងសង្គមប្រកបដោយចីរភាព។
បើតាម លោកស្រី តឹករ៉េត កំរង ទន្ទឹមនឹងនេះ វិស័យឯកជន មីក្រូសហគ្រាស សហគ្រាសខ្នាតតូច និងមធ្យម បានដើរតួយ៉ាងសំខាន់ និងជាកត្តាលីករជួយជំរុញការស្តារសេដ្ឋកិច្ចកម្ពុជាឡើងវិញ ក្រោយពីជំងឺកូវីដ ១៩ កំណើនប្រកបដោយចីរភាព និងបរិយាប័ន្ន និងការឈានដល់ការសម្រេចបាននូវចក្ខុវិស័យរបស់កម្ពុជាឆ្នាំ ២០៣០ និង ២០៥០៕
