The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋមន្រ្តី​ក្រសួង​ពាណិជ្ជកម្ម ប្រាប់​ប្រទេស​ដៃគូ​ពី​ភាព​ជោគជ័យ​នៃ​ការ​ចាក់​វ៉ាក់សាំង​កូវីដ១៩ នៅ​កម្ពុជា

រដ្ឋមន្រ្តី​ក្រសួង​ពាណិជ្ជកម្ម ប្រាប់​ប្រទេស​ដៃគូ​ពី​ភាព​ជោគជ័យ​នៃ​ការ​ចាក់​វ៉ាក់សាំង​កូវីដ១៩ នៅ​កម្ពុជា

Content image - Phnom Penh Post
រដ្ឋមន្រ្តី​ក្រសួង​ពាណិជ្ជកម្ម និង​ជា​រដ្ឋមន្រ្តី​សេដ្ឋកិច្ច​អាស៊ាន​សម្រាប់​កម្ពុជា លោក ប៉ាន សូរស័ក្តិ។ រូបថត ហ្វេសប៊ុក

រដ្ឋមន្រ្តី​ក្រសួង​ពាណិជ្ជកម្ម ប្រាប់​ប្រទេស​ដៃគូ​ពី​ភាព​ជោគជ័យ​នៃ​ការ​ចាក់​វ៉ាក់សាំង​កូវីដ១៩ នៅ​កម្ពុជា

ភ្នំពេញៈ រដ្ឋមន្រ្តី​ក្រសួង​ពាណិជ្ជកម្ម និង​ជា​រដ្ឋមន្រ្តី​សេដ្ឋកិច្ច​អាស៊ាន​សម្រាប់​កម្ពុជា លោក ប៉ាន សូរស័ក្តិ បាន​លើកឡើងថា វឌ្ឍនភាព​ចុងក្រោយ​នៃ​យុទ្ធនាការ​ចាក់វ៉ាក់សាំង​ប្រឆាំង​នឹង​ជំងឺ​កូវីដ១៩ ទូទាំង​ប្រទេស​កម្ពុជា គឺ​មាន​ភាព​ល្អ​ប្រសើរ​ខ្លាំង។

ការ​លើក​ឡើង​នេះ​ត្រូវ​បាន​ធ្វើ​ឡើង​ក្នុង​ឱកាស​ដែល​លោក​ដឹក​នាំ​គណៈប្រតិភូ​កម្ពុជា​ចូលរួម​ក្នុង​កិច្ច​ប្រជុំ​ពិគ្រោះ​យោបល់​រដ្ឋមន្ត្រី​សេដ្ឋកិច្ច​អាស៊ាន-កាណាដា លើកទី​១០ តាម​ប្រព័ន្ធ​វីដេអូ ( 10th AEM-Canada Consultations, Virtually) កាល​ពី​ថ្ងៃទី​១៧ ខែ​វិច្ឆិកា ឆ្នាំ២០២១។

លោក សូរស័ក្តិ បាន​លើក​ឡើង​ថា យុទ្ធនាការ​នៃ​ការ​ចាក់​វ៉ាក់សាំង​ប្រឆាំង​នឹង​ជំងឺ​កូវីដ១៩ នៅ​កម្ពុជា​កំពុង​ទទួល​បាន​លទ្ធផល​វិជ្ជមាន​ជា​ខ្លាំង។ តាម​រយៈលទ្ធផលនេះ​បាន​ជំរុញ​ឱ្យ​ប្រទេស​កម្ពុជា​សម្រេច​ធ្វើ​ការ​លើកលែង​នូវ​លក្ខខណ្ឌ​តម្រូវ​ក្នុង​ការ​ធ្វើ​ចត្តាឡីស័ក​សម្រាប់​ជន​គ្រប់​រូប(ធ្វើ​តេស្ត​រហ័ស​ដោយ​ទទួល​លទ្ធផល​អវិជ្ជមាន) ដែល​បាន​ចាក់​វ៉ាក់សាំង​គ្រប់​ចំនួន​ដូស ហើយ​មាន​បំណង​ធ្វើ​ដំណើរ​ចូល​មក​ប្រទេស​កម្ពុជា។

សូមបញ្ជាក់ថា កិច្ច​ប្រជុំ​ពិគ្រោះ​យោបល់​រដ្ឋមន្ត្រី​សេដ្ឋកិច្ច​អាស៊ាន-កាណាដា លើក​ទី​១០ នេះ​ត្រូវ​បាន​ដឹកនាំ​ដោយ លោក Awang Haji Mohd Amin Liew Bin Abdullah រដ្ឋមន្ត្រី​នៃ​ខុទ្ទកាល័យ​នាយក​រដ្ឋមន្រ្តី និង​ជារ​ដ្ឋមន្រ្តី​ទី២ នៃ​ក្រសួង​ហិរញ្ញវត្ថុ និង​សេដ្ឋកិច្ច នៃប្រទេស​ព្រុយណេ ព្រម​ទាំង​មាន​ការ​ចូលរួម​ពី​រដ្ឋមន្រ្តី​សេដ្ឋកិច្ច​អាស៊ាន​ទាំងអស់ តំណាង​ក្រុម​ប្រឹក្សាធុរកិច្ច​អាស៊ាន-កាណាដា ព្រម​ទាំង​អគ្គលេខាធិការ​អាស៊ាន​ផងដែរ។

យោង​តាម​ក្រសួង​ពាណិជ្ជកម្ម បញ្ហា​សំខាន់ៗ​ដែល​ត្រូវ​បាន​លើក​យក​មក​ពិភាក្សា​រួម​មាន ការ​កត់​សម្គាល់​លើ​អនុសាសន៍​ដែល​លើក​ឡើងដោយ​ក្រុម​ប្រឹក្សា​ធុរកិច្ច​ កាណាដា-អាស៊ាន ដើម្បី​បន្ត​សហការ​ជំរុញ​វិស័យ​ធុរកិច្ច និង​វិនិយោគ​រវាង​អាស៊ាន និង​កាណាដា, ការ​ផ្លាស់​ប្តូរ​ទស្សនៈ​អំពី​ផល​ប៉ះពាល់​សេដ្ឋកិច្ច​នៃ​ជំងឺ​កូវីដ១៩ និង​កិច្ចសហប្រតិបត្តិការ​ដើម្បី​កាត់​បន្ថយ​ផល​ប៉ះពាល់​ពី​ភាគី​ទាំងអស់ និង​ដោះស្រាយ​រាល់ការ​រំខាន​នានា​ចំពោះ​ខ្សែ​ច្រវាក់​ផ្គត់ផ្គង់​តំបន់ និង​សម្រួល​ដល់​លំហូរ​ទំនិញ​ចាំបាច់​ឆ្លង​កាត់​ព្រំដែន, ការ​កត់​សម្គាល់​អំពី​វឌ្ឍនភាព​នៃ​ការ​អនុវត្តផែនការ​ការងារ​ឆ្នាំ ២០២១-២០២៥ នៃ​សេចក្តី​ថ្លែងការណ៍​រួម​អាស៊ាន-កាណាដា ស្តីពី​ពាណិជ្ជកម្ម និង​ការ​វិនិយោគ, និង​ការ​កត់​សម្គាល់​លើស្ថានភាព​នៃ​គម្រោង​កសាង​សមត្ថភាព​ក្រោម​យន្តការ​ដាក់​ពង្រាយ​អ្នក​ជំនាញ​សម្រាប់​ពាណិជ្ជកម្ម និង​ការ​អភិវឌ្ឍ (EDM) និង​កិច្ច​សន្ទនាគោល​នយោបាយ​ពាណិជ្ជកម្ម៕

អត្ថបទគួរចាប់អារម្មណ៍