ភ្នំពេញៈ រដ្ឋមន្ត្រីក្រសួងទេសចរណ៍ និងជាប្រធានក្រុមការងាររាជរដ្ឋាភិបាល និងឯកជន ដើម្បីស្តារ និងលើកស្ទួយវិស័យទេសចរណ៍ក្នុង និងក្រោយវិបត្តិជំងឺកូវីដ ១៩ លោក ថោង ខុន បានណែនាំឱ្យមន្ទីរជំនាញ និងផ្នែកពាក់ព័ន្ធ ត្រូវខិតខំយកចិត្តបន្តជំរុញទេសចរណ៍ផ្ទៃក្នុងឱ្យបានកាន់តែខ្លាំងថែមទៀត។
ការលើកឡើងនេះត្រូវបានធ្វើឡើងកាលពីថ្ងៃទី ១៧ ខែវិច្ឆិកា ឆ្នាំ ២០២១ ក្នុងឱកាសនៃកិច្ចប្រជុំផ្សព្វផ្សាយ «ការទទួលទេសចរអន្តរជាតិ និងអ្នកដំណើរដែលបានចាក់វ៉ាក់សាំងកូវីដ ១៩ ពេញលេញចូលក្នុងព្រះរាជាណាចក្រកម្ពុជា» នៅសណ្ឋាគារសុខា ខេត្តសៀមរាប។
លោក ថោង ខុន បានលើកឡើងថា ក្នុងអំឡុងពេលនៃការឈប់សម្រាកព្រះរាជពិធីបុណ្យអុំទូក រហូតដល់ចុងសប្តាហ៍នេះនឹងមានប្រជាពលរដ្ឋ និងភ្ញៀវទេសចរផ្ទៃក្នុងជាច្រើនធ្វើដំណើរកម្សាន្ត នៅគោលដៅទេសចរណ៍នានាទូទាំងប្រទេស ដែលបានបើកដំណើរការតាមគន្លងប្រក្រតីភាពថ្មី ដែលបង្កើតបានជាឱកាសសម្រាប់ទ្រទ្រង់ដល់ការងើបឡើងវិញ ពេញលេញនៃវិស័យទេសចរណ៍ និងវិស័យសេដ្ឋកិច្ចផ្សេងៗ។ លោកបន្តថា ទោះយ៉ាងណាដើម្បីធានាបាននូវសុខសុវត្ថិភាព និងអាចទប់ស្កាត់ការរីករាលដាលជំងឺកូវីដ ១៩ ក្នុងសហគមន៍ គឺទាមទារឱ្យមានការយកចិត្តដាក់ឱ្យបានខ្លាំងពីគ្រប់ភាគីពាក់ព័ន្ធទាំងអស់។
លោកនិយាយថា៖ «សូមគ្រប់ភាគីពាក់ព័ន្ធ ទាំងមូលដ្ឋានអាជីវកម្ម មន្ទីរទេសចរណ៍ និងភ្ញៀវទេសចរត្រូវខិតខំចូលរួមអនុវត្តនូវវិធានការ «៣ការពារ និង៣កុំ» វិធានសុខាភិបាល វិធានសុវត្ថិភាពទេសចរណ៍ និងនីតិប្រតិស្តង់ដាអប្បបរមា (SOP) របស់ក្រសួងទេសចរណ៍ វិធានការរដ្ឋបាល និងវិធានការច្បាប់ឱ្យបានហ្មត់ចត់»។
បន្ថែមពីលើនេះលោកក៏បានជំរុញឱ្យក្រុមហ៊ុនអាកាសចរណ៍នានារៀបចំការហោះហើរក្នុងស្រុកឡើងវិញ ដើម្បីតភ្ជាប់គោលដៅសំខាន់ៗក្នុងប្រទេស។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានប្រាប់ភ្នំពេញប៉ុស្តិ៍ថា វិស័យឯកជនបានរៀបចំរួចហើយក្នុងការចាប់ផ្តើមទទួលភ្ញៀវទេសចរចាក់វ៉ាក់សាំងគ្រប់ដូស ទាំងក្នុងស្រុក និងក្រៅស្រុក ដោយនឹងអនុវត្តតាមសេចក្តីណែនាំរបស់ក្រសួងទេសចរណ៍ ក្រសួងសុខាភិបាល និងផ្នែកពាក់ព័ន្ធដទៃទៀត។ លោកស្រីប្រាប់ទៀតថា នៅពេលនេះវិស័យទេសចរណ៍នៅកម្ពុជាក៏មាននូវផលិតផលទេសចរណ៍ថ្មីៗជាច្រើនសម្រាប់ភ្ញៀវផងដែរ៕