ភ្នំពេញៈ ចំនួនភ្ញៀវទេសចរដើរកម្សាន្តក្នុងថ្ងៃទី ២ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មានចំនួនជាង ៣៣ ម៉ឺននាក់ កើនជាង ១៥២ ភាគរយបើធៀបនឹងថ្ងៃទី ១។ នេះបើយោងតាមទិន្នន័យក្រសួង ទេសចរណ៍។
ទិន្នន័យបង្ហាញថា ក្នុងថ្ងៃឈប់សម្រាកទី ២ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលត្រូវនឹងថ្ងៃទី ១៩ ខែវិច្ឆិកា ឆ្នាំ ២០២១ មានភ្ញៀវទេសចរសរុប ៣៣២ ៨៧៥ នាក់ បានចេញដើរកម្សាន្តក្នុងនោះភ្ញៀវជាតិមានចំនួន ៣២៨ ៤១២ នាក់ និងភ្ញៀវបរទេសផ្ទៃក្នុង ៤ ៤៦៣ នាក់។ ចំនួននេះកើនឡើង ១៥២,១៥ ភាគរយបើធៀបនឹងថ្ងៃទី ១ ដែលធ្វើឱ្យចំនួនសរុបរយៈពេល ២ ថ្ងៃកន្លងមក កើនដល់ ៤៦៤ ៨៨៨ នាក់។
យោងតាមក្រសួងទេសចរណ៍គោលដៅទេសចរណ៍សំខាន់ៗសម្រាប់ថ្ងៃឈប់សម្រាកទី ២ រួមមាន រាជធានីភ្នំពេញ ៦៦ ៧៥០ នាក់, ខេត្តសៀមរាប ៤៧ ៧០២ នាក់, ខេត្តព្រះសីហនុ ៤៤ ២៤២ នាក់, ខេត្តកំពត ៣៣ ២៥២ នាក់, ខេត្តកែប ២៩ ១១៧ នាក់, ខេត្តពោធិ៍សាត់ ២១ ៣១៣ នាក់, ខេត្តបាត់ដំបង ១១ ១៨៩ នាក់, ខេត្តមណ្ឌលគិរី ១០ ៦២០ នាក់ និងខេត្តរតនគិរី ១០ ១៧៨ នាក់។
លោក ថោង ខុន រដ្ឋមន្ត្រីក្រសួងទេសចរណ៍បាននិយាយថា ដូចការរំពឹងទុក ចរន្តភ្ញៀវទេសចរនាថ្ងៃឈប់សម្រាកទី ២ នៃព្រះរាជពិធីបុណ្យអុំទូក បានកើនឡើងយ៉ាងច្រើនបើធៀបនឹងថ្ងៃឈប់សម្រាកទី ១។ សកម្មភាពទាំងអស់នេះអាចដំណើរការបាន ក៏ដោយសារតែការសម្រេចរបស់រាជរដ្ឋាភិបាលក្នុងការបើកឱ្យមានសកម្មភាពកម្សាន្តជាច្រើនដំណើរការឡើងវិញ បន្ទាប់ពីបានបិទមួយរយៈ ដើម្បីទប់ស្កាត់ការឆ្លងរាលដាលជំងឺកូវីដ ១៩។
លោកបន្តថា ការបើកដំណើរការសកម្មភាពកម្សាន្តសម្រាប់ភ្ញៀវទេសចរ មិនត្រឹមតែផ្តល់នូវកន្លែងលម្ហែសម្រាប់ភ្ញៀវប៉ុណ្ណោះទេ ប៉ុន្តែថែមទាំងបង្កើនចំណូលរបស់វិស័យឯកជន និងប្រជាពលរដ្ឋនៅ មូលដ្ឋានផ្ទាល់ថែមទៀតផង។
លោកថ្លែងថា៖ «ការចល័តរបស់ភ្ញៀវទេសចរពីខេត្តមួយទៅខេត្តមួយនឹងនៅតែមានសន្ទុះខ្លាំងរហូតដល់ចុងសប្តាហ៍ ស្របពេលដែលការកក់សណ្ឋាគារនៅតាមគោលដៅសំខាន់ៗដូចជាខេត្តព្រះសីហនុ កែប កំពត សៀមរាប មណ្ឌលគិរី និងរតនគិរី គឺនៅតែមានកម្រិតខ្ពស់ គឺស្ថិតនៅចន្លោះពី ៨០-៩០ ភាគរយ»។
លោកបានបន្ថែមទៀតថា ការគ្រប់គ្រងគុណភាពសេវាកម្ម ផលិតផលទេសចរណ៍ បរិស្ថាន អនាម័យ គឺពុំមានបញ្ហាកត់សម្គាល់ណាមួយកើតឡើងទេ ស្របពេលដែលមូលដ្ឋានអាជីវកម្មទេសចរណ៍ភាគច្រើនបានខិតខំផ្តល់សេវាជូនភ្ញៀវទេសចរប្រកបដោយស្តង់ដាសុវត្ថិភាព និងគុណភាព ដើម្បីទប់ស្កាត់ការឆ្លងរាលដាលជំងឺកូវីដ១៩៕
វីដេអូ៖