ភ្នំពេញៈ ភ្ញៀវទេសចរប្រមាណជាង ៩១ ម៉ឺននាក់បានចេញដើរកម្សាន្តតាមរមណីយដ្ឋានទេសចរណ៍នានាក្នុងប្រទេសនាអំឡុងពេល ៣ ថ្ងៃនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ ២០២១ ដោយកើនជាង ៥៤ ភាគរយបើធៀបទៅនឹងអំឡុងព្រះរាជពិធីបុណ្យនេះកាលពីឆ្នាំ ២០២០។ នេះបើយោងតាមទិន្នន័យពីក្រសួងទេសចរណ៍។
ទិន្នន័យបង្ហាញថា នាឱកាសថ្ងៃឈប់រយៈពេល ៣ ថ្ងៃនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ចាប់ពីថ្ងៃទី ១៨-២០ ខែវិច្ឆិកា ឆ្នាំ ២០២១ ភ្ញៀវទេសចរដែលដើរកម្សាន្តនៅទូទាំងប្រទេសមានចំនួនសរុប ៩១០ ១៥០ នាក់ ក្នុងនោះភ្ញៀវជាតិមានចំនួន ៨៩៩ ៨៦៩ នាក់ និងភ្ញៀវបរទេសផ្ទៃក្នុង ១០ ២៨១ នាក់។ ភ្ញៀវដែលដើរកម្សាន្តនៅក្នុងថ្ងៃទី ១ នៃពិធីបុណ្យឆ្នាំនេះមានចំនួន ១៣២ ០១៣ នាក់, ថ្ងៃទី ២ ចំនួន ៣៣២ ៨៧៥ នាក់ និងថ្ងៃទី ៣ ចំនួន ៤៤៥ ២៦២ នាក់។
យោងតាមក្រសួង គោលដៅទេសចរណ៍សំខាន់ៗ រួមមានរាជធានីភ្នំពេញ ១៩៩ ៨៣៥ នាក់, សៀមរាប ១១៨ ១៤៦ នាក់, ព្រះសីហនុ ១១១ ៣២២ នាក់, កំពត ៨៣ ៤៦៦ នាក់, កែប ៧៥ ៨៦៥ នាក់, ពោធិ៍សាត់ ៥៣ ៨០៧ នាក់, បាត់ដំបង ៣៨ ៦៦៧ នាក់, កំពង់ស្ពឺ ៣៧ ៤៦៥ នាក់, មណ្ឌលគិរី ៣២ ៩៥៧ នាក់, ខេត្តកណ្តាល ២៧ ២៨០ នាក់ និងខេត្តរតនគិរី ២៤ ៥៩៦ នាក់។
រដ្ឋមន្ត្រីក្រសួងទេសចរណ៍ លោក ថោង ខុន បានឱ្យដឹងថា ចំនួនភ្ញៀវទេសចររយៈពេល ៣ ថ្ងៃបានស្ទុះកើនឡើងគួរឱ្យកត់សម្គាល់ ហើយភ្ញៀវទេសចរសុទ្ធតែបង្ហាញពីក្តីរីករាយក្នុងការដើរកម្សាន្ត ពិសេសក្រោយការចាក់វ៉ាក់សាំងប្រឆាំងនឹងជំងឺកូវីដ ១៩ បានពេញលេញ និងស្ថានភាពសង្គម និងសេដ្ឋកិច្ចរបស់កម្ពុជាកំពុងត្រឡប់ទៅរកប្រក្រតីភាពថ្មីជាបណ្តើរៗ។
លោក ថោង ខុន បានថ្លែងថា៖ «កត្តាទាំងអស់នេះ សបញ្ជាក់ឱ្យឃើញនូវដំណើរត្រឡប់ទៅរកប្រក្រតីភាពថ្មី និងធ្វើឱ្យមានចរន្តសេដ្ឋកិច្ចមានដំណើរការឡើងវិញ ពិសេសសម្រាប់មូលដ្ឋានអាជីវកម្ម និងវិស័យឯកជន ដែលបានផ្អាកសកម្មភាពនាពេលកន្លងមក»។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ ភ្នំពេញ ប៉ុស្តិ៍ ក្នុងថ្ងៃទី ២១ ខែវិច្ឆិកា ថា កំណើនភ្ញៀវទេសចរដើរកម្សាន្តក្នុងឱកាសពិធីបុណ្យអុំទូកឆ្នាំនេះគឺមាននៅគ្រប់គោលដៅ។ កំណើននេះបណ្តាលមកពីកត្តាមួយចំនួនដូចជា ការធ្លាក់ចុះនៃចំនួនករណីឆ្លងជំងឺកូវីដ ១៩ ការយល់ដឹង និងចូលរួមអនុវត្តវិធានការការពារកូវីដ ១៩ និងការបើកទូលាយពីសំណាក់អាជ្ញាធរក្នុងការដើរកម្សាន្ត។
លោកបញ្ជាក់ថា៖ «នេះជាសញ្ញាល្អសម្រាប់វិស័យទេសចរណ៍កម្ពុជា ហើយក៏អាចជាការសាកល្បងមួយទៀតសម្រាប់ការគ្រប់គ្រងស្ថានភាពនៃការឆ្លងរាលដាលជំងឺកូវីដ ១៩ នៅក្នុងសហគមន៍។ ប្រសិនបើមិនមានការឆ្លងរាលដាលច្រើន ខ្ញុំអាចនិយាយថា គឺជាជោគជ័យដ៏ធំសម្រាប់រដ្ឋាភិបាលនៅក្នុងយុទ្ធនាការនៃការចាក់វ៉ាក់សាំងនៅទូទាំងប្រទេសផងដែរ»។
លោក ហូ វណ្ឌី ប្រធានក្រុមហ៊ុនទេសចរណ៍ វើលដ៏អ៊ិចប្រេស បាននិយាយថា នេះជាព័ត៌មានដ៏ល្អពីការចាប់ផ្តើមបើកដំណើរការវិស័យទេសចរណ៍ឡើងវិញ ហើយក៏ជាព័ត៌មាននាំផ្លូវសម្រាប់ភ្ញៀវបរទេសក្នុងការធ្វើដំណើរមកកម្សាន្តនៅកម្ពុជាក្នុងពេលឆាប់ៗនេះផងដែរ។
លោកបានបញ្ជាក់ថា៖ «នេះជាសម្ទុះមួយដ៏ខ្លាំង និងជាសញ្ញាបង្ហាញពីការវិវត្តឡើងវិញនៃការកម្សាន្តរបស់ប្រជាជនក្នុងស្រុក បន្ទាប់ពីស្ថានភាពជំងឺកូវីដ ១៩ មានភាពធូរស្បើយឡើងវិញ»។
ជាមួយគ្នានេះ លោក វណ្ឌី ក៏បានស្នើឱ្យអ្នកបម្រើការងារក្នុងវិស័យទេសចរណ៍ ប្រជាពលរដ្ឋ ព្រមទាំងអាជ្ញាធរទាំងអស់ត្រូវចូលរួមអនុវត្តឱ្យបានខ្ជាប់ខ្ជួននូវសេចក្តីណែនាំរបស់រដ្ឋាភិបាលក្នុងការប្រយុទ្ធប្រឆាំងនឹងជំងឺកូវីដ ១៩ ក៏ដូចជាចូលរួមជួយទប់ស្កាត់ការលក់ដំឡើងថ្លៃលើសកំណត់ និងការថែរក្សាបរិស្ថានជាដើម៕ LA
វីដេអូ៖