.jpg)
ឧស្សាហកម្មផលិតកង់រថយន្តរបស់ក្រុមហ៊ុន Cart Tire Co., Ltd។ រូបថត សហការី
ភ្នំពេញៈ អ្នកជំនាញបានអះអាងថា ការចាប់ផ្តើមនាំចេញសាកល្បងនូវផលិតផលសម្បកកង់រថយន្តរបស់ក្រុមហ៊ុន Cart Tire Co., Ltd ទៅទីផ្សារអន្តរជាតិ គឺជាការធ្វើពិពិធកម្មទីផ្សារ និងបានផ្តល់នូវទំនុកចិត្ត និងលំនឹងដល់អ្នកដាំដុះ និងវិនិយោគដំណាំកៅស៊ូក្នុងស្រុកបានមួយកម្រិត។
ក្រុមហ៊ុន Cart Tire Co., Ltd ថ្មីៗនេះបានធ្វើការនាំចេញសាកល្បងនូវសម្បកកង់រថយន្តជាលើកដំបូងទៅលក់នៅទីផ្សារអន្តរជាតិ។ Cart Tire Co.,Ltd គឺជាបុត្រសម្ព័ន្ធរបស់ក្រុមហ៊ុន Sailun International Holding (Hong Kong) Co., Ltd ដែលជាក្រុមហ៊ុនចុះបញ្ជីនៅប្រទេសចិន។
លោក ម៉ែន សុភក្តិ ប្រធានក្រុមហ៊ុនវិនិយោគ សុភក្តិនីកា ដែលជាក្រុមហ៊ុនដាំដុះ និងនាំចេញកៅស៊ូ ប្រាប់ភ្នំពេញ-ប៉ុស្តិ៍នៅថ្ងៃទី ២១ ខែវិច្ឆិកាថា ការនាំចេញសម្បកកង់រថយន្តដែលផលិតពីជ័រកៅស៊ូ នៅក្នុងស្រុករបស់ក្រុមហ៊ុន Cart Tire Co., Ltd កាលពីពេលថ្មីៗ គឺជាសញ្ញាល្អមួយសម្រាប់អ្នកនៅក្នុងវិស័យកៅស៊ូកម្ពុជា ដោយវានឹងជួយឱ្យអ្នកដាំដុះ និងវិនិយោគមានសង្ឃឹមថា ទីផ្សារនេះនឹងមានភាពល្អប្រសើរ ខណៈកន្លងមកជ័រកៅស៊ូកម្ពុជា ភាគច្រើនត្រូវបាននាំចេញទៅលក់នៅទីផ្សារក្រៅប្រទេស។
លោកថ្លែងថា៖ «វាបង្ហាញពីចំណុចចាប់ផ្តើមដ៏ល្អ ហើយអ្នកដាំកៅស៊ូនៅកម្ពុជានឹងមានភាពកក់ក្តៅ ព្រោះកន្លងមកទិន្នផលកៅស៊ូកម្ពុជាត្រូវបាននាំចេញស្ទើរតែ ១០០ ភាគរយ។ នៅពេលមានក្រុមហ៊ុនមកវិនិយោគកែច្នៃជ័រកៅស៊ូទៅជាផលិតផលសម្រេច គឺជាការល្អណាស់»។
លោកលើកឡើងទៀតថា ក្រុមហ៊ុន Cart Tire Co., Ltd នឹងចូលរួមប្រមូលទិញផលិតផលកៅស៊ូពីប្រជាកសិករបានមួយចំណែក។
អនុប្រធានសភាពាណិជ្ជកម្មកម្ពុជាលោក លឹម ហេង និយាយថា នេះជារបត់ថ្មីមួយទៀតរបស់ប្រទេសកម្ពុជាដែលមានផលិតផលថ្មីៗកាន់តែច្រើនសម្រាប់នាំចេញទៅទីផ្សារអន្តរជាតិ។ តាមផែនការក្រុមហ៊ុននេះនឹងនាំចេញកង់រថយន្តទៅទីផ្សារប្រទេសជាច្រើនលើពិភពលោកពិសេសទីផ្សារសហរដ្ឋអាមេរិក និងអឺរ៉ុប។
លោកប្រាប់ទៀតថា អ្វីដែលជាលក្ខណពិសេសបំផុតរបស់ក្រុមហ៊ុននេះ គឺការប្រើប្រាស់ផលិតផលជ័រកៅស៊ូក្នុងស្រុក ១០០ ភាគរយ ខណៈនៅពេលរោងចក្រនេះដំណើរការពេញលេញ វានឹងអាចស្រូបយកផលិតផលកៅស៊ូ ក្នុងស្រុករហូតដល់ជិត ៥០ ភាគរយ។
លោកអះអាងថា៖ «វឌ្ឍនភាពរបស់ក្រុមហ៊ុននេះនឹងមិនត្រឹមតែជួយលើកតម្កើងកេរ្តិ៍ឈ្មោះផលិតផលនាំចេញរបស់កម្ពុជាប៉ុណ្ណោះទេ ប៉ុន្តែថែមទាំងជួយអ្នកវិនិយោគ និងដាំកៅស៊ូក្នុងស្រុកទាំងផ្នែកទីផ្សារ និងតម្លៃ»។
លោកបន្ថែមថា ផលិតផលដែលសម្រេចបាននាពេលនេះ ក៏អាចនឹងក្លាយជាអ្នកផ្គង់ផ្គង់សម្រាប់រោងចក្រដំឡើងរថយន្តនៅកម្ពុជា ដែលកំពុងតែកើនឡើងជាបន្តបន្ទាប់។
រដ្ឋាភិបាលកម្ពុជា នៅក្នុងខែវិច្ឆិកានេះបានអនុម័តឱ្យក្រុមហ៊ុនចំនួន ២ គឺ ក្រុមហ៊ុន RMA Automotive (Cambodia) Co., Ltd និងក្រុមហ៊ុន EM Automobile Co., Ltd ក្នុងការចាប់ផ្តើមវិនិយោគលើគម្រោងបង្កើតរោងចក្រផ្គុំ និងដំឡើងរថយន្ត និងគម្រោងបង្កើតរោងចក្រផ្គុំដំឡើងគ្រឿងចក្ររថយន្តសណ្តោង និងរថយន្តដឹកទំនិញធុនធ្ងន់ ដែលគម្រោងទាំង ២ មានទឹកប្រាក់វិនិយោគសរុប ៣៧,៣ លានដុល្លារ។
លោក លឹម ហេង បញ្ជាក់ថា តាមរយៈការសម្រេចបានផលិតផលនាំចេញថ្មីៗជាបន្តបន្ទាប់នាពេលនេះ គេអាចនិយាយថា ឧស្សាហកម្មកម្ពុជាកំពុងឈានទៅរកឧស្សាហកម្មធុនមធ្យម និងធំ ជាបណ្តើរៗដោយមិនពឹងផ្អែកទៅលើឧស្សាហកម្មធុនស្រាល (វាយនភណ្ឌ) ទាំងស្រុងដូចមុនទៀតទេ។
លោក សុក ចិន្តាសោភា អគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា (CDC) ក្នុងអំឡុងពេលដឹកនាំគណៈប្រតិភូ CDC ចុះបំពេញទស្សនកិច្ច ដើម្បីពិនិត្យមើលវឌ្ឍនភាពនៃការកសាងរោងចក្ររបស់ក្រុមហ៊ុន Cart Tire Co., Ltd កាលពីថ្ងៃទី ១ ខែកក្កដា ឆ្នាំ ២០២១ បាននិយាយថា ក្រុមហ៊ុន Cart Tire Co., Ltd នឹងបញ្ជាទិញកៅស៊ូក្នុងស្រុក ១០០ ភាគរយសម្រាប់ប្រើជាវត្ថុធាតុដើមនៅក្នុងការផលិតសម្បកកង់យានយន្តដោយនៅឆ្នាំទី ១ ក្រុមហ៊ុននឹងត្រូវការកៅស៊ូប្រមាណ ៥០ ០០០ តោន ហើយនៅឆ្នាំទី ៥ តម្រូវការនឹងកើនឡើងដល់ ១៥០ ០០០ តោនស្មើនឹងប្រមាណ ៤៣ ភាគរយនៃផលិតកម្មកៅស៊ូក្នុងស្រុកសរុបឆ្នាំ ២០២០។
កាលពីដើមឆ្នាំ ២០២១ ក្រុមហ៊ុន Cart Tire Co., Ltd បោះទុនវិនិយោគក្នុងទឹកប្រាក់ ៣៥០ លានដុល្លារនៅក្នុងតំបន់សេដ្ឋកិច្ចពិសេស ឈីលូ ជាន ពុចាយ ក្រុងបាវិត ខេត្តស្វាយរៀងដើម្បីផលិតកង់រថយន្ត៕ LA
វីដេអូ៖
