.jpg)
ការនាំចេញ-នាំចូលនៅ SSEZ មានតម្លៃជាង $ ១,៧ ពាន់លាន។ ហុង មិនា
ភ្នំពេញៈ តំបន់សេដ្ឋកិច្ចពិសេសព្រះសីហនុ (SSEZ) បានបង្ហាញកំណើនការនាំចេញ-នាំចូលរបស់ខ្លួននៅក្នុងរយៈពេល ១០ ខែ ឆ្នាំ ២០២១ ដោយមានតម្លៃជាង ១,៧ ពាន់លានដុល្លារ កើនជិត ៤០ ភាគរយធៀបនឹងរយៈពេលដូចគ្នាឆ្នាំ ២០២០។ នេះបើយោងតាមទិន្នន័យបានពី SSEZ។
ទិន្នន័យបង្ហាញថា ចាប់ពីខែមករា ដល់ខែតុលា ឆ្នាំ ២០២១ តំបន់សេដ្ឋកិច្ចពិសេសព្រះសីហនុបាននាំចូល និងនាំចេញទំនិញក្នុងតម្លៃសរុប ១ ៧៦៧ លានដុល្លារកើនឡើង ៣៨,៨១ ភាគរយបើធៀបនឹងរយៈពេលដូចគ្នាឆ្នាំ ២០២០។
SSEZ លើកឡើងថា៖ «តំបន់សេដ្ឋកិច្ចពិសេសព្រះសីហនុកំពុងអភិវឌ្ឍឱ្យស្ថិតស្ថេរ ដោយផ្តោតលើការការពារជំងឺរាតត្បាតនៅលើដៃម្ខាង និងធានាការផលិតនៅលើដៃម្ខាងទៀត»។
អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃកម្ពុជា (រាជបណ្ឌិត្យសភាកម្ពុជា) លោក ហុង វណ្ណៈ បានប្រាប់ ភ្នំពេញ ប៉ុស្តិ៍ នៅថ្ងៃទី ២១ ខែវិច្ឆិកាថា កំណើននៃការនាំចេញ-នាំចូលរបស់ SSEZ បញ្ជាក់ថា ទោះបីជំងឺកូវីដ ១៩ នៅបន្តអូសបន្លាយពេលឆ្លងរាលដាលក៏ខ្សែចង្វាក់ផលិតកម្មផលិត និងការបញ្ជាទិញពីរោងចក្រនានានៅក្នុង SSEZ មិនបានធ្លាក់ចុះទេ។
លោកប្រាប់ថា៖ «ចំនួននេះនឹងមានកាន់តែខ្ពស់ថែមទៀតនៅពេលសេដ្ឋកិច្ចសង្គមកម្ពុជាបើកដំណើរការឡើងវិញកាន់តែច្រើន ពិសេសចាប់ពីចុងខែវិច្ឆិកានេះដែលកម្ពុជាចាប់ផ្តើមបើកទទួលភ្ញៀវវ៉ាក់សាំង»។
លោកប្រាប់ទៀតថា តាមរយៈសមិទ្ធផលថ្មីៗជាបន្តបន្ទាប់ដូចជា ច្បាប់វិនិយោគថ្មី កិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីកម្ពុជារំពឹងថា ទំហំពាណិជ្ជកម្មរបស់ខ្លួនក្នុងឆ្នាំនេះនឹងមានកំណើនធៀបនឹងឆ្នាំ ២០២០ ហើយនឹងបន្តកើនឡើងរៀងរាល់ឆ្នាំបន្ថែមទៀត។
អនុប្រធានសភាពាណិជ្ជកម្មកម្ពុជា លោក លឹម ហេង បាននិយាយថា ការប្តេជ្ញាចិត្តរបស់ក្រុមហ៊ុនវិនិយោគលើការផលិត និងវិធានប្រឆាំងនឹងជំងឺកូវីដ ១៩ ប្រកបដោយប្រសិទ្ធភាព គឺជាកត្តាជំរុញឱ្យការនាំចេញ និងនាំចូល SSEZ កើនឡើង។
លោកអះអាងថា៖ «ស្ថិរភាពនៃខ្សែចង្វាក់ផលិតកម្ម និងកំណើននៃការបញ្ជាទិញ បានធ្វើឱ្យការនាំចូលវត្ថុធាតុដើម និងការនាំចេញផលិតសម្រេច នៅ SSEZ កើនឡើងជាប្រចាំ»។
របាយការណ៍ក្រសួងសេដ្ឋកិច្ច និងហិរញ្ញវត្ថុបង្ហាញថា នៅក្នុងរយៈពេល ៨ ខែ ឆ្នាំ ២០២១ ការនាំចេញទំនិញរបស់កម្ពុជា (ដកមាស) មានតម្លៃ ១១ ០១០ លានដុល្លារកើនឡើង ២០,៤ ភាគរយធៀបនឹងរយៈពេលដូចគ្នាឆ្នាំ ២០២០ និងការនាំចូល (ដកមាស) មានតម្លៃ ១៤,៦ ពាន់លានដុល្លារកើនឡើងប្រមាណ ២៦,៧ ភាគរយ។
ក្នុងឆ្នាំ ២០២០ សហគ្រាសនៅ SSEZ បាននាំចូល និងនាំចេញសរុប ១,៥៦ ពាន់លានដុល្លារ កើន ២៦,៥២ ភាគរយបើធៀបនឹងឆ្នាំ ២០១៩។ នេះបើយោងតាម SSEZ៕ LA
