.jpg)
លោកនាយករដ្ឋមន្ត្រី ហ៊ុន សែន នៅក្នុងកិច្ចប្រជុំកំពូលពិសេសអាស៊ាន-ចិន តាមប្រព័ន្ធវីដេអូ កាលពីថ្ងៃម្សិលមិញ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន កាលពីថ្ងៃចន្ទបានអបអរសាទរដល់ប្រទេសចិនចំពោះកិច្ចខិតខំប្រឹងប្រែងក្នុងការរួមចំណែកប្រយុទ្ធប្រឆាំងនឹងជំងឺកូវីដ ១៩ ព្រមទាំងបានដើរតួនាទីដ៏សំខាន់ដើម្បីស្ដារ និងជំរុញកំណើនសង្គម-សេដ្ឋកិច្ចកម្ពុជា ក៏ដូចជាក្នុងតំបន់ និងសកលលោក។
ការថ្លែងនេះធ្វើឡើងក្នុងកិច្ចប្រជុំកំពូលពិសេសអាស៊ាន-ចិន កាលពីថ្ងៃទី ២២ ខែវិច្ឆិកា ឆ្នាំ ២០២១ តាមប្រព័ន្ធវីដេអូដែលអមដោយលោក ប្រាក់ សុខុន រដ្ឋមន្ត្រីនៃក្រសួងការបរទេស និងសហប្រតិបត្តិការអន្តរជាតិ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។
លោកថ្លែងថា៖ «ជាមួយនឹងការគ្រប់គ្រងការឆ្លងរាលដាលនៃជំងឺកូវីដ ១៩ បានល្អប្រសើរ កម្ពុជាសូមអបអរសាទរចំពោះប្រទេសចិន ដែលបានស្ដារ និងជំរុញកំណើនសង្គម-សេដ្ឋកិច្ចឡើងវិញឆាប់រហ័ស ជាមួយនឹងកំណើនប្រមាណ ៩,៨ ភាគរយ ក្នុងរយៈពេលត្រឹមតែ ៩ ខែដំបូងក្នុងឆ្នាំ ២០២១ នេះ។ កម្ពុជាក៏សូមអរគុណ និងវាយតម្លៃខ្ពស់ចំពោះប្រទេសចិន ដែលបានចូលរួមយ៉ាងសកម្មក្នុងការប្រយុទ្ធប្រឆាំងនឹងជំងឺកូវីដ ១៩ និងការស្ដារ និងជំរុញកំណើនសង្គម-សេដ្ឋកិច្ចនៅកម្ពុជាឡើងវិញ ក៏ដូចជានៅក្នុងតំបន់ និងសកលលោក»។
លោកបានបន្ថែមថា៖ «កម្ពុជាសូមលើកទឹកចិត្តឱ្យចិនបន្តផ្ដល់ជំនួយដល់អាស៊ាន ជាពិសេសផ្ដល់ការគាំទ្រចំពោះក្របខ័ណ្ឌស្ដារឡើងវិញគ្រប់ជ្រុងជ្រោយរបស់អាស៊ាន និងគំនិតផ្តួចផ្ដើមនានាក្នុងការឆ្លើយតបនឹងជំងឺកូវីដ ១៩។ ក្នុងពេលចំពោះមុខ កម្ពុជាសូមលើកទឹកចិត្តឱ្យចិនបើកការធ្វើដំណើរចេញ-ចូលប្រទេសរវាងតំបន់ទាំង ២ អាស៊ាន-ចិនសំដៅពង្រឹង និងលើកស្ទួយវិស័យទេសចរណ៍ សេវាកម្មដឹកជញ្ជូនតាមផ្លូវអាកាស សកម្មភាពធុរកិច្ច ពាណិជ្ជកម្ម និងការវិនិយោគ»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានឱ្យដឹងថា ភ្ញៀវទេសចរចិននឹងក្លាយជាការរួមចំណែកដ៏ធំបំផុតមួយក្នុងការស្តារវិស័យទេសចរណ៍កម្ពុជាឡើងវិញ។
លោកស្រីថ្លែងថា៖ «យើងបានមើលឃើញថា នៅពេលនេះភ្ញៀវទេសចរចិនគឺជាភ្ញៀវទេសចរបរទេសឈានមុខគេដែលនឹងមកដល់ប្រទេសយើងនៅពេលយើងបើកទទួលភ្ញៀវទេសចរចាក់វ៉ាក់សាំងរួចនៅចុងខែវិច្ឆិកា»។
លោកនាយករដ្ឋមន្ដ្រី ហ៊ុន សែន បញ្ជាក់ថា ប្រទេសចិន និងកម្ពុជាបានសន្យាថា នឹងជំរុញពាណិជ្ជកម្មទ្វេភាគីឱ្យដល់ ១០ ពាន់លានដុល្លារក្នុង ១ ឆ្នាំ ខណៈភាគីទាំង ២ បានព្រមព្រៀងលើការចូលជាធរមាននៃកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន (FTA) នៅខែមករា ឆ្នាំ ២០២២។
កាលពីថ្ងៃទី ១៥ វិច្ឆិកា ឆ្នាំ ២០២១ លោកនាយករដ្ឋមន្ត្រី ហ៊ុន សែន បានជួបពិភាក្សាការងារជាមួយនាយករដ្ឋមន្ត្រី Li Keqiang នៃសាធារណរដ្ឋប្រជាមានិតចិន តាមរយៈវីដេអូ ដោយពិភាក្សាលើការជំរុញទំនាក់ទំនងសេដ្ឋកិច្ចរវាងប្រទេសទាំង ២ ឱ្យដល់កម្រិតកាន់តែធំទូលាយថែមទៀត។
ក្នុងជំនួបនោះ លោក Li Keqiang បានឱ្យដឹងថា លោកបានយល់ព្រមជំរុញការងាររួមគ្នារវាងភាគីទាំង ២ ដើម្បីចរចាកូតានាំចូលអង្ករ និងផលិតផលកសិកម្មកម្ពុជាដោយផ្ទាល់ទៅកាន់ប្រទេសចិន តាមរយៈការបង្កើតយន្តការរួម ដើម្បីពិនិត្យលទ្ធផលការនាំចេញពីកម្ពុជាទៅប្រទេសចិន គួរតែមានភាពទាក់ទាញដែលអាចធ្វើការនាំចេញដោយផ្ទាល់ទៅទីផ្សារចិន។
ក្នុងអំឡុងពេលនៃការថ្លែងសុន្ទរកថារបស់លោក នៅក្នុងកិច្ចប្រជុំកំពូលពិសេសអាស៊ាន-ចិន លោកនាយករដ្ឋមន្ត្រី ហ៊ុន សែន ក៏បានលើកទឹកចិត្តអាស៊ាន-ចិន ឱ្យបន្តពង្រឹងការតភ្ជាប់ក្នុងតំបន់ ស្របតាមស្មារតីនៃសេចក្តីថ្លែងការណ៍រួមអាស៊ាន-ចិន ស្តីពីការរួមផ្សំផែនការមេតភ្ជាប់អាស៊ាន ឆ្នាំ ២០២៥ (MPAC) និងគំនិតផ្តួចផ្តើមខ្សែក្រវាត់ និងផ្លូវ (BRI) ដើម្បីបង្កើនប្រសិទ្ធភាពលំហូរទំនិញ សេវាកម្ម និងចលនាប្រជាជន។
លោក ហ៊ុន សែន ថ្លែងថា៖ «ជាមួយគ្នានេះ បន្ថែមលើកិច្ចព្រមព្រៀងពាណិជ្ជកម្មសេរីអាស៊ាន-ចិន ការទាញយកប្រយោជន៍ជាអតិបរមាពីកិច្ចព្រមព្រៀងស្ដីពីភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) គួរត្រូវបានជំរុញ និងយកចិត្តទុកដាក់បន្ថែម ដែលការណ៍នេះនឹងពង្រឹងមូលដ្ឋានគ្រឹះនៃកំណើនសេដ្ឋកិច្ចសម្រាប់រយៈពេលវែង ព្រមទាំងនឹងនាំមកនូវវិបុលភាពទៅវិញទៅមក និងស្របតាមចក្ខុវិស័យនៃភាពជាដៃគូយុទ្ធសាស្ដ្រអាស៊ាន-ចិន ឆ្នាំ ២០៣០»៕ LA
