ភ្នំពេញៈ ក្រសួងពាណិជ្ជកម្ម និងក្រុមប្រឹក្សាអ្នកច្បាប់កម្ពុជាបានបញ្ចប់ការត្រួតពិនិត្យទៅលើខ្លឹមសារនៃសេចក្តីព្រាងអនុក្រឹត្យស្ដីពីការប្រកួតប្រជែងរួចរាល់ហើយ ដោយកំពុងត្រៀមដាក់ជូនអន្តរក្រសួងពិភាក្សាមុននឹងដាក់ឱ្យលោកនាយករដ្ឋមន្ត្រី ហ៊ុន សែន ចុះហត្ថលេខាដាក់ឱ្យប្រើប្រាស់ជាផ្លូវការ។
អនុក្រឹត្យនេះធ្វើឡើងដើម្បីដាក់ឱ្យអនុវត្តប្រកបដោយប្រសិទ្ធភាព បន្ទាប់ពីច្បាប់ស្តីពីការប្រកួតប្រជែងកម្ពុជាត្រូវបានព្រះមហាក្សត្រ នរោត្តម សីហមុនី ឡាយព្រះហស្តលេខាប្រកាសឱ្យប្រើកាលពីថ្ងៃទី ៥ ខែតុលា ឆ្នាំ ២០២១។
លោក ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម បានប្រាប់ ភ្នំពេញ ប៉ុស្តិ៍ ក្នុងសប្តាហ៍មុនថា អនុក្រឹត្យនេះត្រូវបានក្រសួងពាណិជ្ជកម្ម និងក្រុមប្រឹក្សាអ្នកច្បាប់ ពិនិត្យបញ្ចប់រួចរាល់ហើយ ដោយនៅបន្តប្រជុំអន្តរក្រសួង ដើម្បីពិភាក្សាបន្ថែមទៀត។
លោកថ្លែងថា៖ «យើងគ្រាន់តែបំពេញបន្ថែមចំណុចបន្តិចបន្តួចទៅលើច្បាប់ដែលមានស្រាប់។ ឧទាហរណ៍ការងារនេះវាប៉ះពាល់ដល់ការងាររបស់គេដែរឬទេ ហើយបើប៉ះពាល់ យើងរួមគ្នាបង្កើតគណៈកម្មការឬអត់? បើធ្វើរួមគ្នាបាន គឺបានហើយ ប៉ុន្តែបើគេថាត្រូវធ្វើដាច់ដោយឡែកពីគ្នា គេមានអនុក្រឹត្យសម្រាប់អនុវត្តមួយដែរ ហ្នឹងហើយដែរយើងត្រូវសម្រួលគ្នាកែឃ្លាខ្លះទៅដើម្បីយកទៅអនុវត្តរៀងខ្លួន។ ការងារនេះក្រុមអ្នកច្បាប់គេបានជួយកែសម្រួលហើយអស់»។
លោកបន្តទៀតថា អនុក្រឹត្យនេះធ្វើឡើងដើម្បីអនុវត្តច្បាប់ដែលមានស្រាប់ឱ្យមានប្រសិទ្ធភាពតែប៉ុណ្ណោះ ដោយកំណត់ ឈ្មោះបុគ្គល និងស្ថាប័នត្រូវចូលរួមអនុវត្ត តាមរយៈការបែងចែកតួនាទី ភារកិច្ច និងរៀបចំការងារឱ្យស្ថាប័នពាក់ព័ន្ធទាំងអស់នោះធ្វើផ្ទាល់។
ទោះយ៉ាងណា លោកបញ្ជាក់ថា មិនទាន់ដឹងកាលបរិច្ឆេទដែលក្រុមប្រឹក្សាអ្នកច្បាប់នឹងកោះប្រជុំអន្តរក្រសួង ដើម្បីសម្រេចដាក់ជូនលោកនាយករដ្ឋមន្ត្រី ហ៊ុន សែន ចុះហត្ថលេខាឱ្យប្រើប្រាស់នោះទេ។
យោងតាមសេចក្តីប្រកាសព័ត៌មានក្រសួងពាណិជ្ជកម្មការអនុម័តច្បាប់នេះគឺមិនត្រឹមតែជាការបំពេញកាតព្វកិច្ចមួយរបស់កម្ពុជាសម្រាប់អាស៊ានប៉ុណ្ណោះទេ គឺរួមទាំងអង្គការពាណិជ្ជកម្មពិភពលោកផងដែរ។
សេចក្តីប្រកាសព័ត៌មានបន្តថា ច្បាប់នេះបង្កើតនូវទីលានប្រកួតប្រជែងស្មើភាពក្នុងការធ្វើធុរកិច្ចនៅក្នុងប្រទេសកម្ពុជា ដើម្បីប្រកួតប្រជែងគ្នា តាមរយៈមធ្យោបាយផ្សេងៗរួមមាន នវានុវត្តន៍ គុណភាពខ្ពស់ និងតម្លៃទាបនៃផលិតផលនិងសេវា ហើយកត្តាទាំងនេះនឹងជំរុញឱ្យមានការប្រកួតប្រជែង ដែលផ្តល់អត្ថប្រយោជន៍សម្រាប់អ្នកប្រើប្រាស់ និងធ្វើឱ្យមានកំណើនសេដ្ឋកិច្ចជាតិ។
ច្បាប់ស្ដីពីការប្រកួតប្រជែងមាន ៧ ជំពូក និង ៤១ មាត្រា ដោយគ្របដណ្តប់លើ «សសរស្ដម្ភបី» រួមមាន ការព្រមព្រៀងដែលរារាំងដល់ការប្រកួតប្រជែង, ការបំពានដោយប្រើជំហរឧត្តមភាពលើទីផ្សារ, និងការរួមបញ្ចូលគ្នានៃធុរកិច្ចដែលរារាំងដល់ការប្រកួតប្រជែង ដែលសកម្មភាពទាំងនោះមានផលប៉ះពាល់ដល់ទីផ្សារកម្ពុជាដូចបានពិពណ៌នានៅក្នុងជំពូកទី ៣ នៃច្បាប់នេះ។
ច្បាប់នេះមានវិសាលភាពអនុវត្តចំពោះបុគ្គលធ្វើសកម្មភាពធុរកិច្ច ឬធ្វើសកម្មភាពគាំទ្រដល់ធុរកិច្ចពាក់ព័ន្ធនឹងការរារាំង រឹតត្បិត ឬបង្អួចការប្រកួតប្រជែងគួរឱ្យកត់សម្គាល់ក្នុងទីផ្សារកម្ពុជា ទោះបីជាសកម្មភាពនោះមានប្រភពនៅក្នុង ឬក្រៅប្រទេសក៏ដោយ៕ LA