ភ្នំពេញៈ កម្ពុជា​រកចំណូលបាន​ជាង ៨០ ​លាន​ដុល្លារ​ពី​ភ្ញៀវទេសចរ​ផ្ទៃក្នុង​ចេញ​ដើរ​កម្សាន្ត​ជាង ១,១ ​លាន​នាក់​តាម​បណ្តា​រាជធានី-ខេត្ត​ចំនួន​ ១២ ​នៅក្នុង​អំឡុង​រយៈពេល ៣ ថ្ងៃ​នៃ​​ព្រះរាជ​ពិធីបុណ្យ​អុំទូក ដែល​នេះ​ជា​សញ្ញា​វិជ្ជមាន​នៃ​ការងើបឡើង​វិញ​នៃ​វិស័យ​ទេសចរណ៍ បន្ទាប់ពី​ទទួលរង​ផលប៉ះពាល់​យ៉ាងខ្លាំង​ពី​ការរីករាលដាល​ជំងឺ​កូវីដ​ ១៩ ជិត ២ ​ឆ្នាំ​មកនេះ​។

អ្នកនាំពាក្យ​ក្រសួង​ទេសចរណ៍​លោក តុប សុភ័ក្រ បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ២២ ខែវិច្ឆិកា ថា​នៅក្នុង​អំឡុងពេល​បុណ្យអុំទូក​នេះ ភ្ញៀវទេសចរ​បាន​ចំណាយ​ថវិកា​ទៅលើ​សេវាកម្ម​ទេសចរណ៍​ដូចជា ការហូបចុក ស្នាក់នៅ​ច្រើនជាង​ពេល​បុណ្យ​ភ្ជុំបិណ្ឌ​។

លោក​បាន​និយាយថា​៖ «​កន្លងទៅ​បើ​ទេសចរ​ធ្វើដំណើរ​កម្សាន្ត​រយៈពេល ២ ​យប់​ ៣​ ថ្ងៃ គាត់​អាច​ចំណាយ​ចន្លោះ​ពី ៥០-៨០ ​ដុល្លារ​ក្នុង​ទេសចរ ១ ​នាក់​នេះ​សម្រាប់​ភ្ញៀវ​ជាតិ បើ​ភ្ញៀវ​បរទេស​អាច​ចន្លោះ​ពី​ ៩០-៩៥ ​ដុល្លារ ក្នុង​ថ្ងៃ​ ១ គិត​ទាំង​ការហូបចុក និង​ស្នាក់នៅ​»​។

លោក ហូ វណ្ឌី ទីប្រឹក្សា​សមាគម​ទីភ្នាក់ងារ​ទេសចរណ៍​កម្ពុជា​ឱ្យ​ដឹងថា ការសិក្សា​កន្លងមក​រកឃើញ​ថា នៅពេល​មាន​ពិធីបុណ្យ​ធំៗ​បែបនេះ​ (២-៣ ​ថ្ងៃ​) ​ភ្ញៀវទេសចរ ដែល​ទៅ​កម្សាន្ត​តាម​រមណីយដ្ឋាន​នានា ពិសេស​នៅ​ខេត្ត​គោលដៅ​ទេសចរណ៍​ធំ ដូចជា ខេត្តសៀមរាប ព្រះសីហនុ និង​កំពត​ជាដើម អាច​ចំណាយ​ចន្លោះ​ពី​ ៨០-១២០ ​ដុល្លារ សម្រាប់​ទេសចរ​ម្នាក់​។

លោក​បន្ថែមថា​៖ «​ការចេញ​កម្សាន្ត​របស់​ទេសចរ​ក្នុងស្រុក​នា​អំឡុងពេល​អុំទូក​នេះ គឺជា​សញ្ញា​នាំ​ផ្លូវ​ដ៏វិជ្ជមាន​ក្នុង​ការទាក់ទាញ​ទេសចរ​បរទេស​ឱ្យ​ចូលមក​កម្សាន្ត​នៅ​កម្ពុជា​ផងដែរ​»​។

ប្រធាន​មន្ទីរ​ទេសចរណ៍​ខេត្តកំពត លោក សយ ស៊ីណុល បាន​និយាយថា បុណ្យអុំទូក​ឆ្នាំនេះ​មាន​ទេសចរ​ជាង ១០ ​ម៉ឺន​នាក់​បាន​ទៅ​កម្សាន្ត​ក្នុង​ខេត្តកំពត ដោយនៅ​រមណីយដ្ឋាន​ទឹកឈូរ​មាន​ភ្ញៀវ​ទៅ​កម្សាន្ត​ជាង ៣ ​ម៉ឺន​នាក់ ភ្នំ​បូកគោ ជាង ២ ​ម៉ឺន​នាក់​។

លោក​បន្តថា សម្រាប់​ខេត្តកំពត​នៅ​មិនទាន់​បាន​សិក្សា​ពី​ការចំណាយ​របស់​ទេសចរ​នៅឡើយ​ទេ ប៉ុន្តែ​កាលពី​ឆ្នាំ​ ២០១៧ មន្ទីរ​ទេសចរណ៍​ខេត្ត​ធ្លាប់បាន​ធ្វើការ​សិក្សា​ដោយ​រកឃើញថា ភ្ញៀវទេសចរ​មកលេង​ខេត្តកំពត​មាន ៥៨ ​ភាគរយ​ស្នាក់នៅ​ ១ ​យប់ និង ៤២ ​ភាគរយ​ធ្វើដំណើរ​វិល​ល្ងាច​។

លោក​ប្រាប់ថា​៖ «​ភ្ញៀវ​ទៅលេង​ខេត្តកំពត ជាទូទៅ​គេ​សម្រាក ១ ​យប់ ដូចនេះ​យើង​រកឃើញថា ការចាយវាយ​អាច​នៅ​ចន្លោះ​ពី ៤៥-៥០ ​ដុល្លារ​»​។

រដ្ឋមន្ត្រី​ក្រសួង​ទេសចរណ៍ លោក ថោង ខុន បាន​លើកឡើងថា លំហូរ​ភ្ញៀវទេសចរ​ជិត ១ ​សប្តាហ៍​បាន​បង្កើត​នូវ​ចរន្ត​សេដ្ឋកិច្ច​សម្រាប់​សេដ្ឋកិច្ច​ជាតិ និង​សេដ្ឋកិច្ច​មូលដ្ឋាន ពិសេស​សម្រាប់​វិស័យ​ឯកជន និង​ប្រជាពលរដ្ឋ​ទូទៅ ខណៈ​ប្រតិបត្តិករ​ទេសចរណ៍​នានា​បាន​ប្រមើលមើល​ពី​កាលានុវត្តភាព​នៃ​ការងើបឡើង​ដ៏រហ័ស​នៃ​វិស័យ​ទេសចរណ៍ ដោយ​វិស័យនេះ​កំពុង​ទាញយក​មកវិញ​នូវ​ទំនុកចិត្ត​របស់​ភ្ញៀវទេសចរ តាមរយៈ​ទេសចរណ៍​ផ្ទៃក្នុង​៕ LA