ភ្នំពេញៈ នាយករដ្ឋមន្ត្រី​កម្ពុជា​លោក ហ៊ុន សែន បាន​និយាយថា ការគ្រប់គ្រង​ការឆ្លង​រាលដាល​នៃ​ជំងឺ​កូវីដ​ ១៩ ប្រកប​ដោយ​ប្រសិទ្ធភាព គឺជា​ផ្នែក​ដ៏សំខាន់​សម្រាប់​កម្ពុជា​ក្នុង​ការបើក​ទទួល​ភ្ញៀវទេសចរ​បរទេស​ចាក់​វ៉ាក់សាំង​ចាប់ពី​ចុងខែ​នេះ​តទៅ ខណៈ​ការបើក​ប្រទេស​ឡើងវិញ​នេះ នឹង​មិន​បោះ​ជំហាន​ថយក្រោយ​វិញ​ទេ​។

ក្នុង​ពិធី​សម្ពោធ​ដាក់ឱ្យ​ប្រើប្រាស់​ជា​ផ្លូវការ​ស្ពាន​ឆ្លង​ទន្លេមេគង្គ «​ស្ពាន​មិត្តភាព​កម្ពុជា-ចិន ស្ទឹងត្រង់-ក្រូចឆ្មារ​» កាលពី​ថ្ងៃ​ទី​ ២៣ ខែវិច្ឆិកា លោក​នាយករដ្ឋមន្ត្រី ហ៊ុន សែន បាន​លើកឡើងថា ការគ្រប់គ្រង​ការឆ្លង​រាលដាល​ជំងឺ​កូវីដ​ ១៩ ក្នុង​សហគមន៍​ប្រកបដោយ​ប្រសិទ្ធភាព​ក្នុង​ពេលនេះ គឺជា​ផ្នែក​ដ៏សំខាន់​សម្រាប់​កម្ពុជា​ក្នុង​ការបើក​ទទួល​ភ្ញៀវទេសចរ​បរទេស​ចាក់​វ៉ាក់សាំង​ចាប់ពី​ចុងខែ​នេះ​តទៅ​។

ការបើក​ប្រទេស​ឡើងវិញ​នាពេល​ខាងមុខ​ (​ថ្ងៃទី​ ៣០ ខែវិច្ឆិកា​) លោក​មានជំនឿថា​នឹងមិន​មាន​ការបោះជំហាន​ថយក្រោយ​វិញ​ទេ ព្រោះ​បច្ចុប្បន្ន​អត្រា​ចំនួន​ប្រជាជន​នៅ​កម្ពុជា​ចាក់​វ៉ាក់សាំង​បាន​គ្របដណ្តប់​រហូតដល់​ជាង ៨៨ ​ភាគរយ​រួចទៅហើយ​។ លោក​បន្តថា ជាក់ស្តែង​ការបើក​ឱ្យ​ប្រជាជន​ក្នុង​ស្រុក​ដើរ​កម្សាន្ត​ក្នុង​ពិធីបុណ្យ​ភ្ជុំបិណ្ឌ និង​អុំទូក នាពេល​ថ្មីៗ​នេះ គឺ​មិន​បាន​ធ្វើឱ្យ​អត្រា​ការឆ្លង​កូវីដ​ ១៩ ហក់​ឡើង​ទេ​។

លោក​បាន​ថ្លែងថា​៖ «​ក្នុង​រយៈពេល​ប៉ុន្មាន​ថ្ងៃនេះ ខ្ញុំ​គិតថា​សេវា​ទេសចរណ៍​នឹង​ដើរ​ឡើងវិញ ដោយ​ឥឡូវនេះ​យើង​ចាប់ផ្តើម​ពី​សេវា​ទេសចរណ៍​ក្នុង​ស្រុក​រាប់ទាំង​ជនបរទេស​ជាង ១ ​ម៉ឺន​នាក់​កំពុង​នៅក្នុង​ស្រុក ដែល​ពួកគាត់​ដើរលេង ប៉ុន្តែ​នៅពេល​ខាងមុខ​យើង​នឹងមាន​ភ្ញៀវ​ទេសចរ​មក​ប្រទេស​យើង ដោយ​យើង​អត់​មានការ​មិនចាំបាច់​ ដើម្បី​ធ្វើ​ចត្តាឡីស័ក​ទេ ប៉ុន្តែ​លក្ខខណ្ឌ​ទី​ ១ គឺ​ត្រូវ​ចាក់​វ៉ាក់សាំង ២ ​ដូស​នៅ​ប្រទេស​របស់​អ្នកឯង​ឱ្យ​ហើយ និង​ត្រូវ​មាន​ការបញ្ជាក់​ថា​មិនមាន​កូវីដ​ក្នុង​ការធ្វើតេស្ត និង​ទី​ ២ ពេលមកដល់​ព្រលានយន្តហោះ​ត្រូវធ្វើ​តេស្ត​រហ័ស បើ​អវិជ្ជមាន​អញ្ជើញ​ទៅ​ទីកន្លែង​ណា​ក៏បាន ខណៈ​កាលពីមុន​យើង​គិតថា​ឱ្យ​មក​ធ្វើ​ចត្តាឡីស័ក ៥ ​ថ្ងៃ​ក្នុង​ខេត្ត​ (​មិនមែន​ក្នុង​បន្ទប់​) ឥឡូវ​មិនចាំបាច់​ទេ សូម្បី​ម៉ាស៊ីន PCR ក៏​មិនចាំបាច់​ដែរ​»​។

លោក​បន្ថែមថា បច្ចុប្បន្ន​រដ្ឋាភិបាល​បានផ្តល់​ការទទួល​ខុសត្រូវ​យ៉ាងច្រើន​ចំពោះ​ប្រជាជន និង​អ្នកទេសចរ​ដែល​ធ្វើដំណើរ​មក​កម្ពុជា​ផងដែរ​។

ទិន្នន័យ​ក្រសួង​ទេសចរណ៍​ផ្សព្វផ្សាយ​កាលពី​ថ្ងៃទី​ ២២ ខែវិច្ឆិកា​បានឱ្យដឹងថា ចន្លោះ​ពី​ខែមករា ដល់​ខែកញ្ញា ឆ្នាំ​ ២០២១ កម្ពុជា​ទទួលបាន​ភ្ញៀវទេសចរ​សរុប ១៣១ ៦៧៤ ​នាក់ ធ្លាក់ចុះ ៨៩,៤ ​ភាគរយ​បើ​ធៀប​ទៅនឹង​រយៈពេល​ដូចគ្នា​ឆ្នាំ​ ២០២០ ដែលមាន ១ ២៤៧ ៦៨០ ​នាក់​។ ក្នុងនោះ​ការធ្វើ​ដំណើរ​តាមផ្លូវ​អាកាស​មាន​ចំនួន ៦៣ ០៥០ ​នាក់​ស្មើនឹង ៤៧,៩ ​ភាគរយ និង​ផ្លូវគោក-ទឹក ៦៨ ៦២៤ ​នាក់ ស្មើ ៥២,១ ​ភាគរយ​។

យោងតាម​ទិន្នន័យ​ខាងលើ​ភ្ញៀវទេសចរ​ជនជាតិ​ថៃ​បាន​ធ្វើ​ដំណើរ​មក​កម្ពុជា​ច្រើន​ជាងគេ ដោយមាន​ចំនួន ៦៤ ៤៥៩ ​នាក់ ស្មើ ៤៩ ​ភាគរយ​នៃ​ចំនួន​សរុប​,​ជនជាតិ​ចិន ៣៧ ១៩៧ ​នាក់​, វៀតណាម ៧ ៦៤៩ ​នាក់​, ឥណ្ឌូនេស៊ី ៤ ២១១ ​នាក់​, កូរ៉េ ២ ៩៨៩ ​នាក់​, អាមេរិក ២ ៩៣៤ ​នាក់​, ចិន​តៃប៉ិ ២ ៤៣៤ ​នាក់​, បារាំង ១ ៦២៤ ​នាក់​, ម៉ាឡេស៊ី ១ ៣៣៦ ​នាក់ និង​ជនជាតិ​ជប៉ុន ១ ២២០ ​នាក់​។

ដោយឡែក​សម្រាប់​ខែកញ្ញា ភ្ញៀវទេសចរ​បរទេស​ធ្វើដំណើរ​មក​កម្ពុជា​មាន​ចំនួន ៩ ៩៦៧ ​នាក់ ធ្លាក់ចុះ ៥២,៨ ​ភាគរយ​ធៀប​ខែកញ្ញា ឆ្នាំ​ ២០២០ ​ដែលមាន​ចំនួន ២១ ១៣៧ ​នាក់​។

ទីប្រឹក្សា​សមាគម​ទីភ្នាក់ងារ​ទេសចរណ៍​កម្ពុជា លោក ហូ វណ្ឌី បាន​ប្រាប់​ភ្នំពេញ​ប៉ុស្តិ៍​ក្នុង​ថ្ងៃទី​ ២៣ ខែវិច្ឆិកា​ថា ក្តីបារម្ភ​ពី​ការឆ្លង​រាលដាល​ជំងឺ​កូវីដ​ ១៩ គឺជា​មូលហេតុ​តែមួយគត់​ដែល​ធ្វើឱ្យ​ចំនួន​ភ្ញៀវទេសចរ​ធ្លាក់ចុះ ប៉ុន្តែ​ចំនួន​នេះ​នឹងមាន​សម្ទុះ​ឡើងវិញ​ជា​បណ្តើរៗ​ បន្ទាប់ពី​រដ្ឋាភិបាល​សម្រេច​ដកចេញ​នូវ​វិធានការ​ធ្វើ​ចត្តាឡីស័ក​សម្រាប់​ភ្ញៀវ​បរទេស​ដែល​បាន​ចាក់​វ៉ាក់សាំង​រួចរាល់​។

លោក​បញ្ជាក់ថា​៖ «​នេះ​គឺជា​ពន្លឺ​ទាំង​សម្រាប់​ជនបរទេស​ដែល​ចង់​ធ្វើដំណើរ​មក​កម្ពុជា និង​សម្រាប់​អ្នក​នៅក្នុង​វិស័យ​ទេសចរណ៍​ផងដែរ​»​។

លោក​បន្ថែមទៀតថា តាមរយៈ​ការខិតខំ​នៅពេលនេះ​ជើងហោះហើរ​ពី​ប្រទេស​ ១ ទៅ​ប្រទេស​ ១ បានចាប់ផ្តើម​បើក​ដំណើរការ​ឡើងវិញ​ជា​បណ្តើរៗ​វិញ​ហើយ​។ ទោះយ៉ាងណា​លោក​បាន​អះអាងថា​៖ «​ដើម្បីឱ្យ​វិស័យនេះ​មាន​និរន្តរភាព​រឹងមាំ ទាំង​រដ្ឋាភិបាល ក៏ដូចជា​ប្រជាជន​ទាំងអស់​ត្រូវតែ​ចូលរួម​អនុវត្ត​ឱ្យបាន​ហ្មត់ចត់​នូវ​វិធានការ​នានា​ក្នុង​ការប្រយុទ្ធ​ប្រឆាំង​នឹង​ជំងឺ​កូវីដ​ ១៩»៕ LA