.jpg)
ភ្ញៀវទេសចរដើរកម្សាន្តនៅប្រាសាទអង្គរវត្ត កាលពីពេលថ្មីៗនេះ។ ហេង ជីវ័ន
សៀមរាបៈ រដ្ឋបាលខេត្តសៀមរាបបានតម្រូវឱ្យម្ចាស់ ឬអ្នកគ្រប់គ្រងអាជីវកម្មសណ្ឋាគារ សេវាស្នាក់នៅទេសចរណ៍ និងអាជីវកម្មបៀរហ្គាដិន ដែលកំពុងប្រកបអាជីវកម្មក្នុងខេត្តសៀមរាបទាំងអស់ត្រូវមកដាក់ពាក្យស្នើសុំវាយតម្លៃការអនុវត្តស្តង់ដាអប្បបរមាតាមគន្លងប្រក្រតីភាពថ្មី មុននឹងបើកទទួលភ្ញៀវ ដើម្បីចូលរួមការពារពីការឆ្លងជំងឺកូវីដ ១៩។
សេចក្តីជូនដំណឹងរបស់រដ្ឋបាលខេត្តសៀមរាបកាលពីថ្ងៃទី ២២ ខែវិច្ឆិកាបានឱ្យដឹងថា គ្រប់អាជីវកម្មសណ្ឋាគារ សេវាស្នាក់នៅ ទេសចរណ៍ និងអាជីវកម្មបៀរហ្គាដិន មុននឹងបើកដំណើរការទទួលភ្ញៀវឱ្យចូលមកស្នាក់នៅ ឬកម្សាន្តត្រូវមកដាក់ពាក្យស្នើសុំវាយតម្លៃការអនុវត្តស្តង់ដាអប្បបរមាតាមគន្លងប្រក្រតីភាពថ្មីសម្រាប់អាជីវកម្មសណ្ឋាគារ និងសេវាស្នាក់នៅទេសចរណ៍នៅមន្ទីរទេសចរណ៍ជាមុន។
សេចក្តីជូនដំណឹងនេះបន្តថា សម្រាប់អាជីវកម្មសណ្ឋាគារ សេវាស្នាក់នៅទេសចរណ៍ និងអាជីវកម្មបៀរហ្គាដិនដែលពុំទាន់មានអាជ្ញាប័ណ្ណប្រកបអាជីវកម្មទេសចរណ៍ត្រូវមកដាក់ពាក្យស្នើសុំអាជ្ញាប័ណ្ណប្រកបអាជីវកម្មទេសចរណ៍នៅអង្គភាពច្រកចេញ-ចូលតែមួយរដ្ឋបាលខេត្តសៀមរាប ឬក្រសួងទេសចរណ៍។
ភ្នំពេញប៉ុស្តិ៍មិនអាចទាក់ទង លោក លី សំរិទ្ធ អ្នកនាំពាក្យរដ្ឋបាលខេត្តសៀមរាប និងលោក ង៉ូវ សេងកាក់ ប្រធានមន្ទីរទេសចរណ៍ខេត្តស្នើសុំធ្វើអត្ថាធិប្បាយបានទេ នៅថ្ងៃទី ២៣ ខែវិច្ឆិកា ឆ្នាំ ២០២១។
លោក ធួន ស៊ីណាន ប្រធានសមាគមទេសចរណ៍អាស៊ី-ប៉ាស៊ីហ្វិក នៅថ្ងៃទី ២៣ ខែវិច្ឆិកា បានសម្តែងការស្វាគមន៍ចំពោះការជូនដំណឹងរបស់អាជ្ញាធរខេត្តសៀមរាប ប៉ុន្តែការជូនដំណឹងនេះហាក់ដូចជាមិនសូវស៊ីចង្វាក់គ្នា ព្រោះសណ្ឋាគារ ផ្ទះសំណាក់ និងអាជីវកម្មទេសចរណ៍ជាច្រើនបានបើកដំណើរការអាជីវកម្មរបស់ខ្លួន និងទទួលភ្ញៀវឱ្យស្នាក់នៅបានច្រើនរួចមកហើយ។ ទោះបីនៅក្នុងពេលដែលមានការបិទខ្ទប់ ក៏នៅមានសណ្ឋាគារមួយចំនួនបើកដំណើរការដែរ។
លោកបន្តថា៖ «ឥឡូវប្រទេសបើកទាំងមូលហើយ សេចក្តីប្រកាសរបស់រដ្ឋបាលសៀមរាបគួរតែត្រូវបានធ្វើយូរណាស់មកហើយ វាមិនគួរចេញមកនៅពេលក្រោយៗនេះទេ»។
លោក ពៅ មករា អ្នកគ្រប់គ្រងទូទៅសណ្ឋាគារ ភីឡា សៀមរាប បាននិយាយថា សណ្ឋាគាររបស់លោកមិនទាន់ទទួលលិខិតជូនដំណឹង ឬណែនាំឱ្យបំពេញទៅតាមគោលការណ៍ទេសចរណ៍របស់រដ្ឋបាលខេត្តសៀមរាបនៅឡើយទេ ប៉ុន្តែលោកអនុវត្តបានយ៉ាងត្រឹមត្រូវនូវវិធានការរបស់ក្រសួងសុខាភិបាលរាល់ភ្ញៀវដែលមកស្នាក់នៅ។ លោកបន្តថា សណ្ឋាគាររបស់លោកបើកដំណើរការអាជីវកម្មទទួលភ្ញៀវចំនួនច្រើននៅក្នុងអំឡុងពេលពិធីបុណ្យអុំទូកកន្លងមក ប៉ុន្តែក្រោយពេលបុណ្យអុំទូកក៏ស្បើយភ្ញៀវទៅវិញ។
លោករំពឹងថា ក្រោយពីរដ្ឋាភិបាលបើកឱ្យភ្ញៀវទេសចរអន្តរជាតិចូលមកវិញ វានឹងធ្វើឱ្យដំណើរការអាជីវកម្មសណ្ឋាគារ និងសេវាកម្មទេសចរណ៍មានប្រក្រតីភាពឡើងវិញ ហើយផ្តល់ចំណូលដល់អ្នករកស៊ី និងប្រជាពលរដ្ឋនៅក្នុងខេត្តសៀមរាប។
លោកបានថ្លែងថា៖ «ខ្ញុំមិនទាន់ស្នើសុំលិខិតទាក់ទងនឹងការអនុវត្តស្តង់ដាអប្បបរមាតាមគន្លងប្រក្រតីភាពថ្មីសម្រាប់អាជីវកម្មសណ្ឋាគារនៅឡើយទេ ព្រោះមិនទាន់ទទួលបានលិខិតជូនដំណឹងពីរដ្ឋបាលខេត្ត ប៉ុន្តែខ្ញុំបានស្នើសុំបើកអាជីវកម្មផ្នែកម៉ាស្សាមួយដែរ គេចេញលិខិតមកហើយ នៅឡើយតែគេចុះត្រួតពិនិត្យជាក់ស្តែង»៕ LA
