ក្រុមហ៊ុនមិត្តហ្វូន កាលពីពេលថ្មីៗនេះ បានបរិច្ចាគថវិកាជិត ៥ ពាន់ដុល្លារអាមេរិក ដែលបានមកពីការចូលរួមរបស់អតិថិជនពីកម្មវិធី «កាដូបុណ្យភ្ជុំបិណ្ឌ» របស់ខ្លួន និងបានបរិច្ចាគថវិកានេះទៅឲ្យមន្ទីរពេទ្យគន្ធបុប្ផា។ នេះបើតាមការឱ្យដឹងរបស់ក្រុមហ៊ុន។
កាលពីអំឡុងពេលបុណ្យភ្ជុំបិណ្ឌប្រពៃណីខ្មែរ នាពេលកន្លងទៅ ក្រុមហ៊ុនមិត្តហ្វូនបានបង្កើតកម្មវិធីមួយដែលអនុញ្ញាតឱ្យអតិថិជនរបស់ខ្លួនឈ្នះរង្វាន់ពិសេសនៅរៀងរាល់ពេលដែលពួកគេធ្វើការស្កេន QR កូដ ហើយរាល់ការស្កេន QR កូដ ម្ដងៗ ក្រុមហ៊ុនមិត្តហ្វូននឹងបរិច្ចាគទឹកប្រាក់ ០,០៥ ដុល្លារ ដើម្បីបរិច្ចាគជូនទៅឲ្យមន្ទីរពេទ្យគន្ធបុប្ផា។
ឥឡូវនេះ តាមរយៈកម្មវិធីដែលបានប្រព្រឹត្តទៅពីថ្ងៃទី ២០ ខែកញ្ញា ដល់ថ្ងៃទី ១០ ខែ តុលា ឆ្នាំ ២០២១ អតិថិជនមិត្តហ្វូនបានធ្វើប្រតិបត្តិការស្កេន QR កូដ សរុបចំនួន ៩៦ ២៩២ ដង ហើយទឹកប្រាក់ចំនួន ៤ ៨១៥ ដុល្លារអាមេរិក ត្រូវបានបរិច្ចាគសម្រាប់ជាអំណោយទៅឱ្យមន្ទីរពេទ្យគន្ធបុប្ផា។
លោក ញ៉ុង ឌិនថន អគ្គនាយករងក្រុមហ៊ុន មិត្តហ្វូន បានប្រគល់អំណោយជាថវិកានេះ ទៅឱ្យមន្ទីរពេទ្យគន្ធបុប្ផា នាថ្ងៃទី ២៣ ខែ វិច្ឆិកា ឆ្នាំ ២០២១។ លោក ឌិនថន បានថ្លែងថា អំណោយនេះគឺជាផ្នែកមួយនៃសកម្មភាពទំនួលខុសត្រូវសង្គមជាហូរហែរបស់ក្រុមហ៊ុន ដើម្បីផ្ដល់ត្រឡប់ទៅវិញទៅឱ្យសង្គមកម្ពុជា។
លោក ឌិនថន មានប្រសាសន៍យ៉ាងដូច្នេះថា៖ «មន្ទីរពេទ្យគន្ធបុប្ផាបានជួយសង្គ្រោះជីវិតកុមារនិងទារកដ៏ច្រើនសន្ធឹកសន្ធាប់ ហើយក្រុមហ៊ុនមិត្តហ្វូនតែងតែរីករាយក្នុងការជួយរួមចំណែកជាវិភាគទានថវិកាទៅឱ្យមន្ទីរពេទ្យ។ យើងនឹងបន្តរៃអង្គាសមូលនិធិច្រើនថែមទៀតសម្រាប់ធ្វើអំណោយទៅកាន់មន្ទីរពេទ្យ»។
លោកវេជ្ជបណ្ឌិត Denis Laurent ដែលជាអគ្គនាយកមន្ទីរពេទ្យ គន្ធបុប្ផា បានសម្ដែងនូវការអរគុណដល់ក្រុមហ៊ុនមិត្តហ្វូន ដែលតែងតែបង្កើតកម្មវិធីថ្មីៗដើម្បីរៃអង្គាសមូលនិធិគាំទ្រដល់មន្ទីរពេទ្យ។
លោកវេជ្ជបណ្ឌិត Laurent បានថ្លែងយ៉ាងដូច្នេះថា៖ «យើងនឹងប្រើប្រាស់ថវិកាទាំងនេះដើម្បីជួយធ្វើឱ្យសុខភាពកុមារនិងទារកនៅកម្ពុជាកាន់តែប្រសើរឡើង តាមរយៈការគាំទ្រដល់សកម្មភាពនានារបស់មន្ទីរពេទ្យគន្ធបុប្ផា»។
ក្រុមហ៊ុន មិត្តហ្វូន បាននឹងកំពុងនាំមុខគេនៅក្នុងការជួយគាំទ្រដល់រាជរដ្ឋាភិបាលកម្ពុជាដើម្បីអនុវត្តកម្មវិធីអភិវឌ្ឍន៍ឌីជីថលជាតិរបស់ខ្លួន។ កន្លងមក ក្រុមហ៊ុនបានធ្វើការយ៉ាងជិតស្និទ្ធិជាមួយក្រសួងស្ថាប័នរដ្ឋសំខាន់ៗ ដើម្បីអនុវត្តគម្រោងឌីជីថលូបនីយកម្មនៅក្នុងវិស័យជាច្រើន ដូចជា វិស័យអប់រ សុខាភិបាល និងដឹកជញ្ជូន។
មិនត្រឹមតែផ្តោតលើអាជីវកម្មប៉ុណ្ណោះទេមិត្តហ្វូន គឺជាក្រុមហ៊ុនមួយក្នុងចំណោមក្រុមហ៊ុនដទៃទៀតដែលតែងតែរួមចំណែកយ៉ាងសកម្មក្នុងកិច្ចខិតខំប្រឹងប្រែងរបស់ខ្លួនក្នុងការអភិវឌ្ឍសង្គមហើយចាត់ទុកវាជាសកម្មភាពទំនួលខុសត្រូវនិងកាតព្វកិច្ចរបស់អាជីវកម្ម៕