.jpg)
វិភាគដោយ៖ លោក ចេង តារាវុធ អ្នកវិភាគរបស់ក្រុមហ៊ុន ហ្គោលដេន អេហ្វអិកស៍ លីង ឃែភីថល
ប្រេងឆៅ WTI Crude បានធ្លាក់ចុះពីកម្រិតខ្ពស់បំផុតរបស់ខ្លួនក្នុងតម្លៃ ៨៤,៩៧ ដុល្លារក្នុង ១ បារ៉ែល ដែលបានកើនឡើងកាលពីថ្ងៃទី ១០ ខែវិច្ឆិកា ឆ្នាំ ២០២១ មកនៅប្រហែល ៧៨ ដុល្លារ បើគិតត្រឹមថ្ងៃពុធសប្តាហ៍នេះ។ មុនបកមកដល់តម្លៃ ៧៨ ដុល្លារ ប្រេងឆៅ WTI Crude កាលពីថ្ងៃអង្គារ បានធ្លាក់ចុះដល់ ៧៥ ដុល្លារ ដែលជាកម្រិតទាបបំផុតចាប់តាំងពីថ្ងៃទី ១០ ខែតុលា ឆ្នាំ ២០២១។
គេហទំព័រ CNBC បានរាយការណ៍កាលពីថ្ងៃអង្គារថា៖ «ការធ្លាក់ចុះកាលពីថ្ងៃអង្គារ បានធ្វើឱ្យសហរដ្ឋអាមេរិក ជប៉ុន និងឥណ្ឌា នឹងបញ្ចេញទុនបម្រុងប្រេងឆៅ ដើម្បីទប់ទល់នឹងតម្លៃ ទោះបីជាមានការគំរាមកំហែងនៃការធ្លាក់ចុះនៃតម្រូវការនៅពេលដែលករណីកូវីដ ១៩ ផ្ទុះឡើងនៅក្នុងទ្វីបអឺរ៉ុបក៏ដោយ»។ ចំណែកគេហទំព័រ Oilprice.com បានរាយការណ៍ថា៖ «តម្លៃប្រេងឆៅបានលោតឡើងនៅព្រឹកថ្ងៃអង្គារ បន្ទាប់ពីការប្រកាសពីរដ្ឋបាលសហរដ្ឋអាមេរិកថាវានឹងធ្វើឱ្យមានប្រេងចំនួន ៥០ លានបារ៉ែលពី Strategic Petroleum Reserve (SPR) ដើម្បីធ្វើឱ្យតម្លៃប្រេងធ្លាក់ចុះ។
សម្រាប់ការវិភាគផ្នែកបច្ចេកទេសវិញ តម្លៃប្រេងឆៅកំពុងបង្កើតទំនោរធ្លាក់ចុះរយៈពេលខ្លី ដោយបង្ហាញសញ្ញាត្រឡប់ទៅតម្លៃ ៦៥ ដុល្លារ ដោយផ្អែកលើខ្សែទម្ររឹងមាំនៅតម្លៃ ៦៥ ដុល្លារ។ សូចនាករផ្សេងទៀតដូចជា Fibonacci និង MACD ក៏កំពុងបង្ហាញពីការប្រែប្រួលរយៈពេលខ្លីឆ្ពោះរកទៅតម្លៃ ៦៥ ដុល្លារដែរ។ ដូច្នេះ សម្រាប់ការវិភាគជួញដូរនៅសប្តាហ៍នេះ វិនិយោគិនគួរតែពិចារណាលក់ប្រេងឆៅក្នុងតម្លៃ ៧៨ ដុល្លារ ដោយកំណត់មុខងារយកប្រាក់ចំណេញនៅតម្លៃ ៦៦ ដុល្លារ និងមុខងារការពារហានិភ័យនៅតម្លៃ ៨៦ ដុល្លារ៕
