.jpg)
ម៉ូតូ ១ គ្រឿងជិះឆ្លងកាត់ស្នក់ការកណ្ដាលធនាគារអេស៊ីលីដា នាពេលកន្លងទៅ។ ហុង មិនា
ភ្នំពេញៈ អេស៊ីលីដា ដែលជាធនាគារពាណិជ្ជឈានមុខមួយនៅកម្ពុជានៅតែបន្តរក្សាបាននូវចំណាត់ថ្នាក់ Stand-Alone-Credit Profile (SACP) កម្រិត bb ពីភ្នាក់ងារវាយតម្លៃអន្តរជាតិ Standard & Poor''s ដែលនេះឆ្លុះបញ្ចាំងពីភាពរឹងមាំ និងប្រតិបត្តិការដ៏ល្អរបស់ធនាគារ ទោះបីការរីករាលដាលនៃជំងឺកូវីដ ១៩ បានអូសបន្លាយពេលជិត ២ ឆ្នាំក្តី។
ឯកសារផ្តល់ព័ត៌មានរបស់ខ្លួនផ្ញើទៅផ្សារមូលបត្រកម្ពុជាកាលពីល្ងាចថ្ងៃទី ២៤ ខែវិច្ឆិកា ឱ្យដឹងថា ការទទួលបានចំណាត់ថ្នាក់នេះផ្អែកលើស្ថានភាពធុរកិច្ចរឹងមាំ ស្ថិរភាពលំហូរប្រាក់ចំណូល មូលដ្ឋានប្រាក់បញ្ញើ និងការគ្រប់គ្រងគុណភាពទ្រព្យសកម្មល្អ។
សេចក្តីប្រកាសព័ត៌មានសរសេរថា៖ «កត្តាទាំងអស់នេះឆ្លុះបញ្ចាំងពីភាពរឹងមាំនៃបណ្តាញធុរកិច្ចរបស់ធនាគារ តាមរយៈការរក្សាបានការអភិវឌ្ឍប្រកបដោយចីរភាព និងភាពធន់»។
លោកស្រី ម៉ារ អមរា អនុប្រធាននាយកប្រតិបត្តិជាន់ខ្ពស់ធនាគារអេស៊ីលីដា បានប្រាប់ ភ្នំពេញ ប៉ុស្តិ៍ នៅថ្ងៃទី ២៥ ខែវិច្ឆិកាថា ជាមួយនឹងការរីករាលដាលជំងឺកូវីដ ១៩ ក្នុងសហគមន៍នៅកម្ពុជាអំឡុងឆ្នាំ ២០២១ ធនាគារអេស៊ីលីដានៅតែបន្តពង្រីកសេវាធនាគារស្វ័យប្រវត្តិរបស់ខ្លួន ដើម្បីបង្កើនសមត្ថភាពឆ្លើយតបនឹងបច្ចេកវិទ្យាចុងក្រោយគេឱ្យកាន់តែមានភាពងាយស្រួល លឿន សុវត្ថិភាពខ្ពស់ និងពេញនិយម។ ការដាក់ចេញនូវប្រព័ន្ធអេស៊ីលីដាម៉ូបាល អតិថិជនអាចធ្វើប្រតិបត្តិការធនាគារតាមអ៊ីនធឺណិត គ្រប់ពេលវេលាយ៉ាងងាយស្រួល។
លោកស្រីថ្លែងថា៖ «ការចូលរួមរបស់អតិថិជនយើងក្នុងការប្រើប្រាស់សេវាធនាគារស្វ័យប្រវត្តិកម្មដោយខ្លួនឯង មិនត្រឹមតែបង្ហាញពីការផ្លាស់ប្តូឥរិយាបថរបស់ពួកគេក្នុងការប្រើប្រាស់សេវាធនាគារបែបបុរាណប៉ុណ្ណោះទេ ប៉ុន្តែថែមទាំងបង្ហាញពីការរួមចំណែកក្នុងការទប់ស្កាត់ការរីករាលដាលជំងឺកូវីដ ១៩ ជាមួយរដ្ឋាភិបាល ក៏ដូចជាក្រសួងសុខាភិបាលផងដែរ»។
លោកស្រីបន្តថា ការបង្កើនអត្រាចាក់ថ្នាំបង្ការជំងឺកូវីដ ១៩ នៅកម្ពុជាបានបង្កើតនូវភាពស៊ាំក្នុងសហគមន៍ទូទាំងប្រទេស។ ជាមួយគ្នានេះរដ្ឋាភិបាលក៏បានសម្រេចបើកអាជីវកម្មឡើងវិញ និងបើកប្រទេសឡើងវិញជាបណ្តើរៗ និងជាដំណាក់កាលៗក្នុងភាពប្រុងប្រយ័ត្ន និងការទទួលខុសត្រូវខ្ពស់ ដោយអនុវត្តការរស់នៅតាមគន្លងថ្មី។
លោកស្រីនិយាយថា៖ «នេះជាសញ្ញាបង្ហាញថា សកម្មភាពសេដ្ឋកិច្ចនឹងកើនឡើងគួរឱ្យកត់សម្គាល់ចាប់ពីចុងឆ្នាំ ២០២១ ដោយសារ តែប្រសិទ្ធភាពនៃវ៉ាក់សាំងកូវីដ ១៩ ដែលត្រូវបានណែនាំទូទាំងពិភពលោក»។
ការិយាល័យស្រាវជ្រាវម៉ាក្រូសេដ្ឋកិច្ច (AMRO) អាស៊ាន+៣ កាលពីថ្ងៃទី ២២ ខែវិច្ឆិកា បានព្យាករថា កំណើនសេដ្ឋកិច្ចកម្ពុជាក្នុងឆ្នាំ ២០២១ នឹងមានអត្រា ២,៨ ភាគរយ ដែលជំរុញដោយកំណើននៅក្នុងវិស័យនានា។
ស្ថាប័នដែលមូលដ្ឋាននៅសិង្ហបុរីនេះបានលើកឡើងថា ការពង្រឹងការគ្រប់គ្រងជំងឺរាតត្បាត និងការអនុវត្តគោលនយោបាយមានភាពបត់បែន ដើម្បីគាំទ្រដល់វិស័យងាយរងគ្រោះនឹងធ្វើឱ្យសេដ្ឋកិច្ចស្ទុះងើបឡើងវិញរឹងមាំ ខណៈការចាក់វ៉ាក់សាំងក្នុងល្បឿនលឿនដែលកំពុងបន្តនឹងធានាបាននូវការបើកសេដ្ឋកិច្ចឡើងវិញប្រកបដោយស្ថិរភាព៕ LA
