.jpg)
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងជំនួបជាមួយឯកអគ្គរដ្ឋទូតនៃសាធារណរដ្ឋឥណ្ឌូនេស៊ីប្រចាំកម្ពុជា លោក Sudirman Haseng កាលពីថ្ងៃទី ២៦ ខែវិច្ឆិកា។ រូបថត សហការី
ភ្នំពេញៈ ខណៈវិស័យកសិកម្មកំពុងមានវឌ្ឍនភាពជាបន្តបន្ទាប់ ពិសេសចាប់តាំងពីការផ្ទុះឡើងជំងឺកូវីដ ១៩ កម្ពុជាបានប្រកាសស្វាគមន៍ចំពោះវិនិយោគិនឥណ្ឌូនេស៊ីក្នុងការចូលមកបណ្តាក់ទុនលើវិស័យកសិកម្ម ដើម្បីបង្កើនសមត្ថភាពឆ្លើយតបនឹងកំណើននៃតម្រូវការក្នុងស្រុក និងនាំចេញទៅកាន់ទីផ្សារអន្តរជាតិ។
ការលើកឡើងនេះត្រូវបានលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ធ្វើឡើងក្នុងជំនួបជាមួយឯកអគ្គរដ្ឋទូតនៃសាធារណរដ្ឋឥណ្ឌូនេស៊ីប្រចាំកម្ពុជា លោក Sudirman Haseng កាលពីថ្ងៃទី ២៦ ខែវិច្ឆិកា។
លោក វេង សាខុន បាននិយាយថា ដោយមានការយកចិត្តទុកដាក់ និងការជំរុញពីរដ្ឋាភិបាល វិស័យកសិកម្មកម្ពុជាត្រូវបានគេដឹងថា កំពុងមានការរីកចម្រើនពី ១ ថ្ងៃទៅ ១ ថ្ងៃ។ សកម្មភាពនេះធ្វើឱ្យកម្ពុជាមិនត្រឹមតែអាចផ្គត់ផ្គង់តាមតម្រូវការទីផ្សារក្នុងស្រុកប៉ុណ្ណោះទេ ប៉ុន្តែថែមទាំងអាចនាំទៅលក់នៅទីផ្សារអន្តរជាតិបានកាន់តែច្រើនផងដែរ។ លោកបន្ថែមថាជាមួយនឹងកិច្ចសហប្រតិបត្តិការល្អរវាងកម្ពុជា និងឥណ្ឌូនេស៊ី លោកសង្ឃឹមថា ក្នុងពេលឆាប់ៗនេះនឹងមានវិនិយោគិនឥណ្ឌូនេស៊ី ចូលមកវិនិយោគវិស័យកសិកម្ម រួមទាំងការកែច្នៃកសិផល និងខ្សែចង្វាក់តម្លៃនៅកម្ពុជា។
លោកថ្លែងថា៖ «ស្ថានភាពនៃវិស័យកសិកម្មនៅកម្ពុជាកំពុងមានការវិវឌ្ឍរីកចម្រើនយ៉ាងឆាប់រហ័ស ជាពិសេសក្នុងដំណាក់កាលនៃវិបត្តិកូវីដ ១៩។ យើងរង់ចាំស្វាគមន៍ជានិច្ចចំពោះវិស័យឯកជនឥណ្ឌូនេស៊ីដែលមានបំណងធ្វើការវិនិយោគលើវិស័យកសិកម្មនាពេលអនាគត»។
ឯកអគ្គរដ្ឋទូតសាធារណរដ្ឋឥណ្ឌូនេស៊ី លោក Sudirman Haseng បាននិយាយថា លោកនឹងខំពង្រឹង និងពង្រីកបន្ថែមទៀតនៅក្នុងការផ្សព្វផ្សាយពីសក្តានុពលនៃវិស័យកសិកម្មកម្ពុជាទៅវិនិយោគិនឥណ្ឌូនេស៊ី។
ទិន្នន័យក្រសួងកសិកម្ម រុក្ខាប្រមាញ់ និងនេសាទឱ្យដឹងថា ក្នុងរយៈពេល ១០ ខែ ឆ្នាំ ២០២១ កម្ពុជានាំចេញកសិផលទៅទីផ្សារក្រៅប្រទេសសរុប ៦ ៣៦៤ ៦០៧,២៤ តោន កើនឡើង ៨៧,៥៣ ភាគរយធៀបនឹងរយៈពេលដូចគ្នាក្នុងឆ្នាំ ២០២០ ដែលមានចំនួន ៣ ៣៩៣ ៩១៥,៦៤ តោន៕
