ភ្នំពេញៈ Hotel Nikko Phnom Penh ដែលជាសណ្ឋាគារល្បីឈ្មោះរបស់ប្រទេសជប៉ុនមានទីតាំងស្ថិតនៅអគារពាណិជ្ជកម្មជប៉ុន ក្នុងសង្កាត់ទួលទំពូង ខណ្ឌចំការមន រាជធានីភ្នំពេញ គ្រោងនឹងបើកឱ្យដំណើរការជាផ្លូវការនៅឆ្នាំ ២០២៤ ខាងមុខ។
យោងសេចក្តីប្រកាសព័ត៌មានរបស់សណ្ឋាគារ Nikko Hotels International បានឱ្យដឹងថា៖ «អគារពាណិជ្ជកម្មនេះនឹងត្រូវប្រើប្រាស់ជាអគារពាណិជ្ជកម្មចម្រុះមានទាំងការិយាល័យ ហាងលក់រាយ និងសណ្ឋាគារ (Nikko Phnom Penh)។ នេះជាអគារធំដំបូងគេនៅរាជធានីភ្នំពេញដែលត្រូវបានអភិវឌ្ឍដោយក្រុមហ៊ុនជប៉ុន»។
សេចក្តីប្រកាសព័ត៌មានបានបន្តថា សណ្ឋាគារនេះមានបន្ទប់ទទួលភ្ញៀវចំនួន ២០១ ដែលបន្ទប់នីមួយៗមានទំហំប្រហែល ៣៦ ម៉ែត្រការ៉េ។ ក្រៅពីនេះក៏មានភោជនីយដ្ឋានម្ហូបជប៉ុន និងស្កាយបារ៍នៅជាន់ទី ២៣ ដែលភ្ញៀវអាចរីករាយនឹងទិដ្ឋភាពដ៏អស្ចារ្យនៅទូទាំងរាជធានី។
ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន កាលពីថ្ងៃទី ២៩ ខែវិច្ឆិកា បានសម្តែងការស្វាគមន៍ចំពោះវត្តមានសណ្ឋាគារ Nikko Phnom Penh នៅកម្ពុជា ព្រោះសណ្ឋាគារនេះមានឈ្មោះល្បីនៅក្នុងប្រទេសជប៉ុន។ លោកបន្តថា កម្ពុជាពិតជាត្រូវការសណ្ឋាគារម៉ាកល្បីៗអន្តរជាតិជាច្រើនផ្សេងទៀត ព្រោះនៅពេលណាមានសណ្ឋាគារ ឬផលិតផលម៉ាកល្បីៗចូលមកកាន់តែច្រើន វានឹងចូលរួមជំរុញកំណើនសេដ្ឋកិច្ច ពាណិជ្ជកម្ម និងជំនឿចិត្តរបស់វិនិយោគិន និងទេសចរនៅលើពិភពលោកមកលើប្រទេសកម្ពុជា។
លោកនិយាយថា៖ «ប្រ៊េនដ៍សណ្ឋាគាររបស់ជប៉ុនមិនទាន់មានច្រើនទេនៅកម្ពុជា មាន ១ ដែរគឺ Tokyo Inn នៅមុខកោះពេជ្រដែលបានរួមចំណែកតិចតួចទាក់ទាញភ្ញៀវទេសចរជប៉ុន ប៉ុន្តែអ៊ីចឹងបានជាខ្ញុំត្រូវការឱ្យមានសណ្ឋាគារម៉ាកល្បីៗចូលមកកម្ពុជា កាន់តែច្រើនគឺកាន់តែល្អក្នុងការទាក់ទាញភ្ញៀវជប៉ុន ព្រោះកន្លងមកប្រ៊េនដ៍ពីជប៉ុននៅមានតិចតួចណាស់»។
លោក តុប សុភ័ក អ្នកនាំពាក្យក្រសួងទេសចរណ៍បានប្រាប់ថា លោកមិនទាន់ទទួលបានព័ត៌មានលម្អិតនៅឡើយទេចំពោះវត្តមានសណ្ឋាគារនេះ ថាបានចុះបញ្ជីត្រឹមត្រូវ ឬយ៉ាងណានៅក្នុងប្រទេសកម្ពុជាទេ ប៉ុន្តែកន្លងមកក៏មានសណ្ឋាគាររបស់ជប៉ុនមួយចំនួន បាននិងកំពុងបើកដំណើរការនៅក្នុងប្រទេសកម្ពុជារួចហើយ។
លោកថ្លែងថា៖ «ខ្ញុំអត់ច្បាស់ដែរថា គាត់ (Nikko Phnom Penh) បានស្នើសុំ ឬនៅ?។ កាលណាគាត់ស្នើសុំគឺត្រូវមានអាជ្ញាប័ណ្ណពីខាងទេសចរណ៍ទើបគាត់អាចប្រកបអាជីវកម្មបាន ប៉ុន្តែបើបើកក្នុងឆ្នាំ ២០២៤ ឯណោះ ប្រហែលជានៅទេមើលទៅ»។
លោកបន្តថា បើសណ្ឋាគារនេះមានបំណងបើកដំណើរការនៅក្នុងប្រទេសកម្ពុជា ត្រូវតែស្នើសុំច្បាប់អនុញ្ញាតសាងសង់ ច្បាប់អនុញ្ញាតធ្វើពាណិជ្ជកម្ម និងចុងក្រោយបានមកស្នើនៅក្រសួងទេសចរណ៍ ទើបអាចបម្រើសេវាទេសចរណ៍បាន។
បើយោងតាម លោក សុភ័ក វាមិនទាស់ខុសអ្វីទេ ចំពោះវត្តមានសណ្ឋាគារនេះ ព្រោះកម្ពុជាស្វាគមន៍នូវរាល់ការវិនិយោគទាំងអស់ ពិសេសវិស័យទេសចរណ៍ឱ្យតែការវិនិយោគនោះ គោរពទៅតាមច្បាប់ បទដ្ឋានគតិយុត្ត និងច្បាប់តម្រូវ។
ទោះជាយ៉ាងណា លោកស្វាគមន៍សម្រាប់គម្រោងវិនិយោគធំៗបែបនេះនៅក្នុងប្រទេសកម្ពុជា ដោយសារវានឹងរួមចំណែកជំរុញវិស័យទេសចរណ៍របស់កម្ពុជាក៏ដូចជាទាក់ទាញភ្ញៀវទេសចរលើពិភពលោក ជាពិសេសភ្ញៀវទេសចរជប៉ុនឱ្យមកកម្សាន្តនៅក្នុងប្រទេសកម្ពុជា៕