.jpg)
លោក អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពល ក្នុងកិច្ចប្រជុំនាពេលកន្លងទៅ។ រូបថត ក្រសួងរ៉ែ និងថាមពល
ភ្នំពេញៈ កម្ពុជាទទួលបានប្រាក់ប្រមាណ ២៤ លានដុល្លារពីចំណូលមិនមែនសារពើពន្ធពីវិស័យរ៉ែ ក្នុងរយៈពេល ៩ ខែឆ្នាំ ២០២១ កើន ២៧ ភាគរយបើធៀបនឹងរយៈពេលដូចគ្នាឆ្នាំ ២០២០។ នេះបើយោងតាមក្រសួងរ៉ែ និងថាមពល។
ទិន្នន័យដែល ភ្នំពេញ ប៉ុស្តិ៍ ទើបទទួលបានបង្ហាញថា ចាប់ពីខែមករា ដល់ខែកញ្ញា ឆ្នាំ ២០២១ កម្ពុជាប្រមូលចំណូលមិនមែនសារពើពន្ធពីវិស័យរ៉ែបានចំនួន ៩៨ ៤៦០ លានរៀល (២៤,២១ លានដុល្លារ) កើន ២៧ ភាគរយបើធៀបនឹងរយៈពេលដូចគ្នាឆ្នាំ ២០២០ ដែលមានត្រឹម ៧៧ ៤៨៩,២៤ លានរៀល (១៩,០៥ លានដុល្លារ)។ ចំណូលប្រមូលបាននេះ គឺស្មើនឹង ៩៦ ភាគរយនៃច្បាប់ថវិកាឆ្នាំ ២០២១ ដែលគ្រោងនឹងប្រមូលឱ្យបាន ១០២ ៤០០ លានរៀល (ស្មើ ២៥,១៨ លានដុល្លារ)។
លោក អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពលបានប្រាប់ភ្នំពេញប៉ុស្តិ៍នាថ្ងៃទី ២៩ ខែវិច្ឆិកាថា ការបើកឱ្យដំណើរការឡើងវិញស្ទើរគ្រប់វិស័យក្រោយពីបានទទួលភាពជោគជ័យពីយុទ្ធនាការចាក់វ៉ាក់សាំងបង្ការជំងឺកូវីដ ១៩ នៅក្នុងប្រទេស និងការចាប់ផ្តើមបើកឡើងវិញនៅប្រទេសដទៃទៀតជាសញ្ញាវិជ្ជមាននៃការកម្រើកឡើងវិញនៃសេដ្ឋកិច្ច។
លោកថ្លែងថា៖ «រយៈពេល ៩ ខែឆ្នាំ ២០២១ ចំណូលមិនមែនសារពើពន្ធពីវិស័យរ៉ែ ទទួលបាន ៩៦ ភាគរយនៃច្បាប់ថវិកា។ តាមការពិនិត្យវាយតម្លៃ អគ្គនាយកដ្ឋានធនធានរ៉ែអាចព្យាករណ៍ថា ចំណូលមិនមែនសារពើពន្ធពីវិស័យរ៉ែ នឹងអាចប្រមូលបានលើសច្បាប់ថវិកាឆ្នាំ ២០២១ ប្រមាណពី ២០២៥ ភាគរយ»។
លោកប្រាប់ទៀតថា ជាមួយនឹងភាពវិជ្ជមាននេះ ក្រសួងអាចវាយតម្លៃបានថា ចំណូលមិនមែនសារពើពន្ធពីវិស័យរ៉ែ នឹងមានការកើនឡើងនៅក្នុងឆ្នាំ ២០២២ និងនៅឆ្នាំបន្តបន្ទាប់ទៀត ដោយសារតម្រូវការរ៉ែសំណង់នៅក្នុងវិស័យសំណង់នឹងមានការកើនឡើង ចំណែកបរិមាណផលិតកម្មរ៉ែមាសអាចផលិតបានពេញលេញទៅតាមផែនការនៅក្នុងឆ្នាំ ២០២២ ខាងមុខ ស្របពេលនឹងការនាំចេញថ្មអារ ក៏ព្យាករណ៍នឹងមានការកើនឡើងផងដែរ។
យោងតាម លោក ឌីប៉ូឡា នៅឆ្នាំ ២០២២ ក្រសួងរ៉ែ ក៏គ្រោងនឹងដាក់ផែនការប្រមូលចំណូលមិនមែនសារពើពន្ធពីវិស័យរ៉ែឱ្យបាន ១៤០ ៧៧២ លានរៀល កើនឡើង ៣៧ ភាគរយបើធៀបនឹងច្បាប់ថវិកាឆ្នាំ ២០២១ ដែលបានកំណត់ ១០២ ៤០០ លានរៀល។
អគ្គនាយកនៃអគ្គនាយកដ្ឋានធនធានរ៉ែ លើកឡើងទៀតថា ការប្រមូលចំណូលមិនមែនសារពើពន្ធពីវិស័យរ៉ែ គឺជាផ្នែកមួយនៃចំណូលមិនមែនសារពើពន្ធផ្សេងទៀត ដែលបច្ចុប្បន្ននេះ ចំណូលមិនមែនសារពើពន្ធពីវិស័យរ៉ែបានចូលរួមចំណែកនៅក្នុងកំណើនសេដ្ឋកិច្ចកម្ពុជា។
អ្នកស្រាវជ្រាវសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិកម្ពុជាលោក ហុង វណ្ណៈ បានប្រាប់ថា ស្ថិរភាពនយោបាយ និងកំណើនការវិនិយោគបានធ្វើឱ្យចំណូលពន្ធពីវិស័យរ៉ែនៅកម្ពុជាបន្តកើនឡើងជារៀងរាល់ឆ្នាំ។ ទោះយ៉ាងណាចំណូលពីវិស័យនេះនឹងមិនអាចមានចំនួនច្រើនខ្លាំងសម្រាប់យកមកប្រើប្រាស់ជាប្រភពចំណូលសំខាន់របស់ប្រទេសដូចនៅបណ្តាប្រទេសនៅតំបន់មជ្ឈិមបូព៌ា អាហ្វ្រិក និងអាមេរិកឡាទីនឡើយ។
លោកអះអាងថា៖ «ទោះបីជាការប្រមូលចំណូលពីវិស័យនេះបានកើនឡើង ប៉ុន្តែវានៅតែមានទំហំទាបនៅឡើយបើយើងធៀបទៅនឹងចំណូលពីវិស័យផ្សេងៗទៀត»៕ LA
វីដេអូ៖
