ភ្នំពេញៈ ប្រជាពលរដ្ឋខ្មែរអាចកាត់បន្ថយថ្លៃចំណាយរបស់ខ្លួនរហូតដល់ ៧ ដង ទៅលើការព្យាបាលជំងឺមហារីកតាមរយៈការប្រើប្រាស់ម៉ាស៊ីនបាញ់កាំរស្មីស្តង់ដាអឺរ៉ុបនៅមន្ទីរសម្រាកព្យាបាល អូរ៉េន ឃែនស័រ បើធៀបនឹងការព្យាបាលជំងឺមហារីកដូចគ្នានៅក្រៅប្រទេស។ នេះបើតាមការអះអាងរបស់វេជ្ជបណ្ឌិតឯកទេសជំងឺមហារីក លោក អ៊ាវ សុខា។
លោកវេជ្ជបណ្ឌិត អ៊ាវ សុខា ដែលជាវេជ្ជបណ្ឌិតឯកទេសជំងឺមហារីកដំបូងគេនៅកម្ពុជា បានអះអាងបែបនេះនៅក្នុងឱកាសនៃពិធីសម្ពោធមន្ទីរសម្រាកព្យាបាល អូរ៉េន ឃែនស័រ កាលពីថ្ងៃទី ៣០ ខែវិច្ឆិកា ឆ្នាំ ២០២១ ខណៈលោកក៏ជាសហស្ថាបនិក ១ រូបនៃមន្ទីរសម្រាកព្យាបាលនេះផងដែរ។
លោកវេជ្ជបណ្ឌិតបានលើកឡើងថា គោលបំណងសំខាន់នៃការបង្កើតមន្ទីរសម្រាកព្យាបាល អូរ៉េន ឃែនស័រ គឺចូលរួមបំពេញបន្ថែមនៅក្នុងវិស័យសុខាភិបាល សម្រួលដល់ជីវភាព និងការលំបាកដល់ប្រជាពលរដ្ឋដែលមានជំងឺ ព្រមទាំងបង្កើតការងារជូនគ្រូពេទ្យ និងបុគ្គលិកសុខាភិបាល។ ជាមួយគ្នានេះ អូរ៉េន ឃែនស័រ ក៏បាននាំចូលម៉ាស៊ីនបាញ់កាំរស្មីស្តង់ដាអឺរ៉ុប (តម្លៃខ្ទង់លានដុល្លារ) ដែលសមត្ថភាពស្មើម៉ាស៊ីនបាញ់កាំរស្មីនៅមន្ទីរពេទ្យជូឡាឡុងកន ប្រទេសថៃ។
លោកវេជ្ជបណ្ឌិតបានបន្ថែមថា អ្នកជំងឺមហារីកភាគច្រើនជាមនុស្សវ័យកណ្តាល និងវ័យចំណាស់ ដោយជំងឺនេះលោកជួបភាគច្រើនជាមហារីកថ្លើម សួត សុដន់ ក្រពះពោះវៀន និងមហារីកមាត់ស្បូនជាដើម។ អ្នកជំងឺមហារីកនៅកម្ពុជាប្រមាណ ១៣ ៥០០ នាក់ត្រូវបានព្យាបាលដោយកាំរស្មី ហើយមានតែអ្នកជំងឺប្រមាណ ៣ ០០០ នាក់ ទទួលការព្យាបាលនៅក្នុងស្រុក ខណៈជាង ១ ៥០០ នាក់ចេញទៅព្យាបាលនៅប្រទេសជិតខាង និងនៅសល់ជាង ១០ ០០០ នាក់ កំពុងត្រូវការការព្យាបាល និងគុណភាពតាមស្តង់ដាវេជ្ជសាស្ត្រសកល។
លោកវេជ្ជបណ្ឌិតបានថ្លែងថា៖ «នៅកម្ពុជា ការទទួលបានការពិនិត្យ និងការធ្វើតេស្តរកជំងឺមហារីកដោយម៉ាស៊ីនទំនើបនៅមានកម្រិតទាប។ ក្នុងឆ្នាំ ២០២០ នៅក្នុងចំណោមអ្នកជំងឺមហារីកប្រហែល ១០ ០០០ នាក់ពួកគេបានធ្វើតេស្តពិនិត្យដោយម៉ាស៊ីន mammograph តែចំនួន ២,៦ ភាគរយ, CT scanners ១២,៤ ភាគរយ, MRI scanners ១,៣ ភាគរយ និងពុំសូវមានការធ្វើ PET/CT នៅឡើយទេ»។
ដូចនេះលោកវេជ្ជបណ្ឌិតសន្និដ្ឋានថា ប្រទេសកម្ពុជានៅត្រូវការម៉ាស៊ីនព្យាបាលដោយកាំរស្មី យ៉ាងតិច ១០ គ្រឿងបន្ថែមទៀត ទើបអ្នកជំងឺអាចទទួលបានការធ្វើតេស្ត ស្វែងរកមេរោគ និងព្យាបាលទាន់ពេលវេលា។
នៅក្នុងបទបង្ហាញ លោកវេជ្ជបណ្ឌិត ប៊ុនប៉ា ប៉ូលី គ្រូពេទ្យឯកទេសជំងឺមហារីក ជំងឺឈាម និងការព្យាបាលដោយកាំរស្មី បានឱ្យដឹងថា ជាទូទៅអ្នកជំងឺមហារីក ៩០ ភាគរយត្រូវការព្យាបាលដោយកាំរស្មី ហើយតាមសមត្ថភាពផ្នែកសុខាភិបាលកម្ពុជាសព្វថ្ងៃ ក្នុង ១ ឆ្នាំអាចទទួលព្យាបាលប្រមាណតែ ៥០០ នាក់ប៉ុណ្ណោះ។
លោកវេជ្ជបណ្ឌិតបន្ថែមថា ដោយសារការវិវត្តបច្ចេកវិទ្យាវេជ្ជសាស្ត្រជាបន្តបន្ទាប់រហូតមកទល់នឹងពេលនេះ ការព្យាបាលដោយប្រើថាមពលកាំរស្មីចន្លោះពី ៦ ទៅ ១០ លានវ៉ុលនោះអាចសម្លាប់កោសិកាមហារីកបាន។
លោកវេជ្ជបណ្ឌិតបានអះអាងថា៖ «ដោយសារបច្ចេកទេសនៃការបញ្ចាំងកាំរស្មីសម័យទំនើប យើងអាចបង្កើនប្រសិទ្ធភាពរបស់កាំរស្មី យើងបង្កើនប្រសិទ្ធភាពក្នុងការព្យាបាល ហើយបន្ថយផលប៉ះពាល់ទៅលើអ្នកជំងឺនៅអំឡុង និងក្រោយពេលព្យាបាល ដែលនឹងធ្វើឱ្យគុណភាពជីវិតរបស់អ្នកជំងឺមានការកើនឡើង»។
លោក ឃួង ស្រេង អភិបាលរាជធានីភ្នំពេញបានថ្លែងថា វត្តមានរបស់មន្ទីរសម្រាកព្យាបាល អូរ៉េន ឃែនស័រ ដែលមានឯកទេសលើជំងឺមហារីក និងជំងឺឈាមនេះបានរួមចំណែកយ៉ាងសំខាន់ក្នុងការជួយកាត់បន្ថយបញ្ហាសេវាវេជ្ជសាស្ត្រ និងសុខាភិបាលដល់ប្រជាជនកម្ពុជា។
លោកបញ្ជាក់ថា៖ «រៀងរាល់ឆ្នាំមានពលរដ្ឋខ្មែរជាច្រើនបានចំណាយលុយរាប់សិបម៉ឺនដុល្លារដើម្បីស្វែងរកការព្យាបាល ពិសេសនៅប្រទេសជិតខាង។ បច្ចេកវិទ្យាម៉ាស៊ីនថ្មីនេះនឹងអាចបម្រើ សេវាព្យាបាលដល់ប្រជាជនក្នុងស្រុកដែលកំពុងមានតម្រូវការ»។
របាយការណ៍អង្គការសុខភាពពិភពលោកឱ្យដឹងថា ក្នុងឆ្នាំ ២០២០ កម្ពុជាមានប្រជាជនប្រហែល ១៨ ៣៧៥ នាក់កើតជំងឺមហារីក ហើយក្នុងនោះមានអ្នកជំងឺចំនួន ១២ ៦៣៨ នាក់បានស្លាប់បាត់បង់ជីវិត៕ LA
វីដេអូ៖