​ក្រុមហ៊ុន ៦ ដាក់ពាក្យ​ស្នើសុំ​បន្ត​ហោះហើរ​ឡើងវិញ ខណៈ​ក្រុមហ៊ុន​ ២ ​ទៀត បង្កើន​ចំនួន​ជើងហោះហើរ​

ទិដ្ឋភាពព្រលានយន្តហោះអន្តរជាតិភ្នំពេញ។ ក្រុមហ៊ុន ៦ ដាក់ពាក្យស្នើសុំបន្តហោះហើរឡើងវិញ ខណៈក្រុមហ៊ុន ២ ទៀត បង្កើនចំនួនជើងហោះហើរ។ ហេង ជីវ័ន

ភ្នំពេញៈ ក្រុមហ៊ុនអាកាសចរណ៍ចំនួន ៦ បានដាក់ពាក្យសុំបន្តការហោះហើរឡើងវិញតាមកម្មវិធី (Scheduled Flights) ខណៈក្រុមហ៊ុន ២ ទៀតបានស្នើសុំបន្ថែមជើងហោះហើរ ដែលនឹងធ្វើឱ្យចំនួនជើងហោះហើរទាំងក្នុងស្រុក និងអន្តរជាតិ ក្នុងខែធ្នូនេះកើនដល់ជាង ៤០ ជើងក្នុង ១ សប្តាហ៍។ នេះបើតាមលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល។

ថ្លែងក្នុងកិច្ចប្រជុំលើកទី២ នៃក្រុមការងាររដ្ឋាភិបាល និងឯកជន ដើម្បីលើកស្ទួយវិស័យទេសចរណ៍ក្នុង និងក្រោយវិបត្តិជំងឺកូវីដ ១៩ តាមប្រព័ន្ធវីដេអូ កាលពីថ្ងៃទី ២៩ ខែវិច្ឆិកា លោក ម៉ៅ ហាវណ្ណាល់ បានឱ្យដឹងថា បន្ទាប់ពីរាជរដ្ឋាភិបាលសម្រេចលើកលែងការធ្វើចត្តាឡីស័កសម្រាប់អ្នកដំណើរចូលកម្ពុជាដែលចាក់វ៉ាក់សាំងប្រឆាំងនឹងជំងឺកូវីដ ១៩ ពេញលេញរួចមកចំនួននៃអ្នកធ្វើដំណើរចូលមកកម្ពុជាបានកើនឡើងបណ្តើរៗហើយ ខណៈថ្មីៗនេះមានក្រុមហ៊ុនអាកាសចរណ៍ចំនួន ៦ បានមកស្នើសុំហោះហើរឡើងវិញ និងក្រុមហ៊ុន ២ ទៀតសុំបន្ថែមជើងហោះហើរ។

លោកបន្តថា រដ្ឋលេខាធិការដ្ឋានអាកាសចរស៊ីវិលបានកំណត់អាទិភាពនៃការចាប់ផ្តើមជើងហោះហើរដឹកអ្នកដំណើរតាមផ្លូវអាកាសជាមួយប្រទេសអាស៊ានជាអាទិភាពទី ១ ស្របតាមគោលការណ៍ការបន្ធូរបន្ថយការធ្វើចត្តាឡីស័ក។

លោកថ្លែងថា៖ «ចាប់ពីខែធ្នូ ឆ្នាំ ២០២១ ទៅចំនួនជើងហោះហើរសរុបនឹងមានការកើនឡើងក្នុង ១ សប្តាហ៍រហូតដល់ ៤៣ ជើងធៀបខែតុលា ឆ្នាំ ២០២១ គឺមានការកើនឡើង ១៦ ភាគរយ ឬពីចំនួន ៣៧ ជើង។ ចំនួនជើងហោះហើរនេះអាចនឹងមានការប្រែប្រួលទៅតាមការវិវឌ្ឍនៃស្ថានភាពជាក់ស្តែងនៃការគ្រប់គ្រងការរីករាលដាលនៃជំងឺកូវីដ ១៩»។

យោងតាមលោក ហាវណ្ណាល់ ក្រុមហ៊ុនអាកាសចរណ៍ទាំង ៦ ដែលបានមកដាក់ពាក្យស្នើសុំបន្តការហោះហើរឡើងវិញតាមកម្មវិធី ចាប់ពីខែធ្នូ ឆ្នាំ ២០២១ រួមមាន ក្រុមហ៊ុន Thai Smile Airways មកពីបាងកក (៤ ជើងក្នុង ១ សប្តាហ៍), Bangkok Airways មកពីបាងកក (៧ ជើងក្នុង ១ សប្តាហ៍), Thai Air Asia មកពីបាងកក (៣ ជើងក្នុង ១ សប្តាហ៍), Philippines Airlines មកពីម៉ានីល (១ ជើង ក្នុង ១ សប្តាហ៍), Cathay Pacific Airways មកពីហុងកុង (១ ជើងក្នុង ១ សប្តាហ៍) និង Malaysia Airlines (៤ ជើងក្នុង ១ សប្តាហ៍)។

ចំណែកក្រុមហ៊ុនស្នើសុំបន្ថែមជើងហោះហើរ រួមមានក្រុមហ៊ុន Singapore Airlines ឡើងដល់ ១៤ ជើងក្នុង ១ សប្តាហ៍ លើដំណាក់ផ្លូវសិង្ហបុរី-ភ្នំពេញ-សិង្ហបុរី និងលើដំណាក់ផ្លូវ សិង្ហបុរី-សៀមរាប-សិង្ហបុរី ចំនួន ៧ ជើង ក្នុង ១ សប្តាហ៍ និងក្រុមហ៊ុនអាកាសចរណ៍ក្នុងស្រុក Lanmei Airlines នឹងធ្វើការហោះហើរលើដំណាក់ផ្លូវ ភ្នំពេញ-សៀមរាប-បាងកក ចំនួន ២ ជើង។

លោកលើកឡើងថា អាកាសចរស៊ីវិលក៏នឹងផ្តោតលើការបើកជើងហោះហើរជាប្រក្រតីភាពឡើងវិញរវាងកម្ពុជា និងចិននៅពេលណាមានការបន្ធូរបន្ថយវិធានការប្រយុទ្ធជំងឺកូវីដ ១៩ នៃរដ្ឋាភិបាលចិនផងដែរ។

លោក ហាវណ្ណាល់ បន្ថែមថា អាកាសចរស៊ីវិលនឹងជំរុញ និងពិភាក្សាជាមួយបណ្តាក្រុមហ៊ុនអាកាសចរណ៍មកពីមជ្ឈឹមបូព៌ាប្រទេស ដូច Emirates, Qatar Airways និង Etihad Airways ក្នុងការពិចារណារៀបចំជើងហោះហើរឡើងវិញរួមទាំងក្រុមហ៊ុនអាកាសចរណ៍ All Ni-ppon Airways មកពីទីក្រុងតូក្យូនៃប្រទេសជប៉ុនផងដែរ។

ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ ភ្នំពេញ ប៉ុស្តិ៍ ក្នុងថ្ងៃទី ៣០ ខែវិច្ឆិកាថា នេះជាព័ត៌មានវិជ្ជមានបំផុតសម្រាប់អ្នកនៅក្នុងវិស័យទេសចរណ៍ ព្រោះការតភ្ជាប់ការធ្វើដំណើរតាមផ្លូវអាកាសគឺមានភាពឆាប់រហ័ស និងមានផាសុកភាព។ ប្រសិនបើមិនមានការតភ្ជាប់ជើងហោះហើរ គឺប្រៀបដូចជាពីខេត្ត ១ ទៅខេត្ត ១ មិនមានផ្លូវធ្វើដំណើរអ៊ីចឹង។

លោកអះអាងថា៖ «នេះជាព័ត៌មានដ៏ល្អដែលអ្នកនៅក្នុងវិស័យទេសចរណ៍ចង់បានហើយយើងក៏សង្ឃឹមថានឹងមានក្រុមហ៊ុនអាកាសចរណ៍កាន់តែច្រើននឹងបើកការហោះហើរចេញ-ចូលកម្ពុជា។ ការតភ្ជាប់ជើងហោះហើរ គឺជាមធ្យោបាយល្អជាងគេសម្រាប់ការស្តារទេសចរណ៍ និងសេដ្ឋកិច្ចឡើងវិញ»។

ក្រសួងសុខាភិបាល កាលពីថ្ងៃទី ២៩ ខែវិច្ឆិកា បានចេញប្រកាសស្តីពីការហាមឃាត់អ្នកដំណើរ ឬអ្នកបានឆ្លងកាត់ប្រទេសចំនួន ១០ នៅទ្វីបអាហ្វ្រិក ឬមានប្រវត្តិធ្វើដំណើរទៅប្រទេសទាំង ១០ នៅក្នុងអំឡុងពេល ៣ សប្តាហ៍មុនចូលមកកម្ពុជាមួយរយៈ ដើម្បីទប់ស្កាត់ការឆ្លងចូលកម្ពុជានូវមេរោគកូវីដ ១៩ ប្រភេទអូមីក្រុង (Omicron)។ ប្រទេសទាំង ១០ នោះរួមមាន Botswana, Mozambique, Eswatini, Lesotho, Namibia, Zimbabwe, Malawi, Angola, South Africa, និង Zambia។

ទាក់ទងនឹងសេចក្តីប្រកាសខាងលើ លោក ស៊ីណាន បានអះអាងថា៖ «នេះជាការគំរាមកំហែងថ្មីមួយសម្រាប់វិស័យទេសចរណ៍ដែលទើបចាប់ផ្តើមមានពន្លឺឡើងវិញ ខណៈវានឹងអាចធ្វើឱ្យមានការរាំងស្ទះដល់ផែនការវ៉ាក់សាំងរបស់យើងខ្លះៗដោយចៀសមិនផុត»។

អគ្គនាយកនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក គៀត ច័ន្ទថារិទ្ធ បានឱ្យដឹងថា ចាប់ពីថ្ងៃទី ១-២៦ ខែវិច្ឆិកា ឆ្នាំ ២០២១ ជនបរទេសចូលមកកម្ពុជាមានចំនួន ១២ ១៨២ នាក់ ក្នុងនោះភ្ញៀវទេសចរចំនួន ៤ ៤១០ នាក់ ដែលភាគច្រើនគឺជនជាតិវៀតណាម ឥណ្ឌូនេស៊ី ម៉ាឡេស៊ី និងថៃ។

ទិន្នន័យក្រសួងទេសចរណ៍បង្ហាញថា ចាប់ពីខែមករា ដល់ខែកញ្ញា ឆ្នាំ ២០២១ កម្ពុជាបានទទួលទេសចរ ១៣១ ៦៧៤ នាក់ ធ្លាក់ចុះ ៨៩,៤ ភាគរយបើធៀបនឹងរយៈពេលដូចគ្នាឆ្នាំ ២០២០ ដែលមាន ១ ២៤៧ ៦៨០ នាក់។ ក្នុងនោះការធ្វើដំណើរតាមផ្លូវអាកាសមាន ៦៣ ០៥០ នាក់ស្មើ ៤៧,៩ ភាគរយ និងផ្លូវគោក-ទឹក ៦៨ ៦២៤ នាក់ស្មើ ៥២,១ ភាគរយ៕ LA

វីដេអូ៖

ក្រុមហ៊ុន ៦ ដាក់ពាក្យ​ស្នើសុំ​បន្ត​ហោះហើរ​ឡើងវិញ ខណៈ​ក្រុមហ៊ុន​ ២ ​ទៀត បង្កើន​ចំនួន​ជើងហោះហើរ

សេដ្ឋកិច្ច

ព័ត៌មានថ្មីៗ

វីដេអូ

ក្រុមហ៊ុន ៦ ដាក់ពាក្យស្នើសុំបន្តហោះហើរឡើងវិញ ខណៈក្រុមហ៊ុន ២ ទៀត បង្កើនចំនួនជើងហោះហើរ