.jpg)
អ្នកថ្មើរជើងដើរកាត់មុខផ្ទាំងអេក្រង់ Nikkei 225 នៅទីក្រុងតូក្យូ ប្រទេសជប៉ុនកន្លងមក។ រូបភាព៖ AFP
ក្រុងហុងកុង៖ តម្លៃផ្សារភាគហ៊ុននៅអាស៊ីភាគច្រើនបានកើនឡើងកាលពីថ្ងៃពុធ ខណៈដែលតម្លៃប្រេងបានស្ទុះងើបឡើងវិញ ដោយសារតែពាណិជ្ជករវាយតម្លៃពីចក្ខុវិស័យ សម្រាប់សេដ្ឋកិច្ចពិភពលោក បន្ទាប់ពីក្រុមហ៊ុនផលិតឱសថឈានមុខគេជាច្រើនបានផ្តល់យោបល់ផ្សេងៗគ្នាលើប្រសិទ្ធភាពវ៉ាក់សាំងរបស់ពួកគេប្រឆាំងនឹងវីរុសអូមីក្រុង និងធនាគារកណ្ដាលអាមេរិកបានយកចិត្តទុកដាក់ខ្លាំងលើគោលនយោបាយរូបិយវត្ថុ។
ការស្ទុះងើបឡើងវិញបន្តិចពីការខាតបង់យ៉ាងខ្លាំងកាលពី ២ ថ្ងៃមុន បន្ទាប់ពីលោក Stephane Bancel ប្រធានក្រុមហ៊ុន Moderna បានប្រាប់កាសែត Financial Times ថាវ៉ាក់សាំងដែលមានស្រាប់ប្រហែលជាមិនមានប្រសិទ្ធភាពប្រឆាំងនឹងជំងឺកូវីដថ្មីនេះទេ ដោយសារតែការវិវត្តច្រើនដងរបស់វា។
ទោះជាយ៉ាងណាក៏ដោយ ក្រុមហ៊ុនផលិតឱសថផ្សេងទៀតបានឲ្យដឹងថា វាលឿនពេកមិនអាចធ្វើការវិនិច្ឆ័យបាននោះទេ ដោយប្រធានក្រុមហ៊ុន BioNTech ដែលបានរួមគ្នាផលិតវ៉ាក់សាំងជាមួយក្រុមហ៊ុន Pfizer បានឲ្យដឹងថា មនុស្សទំនងជាងនឹងត្រូវការការពារប្រឆាំងនឹងរោគសញ្ញាធ្ងន់ធ្ងរ។
ចក្ខុវិស័យដែលគួរឱ្យព្រួយបារម្ភតិចតួច ពីក្រុមហ៊ុនផ្សេងៗទៀតបានជួយដោះស្រាយការបារម្ភបន្តិចបន្តួច ខណៈពេលដែលព័ត៌មានថា ក្រុមហ៊ុន Moderna ក្រុមហ៊ុន Pfizer និងអ្នកគាំទ្រ Sputnik V ជាក្រុមហ៊ុនផលិតវ៉ាក់សាំងរបស់រុស្ស៊ីកំពុងធ្វើការងារលើវ៉ាក់សាំងប្រឆាំងវីរុសអូមីក្រុង ជាពិសេសរួចហើយក៏កំពុងផ្តល់ការសម្រាលការបារម្ភខ្លះៗផងដែរ។
ជាមួយនឹងក្រុមអ្នកជំនាញផ្នែកវេជ្ជសាស្ដ្រ ដែលឲ្យដឹងថា ចក្ខុវិស័យពេញលេញសម្រាប់វីរុសអូមីក្រុងនៅតែកំពុងត្រូវបានវាយតម្លៃ ក្រុមអ្នកវិភាគបានឲ្យដឹងថាទីផ្សារនឹងនៅតែមានការប្រែប្រួល។
លោក Louis Navellier ជាអ្នកយុទ្ធសាស្ត្របានថ្លែងថា៖ «ប្រសិនបើនៅពេលនេះសប្តាហ៍ក្រោយ ក្រុមអ្នកជំនាញវេជ្ជសាស្ដ្របានសន្និដ្ឋានថាវ៉ាក់សាំងដែលមានស្រាប់គឺ «គ្រប់គ្រាន់» និង/ឬវីរុសអូមីក្រុងគឺមិនធ្ងន់ធ្ងរជាងវីរុសវ៉ារ្យ៉ង់ Delta បច្ចុប្បន្ន ទីផ្សារភាគហ៊ុនគួរតែស្ទុះងើបឡើងវិញយ៉ាងខ្លាំង»។
លោកបានបន្ថែមថា៖ «ការសន្និដ្ឋានតាមមធ្យោបាយផ្សេងទៀតអាចដាក់សម្ពាធយ៉ាងខ្លាំងលើចក្ខុវិស័យកើនឡើងបច្ចុប្បន្នសម្រាប់ឆ្នាំ ២០២២»។
ជាមួយគ្នានេះដែរតម្លៃប្រេងឆៅដែលបានកើនឡើងកាលពីថ្ងៃសុក្រ ហើយជាថ្មីម្តងទៀតកាលពីថ្ងៃអង្គារ ដោយសារតែការបារម្ភអំពីការបិទខ្ទប់ជាថ្មីដែលអាចធ្វើឡើង និងជះផលប៉ះពាល់លើតម្រូវការ៕ LA
