ភ្នំពេញៈ ក្រសួងទេសចរណ៍ បានដាក់ចេញការស្ទង់មតិទេសចរផ្ទៃក្នុងអំពី «ចំណង់ចំណូលចិត្ត និងឥរិយាបថរបស់ទេសចរផ្ទៃក្នុង» ដើម្បីទទួលបានធាតុចូលបន្ថែមសម្រាប់ការរៀបចំផែនការយុទ្ធសាស្ត្រជាតិអភិវឌ្ឍន៍ទេសចរណ៍កម្ពុជាឆ្នាំ ២០២១-២០៣៥។
យោងតាមសេចក្តីជូនដំណឹងរបស់ក្រសួងទេសចរណ៍ កាលពីថ្ងៃទី ២៩ ខែវិច្ឆិកា ឆ្នាំ ២០២១ ការស្ទង់មតិនេះនឹងអនុញ្ញាតឱ្យសាធារណជន ប្រជាពលរដ្ឋ និងភ្ញៀវទេសចរ ទាំងទេសចរជាតិ និងបរទេសក្នុងស្រុកទាំងអស់ចូលរួមជួយបំពេញកម្រងសំណួរនេះដូចមានតំណភ្ជាប់៖ https://forms.gle/j9zf9pDGsa2HKrPF9។
ក្រសួងទេសចរណ៍ឱ្យដឹងថា៖ «មតិយោបល់របស់លោកអ្នកទាំងអស់ គឺពិតជាមានតម្លៃសម្រាប់ការរៀបចំផែនការយុទ្ធសាស្ត្រជាតិអភិវឌ្ឍន៍-ទេសចរណ៍កម្ពុជា ឆ្នាំ ២០២១-២០៣៥។ រាល់ព័ត៌មានទទួលបានតាមកម្រងសំណួរនេះ គឺអនាមិក ត្រូវរក្សាជាការសម្ងាត់ និងប្រើប្រាស់សម្រាប់តែក្នុងការសិក្សានេះប៉ុណ្ណោះ»។
លោក ជួប រតនា ប្រធាននាយកដ្ឋានផែនការអភិវឌ្ឍន៍ទេសចរណ៍នៃក្រសួងទេសចរណ៍ ប្រាប់ភ្នំពេញប៉ុស្តិ៍ថា កម្មវិធីស្ទង់មតិទេសចរផ្ទៃក្នុងនេះទើបបានដាក់ចេញកាលពីពេលថ្មីៗ ដោយកន្លងមកក្រសួងទេសចរណ៍ មានផែនការយុទ្ធសាស្ត្រជាតិអភិវឌ្ឍន៍-ទេសចរណ៍ ឆ្នាំ ២០១២-២០២០។ លោកបន្តថា ពេលនេះដល់ឆ្នាំដែលត្រូវធ្វើបច្ចុប្បន្នភាពឡើងវិញហើយ។
លោកថ្លែងថា៖ «ផែនការអភិវឌ្ឍន៍-ទេសចរណ៍ជាតិនេះដឹកនាំដោយអគ្គនាយកដ្ឋានគ្រប់គ្រងឧស្សាហកម្មទេសចរណ៍»។
ទោះយ៉ាងណាលោក ជួប រតនា ប្រាប់ថា មិនទទួលបានព័ត៌មានលម្អិតពីលក្ខណៈបច្ចេកទេសនៅឡើយទេ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានឱ្យដឹងថា ការដាក់ចេញការស្ទង់មតិរបស់ក្រសួងទេសចរណ៍ពីចំណង់-ចំណូលចិត្ត និងឥរិយាបថទេសចរផ្ទៃក្នុងនេះ គឺដើម្បីដាក់ចេញយុទ្ធសាស្ត្រនៃការស្ទង់មតិដ៏ល្អ។ លោកស្រីអះអាងថា៖ «ទេសចរផ្ទៃក្នុងបានរួមចំណែកយ៉ាងច្រើនក្នុងកំណើនសេដ្ឋកិច្ចដូច្នេះយើងត្រូវដឹងឱ្យច្បាស់ពីតម្រូវការ និងឥរិយាបថប្រជាពលរដ្ឋក្នុងប្រទេសឱ្យបានស៊ីជម្រៅ ដើម្បីចូលរួមចំណែក និងជំរុញទេសចរផ្ទៃក្នុងក៏ដូចជាអភិវឌ្ឍន៍សម្រាប់ទេសចរផ្ទៃក្នុង»៕ LA